Lomu 15 - Ata New Testament

Taxavutalanengesi uasi, taxavutalane'i tavivinge

¹ Ioxe, nenge se'i ne pakia'inge no anu lopala. Ia ane'i tavivinge se'i ne pakia'a malaxo uasi. Laso nenge ane pakia'inge la taxavutalanengesi uasi. Anu laixe so tanengexa'a mo tasu'uline'i tavivinge ane mamala­xa'asio.

² Nenge vilevilesi xavine­ngei'a tavivinge so tavalaxa'a no anu lopala noxi'a.

³ Nenge telavu lexe Kalaisiti kalumo xavutala noxou muxolu noxousi uasi. Xo tatei mikaukavunu vaikalaou mulemolu noxou Mosinge aloxo 'o, “Vaikala masua aneva tamitema misu'anu noxine la mulapau noxilo.”

⁴ Tatei mikaukavunu vaikala tavu'alo no lavukuou Mosinge. Vaikala ma'ia mikauka­vunu ne anu so upelototosinge. Laso loxo talomuxu la anu u'oxonu oponenge uai se'isisi. Uai se'isisi mo so tatulu pakia'inge mo talopalanu voxo so xoluxolu laixe ili'io.

⁵ Laso eni avikalasinge noxou Mosinge. Xo anu molu u'oxonu opongengi uai se'isisi so ngatulu pakia'inge axone. Avika­lasinge noxou lexe ngingi ngamulinu ilixo noxou Kalaisiti Iesua so opongengi upita vilesisi.

⁶ Opongengi upita vilesisi so nga'itinu ualasou Mosinge e Tatananenge Iesua Kalaisiti Momu.

Mosinge muiaiama noxi'a tamitema noale'ale kalumo

⁷ Ioxe, Kalaisiti mu'osasinge so nenge noxou taxolu tapita. La ngingi nga'oxo axone kalumo so ngingi mukalusi nga'osasinge ngato'o mo so ngaxolu ngapita. Laso axone la ualasou Mosinge utila.

⁸ Xo Kalaisiti mune'e la anu itema so xaixai. Anu muxaxaisi'a Ta'isi­laeli so mupalasinoxu vavalima noxou Mosinge e mu'oxonu tatei noxi'a ta'ilusune'i. Mupalasinoxu vavalima ne so ilavu lexe anu manina.

⁹ Mo kalumo anu umasa­xau lexe tamitema noale'ale imaisou iaiama noxou Mosinge mo i'itinu ualasou. Loxo ulemolu no anu Mosinge vaikalaou aloxo 'o, “Eni axolu no taine'i tamitema noale'ale la noxi'a tatoxene mo talexenu lexe so ta'itinu ualasine.”

¹⁰ Vaikalaou Mosinge vile aloxo 'ola, “Ngingi tamitema no tuatuala noale'ale opongengi vilesisi noxi'a tamite­maou so nga'osa.”

¹¹ Xe mautunu vile aloxo 'o, “Ngingi tamitema so tuatuala iou iou no anu laili mukalusi, nga'itinu ualasou Tatana­nengesi.”

¹² Xe Aisaia kalumo mukaukavunu no anu Mosinge vaikalaou lexe, “Kingi alavua no anu laili noxou Iesi uxali. Anu uxali la u'uli laxune'i tamitema noale'ale. Mo lopala noxi'a utulu noxousi.”

¹³ Laso masaxa noxilo noxinge lexe ngingi ngalopala noxou Mosingesi. Ngalopala noxou laso anu uxalixu osa'ila mo xoluxolu lalavulusi. Mo Ulenu Laixe ulosinge xavi so loxo ngaxomaiou voxo olele la lopala noxinge utilasi.

Polu mulanu vaikala no taine'i tamitema noale'ale

¹⁴ Ioxe tavivilo, eni alavu manina lexe ngingi utotomu nga'oxonu ilixo laixe mo lavulavumengi mise­vile no anu vaikalaou Mosinge. Lavulavumengi misevile laso ngingi ngamomomo so ngapelo­totosinge ngato'o.

¹⁵ Ia vaikalaxeli se'i ekaukavunu 'o anu pakia'u sevile xo eni amama'u so avikala lamana uasi. Eni emasaxau alivu­noxu xavutalamengi no anu mi se'i mutiatila. Xo Mosinge muiaiama noxilo.

¹⁶ Muiaiama noxilo mo musosovosilo so eni amitemaou so alaixu vaikala laixe so Kalaisiti Iesua noxi'a tamitema noale'ale. La no anu xaixai noxilo ne la a'oxonu xaixai loxo tapilisiti mi'oxonu. Xo mi ane alaixu noxou Mosinge ne, ane'i tamitema noale'ale. Alanu vaikala laixe noxou Mosinge noxi'a xe loxo amaxa'a noxou Mosinge la u'osasi'a ane. U'osasi'a xo Ulenu Laixe ukalipalane'i lexe noxou mu'isalili.

¹⁷ Laso axolu noxou Kalaisiti Iesua aloxo 'o la eni a'osasou xaixai anene noxou Mosinge so a'oxonu.

¹⁸ Axolu noxou laso eni a'itileli uasi. Xo mi ma'ia e'oxonu la eni uasi, Kalaisiti molu muxalixu no avolo. Xo elanu vaikalaou noxi'a tamitema noale'ale laso maixene vaimomo 'o mose'i opone'i ukasou manina.

¹⁹ Xe e'oxonu sosovo so xavi iou iou so uvalaxu vaikala ne ia eni uasi. Ulenu molu mulosilo xavi so a'oxonu. Mi ne musoko'u ne Ielusalemo so elanu vaikala laixe so Kalaisiti. Elanu elanu la exixao nopaxapaxa mo exali avile ne Ililikumi polovinisi.

²⁰ Xo no anu xaixai noxilo la opoleli mututulu lexe alemolu vaikala laixe noxou Mosinge noxi'a tamitema anesi ilavusou ualasou Kalaisiti uasi. Xo a'oxonu latilovo aloxo 'o. Eni amasaxau asivitanoxu tani ane posiposi mutulu mukalu uasi. Eni amasaxau asoko'u tani no tava'u manina.

²¹ Xo loxo Mosinge vaikalaou ulemolu, “Ane'i tami­tema ane ilomusou a'alosou uasi la ane'i ixali lamana noxou. Xe tamitema ane ilomusou vaikalaou lamana uasi la anu upalasi laixe noxi'a.”

²² E'au'au no anu anenesi laso mutanutanuxo la axali noxinge uasi.

Polu mumasaxau ulai ne Lomu

²³ Ioxe, loxo elemolu. Tei la exixaoxao no xale tuatuala. Ia vaimomo 'o xaixai anene mukalu la opoleli utulu lexe ane'e noxinge. Opoleli mututulu axone tatei mune'e muxali vaimomo 'o.

²⁴ Laso loxo alai ne Sipeni la apolo loxo noxinge tei. Xo eni a'osa so amaisinge mo taxolu tasexelanenge ngato'o. Ukalu laso ngapilixileli laixe so alai avile ne Sipeni.

²⁵ Ia tei 'o la alai ne Ielusalemo so asu'uline'i tamitemaou Mosinge u'isalili ne.

²⁶ Xo se'i noxi'a ne la'ilalixa'a mo lamoli uasi. La Mosinge ta'olu ne Masetonia xe Akaia polovinisi 'o mi'oxo laixe so mipitanu lamoli sevile so ulai noxi'a olele.

²⁷ Mipitanu lamoli axone la laixe xo anu loxo ikoline'i Ta'isilaeli. Xo Ta'isilaeli ne ane'i vote'i so su'ulisi'a tamitema noale'ale no anu ulene'i. Laso laixe loxo ikoline'i Ta'isilaeli sevile mo isu'uli no anu mimi so vasime'a.

²⁸ Laso tei la akalusou xaixai ano'o so alaixu lamoli ne Ielusalemo. Alaixu ukalui la apolo noxinge ne so alai ne Sipeni.

²⁹ Apolo noxinge la alavu lexe Kalaisiti ulosilo su'uli lailaixe.

³⁰ Laso tavivilo eni amasaxau lexe ngingi xavingengi so ngapilixileli noxou Mosinge no anu ualasou Tatananenge Iesua Kalaisiti. Ulenu Laixe molu u'avutinoxu opongengi so tange­ngixo axone. Laso nenge nenge'a oponenge vilesisi so tavikala noxou Mosinge.

³¹ Tavikala noxou so u'umeleli no avo'a tamitema ane ixililiou Mosinge Vaikalou ne Iutea. Xe tavikala noxou so lexe alai ne Ielusalemo la tamitemaou mu'isalili ne imasaxau su'uli aneva alosi'a.

³² Xo loxo imasaxau la eni a'osa ane. Ukalu xe loxo Mosinge umasaxau la eni ane'e noxinge mo nenge nenge'a taxolu sevile. Taxolu sevile so ama'ila mo amauli.

³³ Ioxe, eni apilixingengi noxou Mosinge so anu uxolu noxinge mo umamatolangengi. Vaikala ano'o maninasi.