Lomu 14 - Ata New Testament

Mamu so tavikalasi'a tavivinge masua

¹ Ioxe, ane'i tavivinge Mosinge ta'olu se'i ne lopala noxi'a pakia'u malaxo uasi. Ane'i opone'i tamei. Tavivinge axone ngato'omea no anu vaikala uasi, nga'oxo laixe noxi'a mo so ngoli'a ngaxolu ngapita. Ngaxolu ngapita la ngakusukusu'inge no anu vaikala ngato'o uasi.

² Ngakusukusu'inge uasi xo aloxo 'o. Tamitema ane opone'i tamei axone la i'oxo lexe mamu so i'ou posiposi. Ia ngingi ane lopala noxinge pakia'u la ngalavu lexe ani'ani ma'ia nga'ou ne la anu mi vitanisi.

³ Laso ngingi ane nga'ani'ani no anu mimi mukalusi la mamu so ngavikala masua noxi'a ane'i ane i'ou misoposi uasi. Xe ngingi ane nga'ou uasi la mamu so ngavikala masua noxi'a ane'i ane i'ou. Xo ngingi mukalusi ne Mosinge u'osasingesi.

⁴ Ane'i tavivinge ne, ane'i tamitemamengi so ngatilo­vosi'a uasi. Ane'i tamitemaou Tatananengesi ane. Anu mi noxousi lexe ane'i itulu pakia'a o ilapau. Ia ilapau avile uasi, xo anu molu utetelisi'a so itulu pakia'a ane.

⁵ Ioxe, mo vile aloxo 'ola. Ngingi se'i la opongengi ututuluou voxo se'i. Ngingi nga'itinu voxo loxo Voxo so Ma'ila o voxo so lavilelu lexe uua'ulixu voxo se'i. Ia ngingi se'i la opongengi lexe voxo mukalusi ne iou vilesisi. Ngingi vilevilesi ngailounu vote'isinge no anu mi anene. Mo ngatulu pakia'inge, opongengi uvaxa une'e uasi.

⁶ Xo itema ane usosovosou voxo lexe mutiatila, la anu tanuou Tatananenge so usosovosou axone. Xe itema ane ulavusou u'ani no anu mimi mukalusi, la anu tanuou Tatananenge no anu kalumo. Xo anu uvikalasou laixe noxou Mosinge kaio u'ou. Xe vile ne u'ou misoposi uasi, anu kalumo tanuou Tatananenge no anu. Xo ani'ani ma'ia u'ou ne anu uvikalasou laixe noxou Mosinge kalumo.

⁷ Xo aloxo 'o. Noxinge tamitema, umomomo so taxavutala lexe mauli noxinge ne mi na'a nengemo uasi. Mo taxavutala lexe soli noxinge mi na'a nengemo uasi.

⁸ Xo loxo tamamauli, la tamauli so taxalixu nene'axu masaxa noxou Tatananengesi. Xe loxo tasoli, la tasoli so mi ne kalumo. Laso ane, loxo tamauli o tasoli la nenge taxolu no avolu Tatananengesi.

⁹ Taxolu no avolu xo Mosinge musosovosou Kalaisiti so usoli mo umaulila. Musoli mo mumaulila so anu uxolu Tatanane'i tamitema ane isoisoli xe ane'i ane imamaulisio.

¹⁰ Ioxe, laso axova so ngingi se'i ngatilovosi'a tavivinge xe ngingi se'i ngavikalasi'a tavivinge masua? Xo ngalavu uasi lexe nenge mukalusi tatulu no laxunu Mosinge so utilovosinge?

¹¹ Xo loxo Mosinge vaikalaou mulemolu lexe, “Eni Tatanangengi a. Eni maulixo telexu uasi. Eni avikala manina e maninasi. Ili'i la tami­tema mukalusi ixolasou tava'a mo itangatuluilo. La no voxo anene ane'i ipitanu anaxa'a so i'itinu ualasilo lexe a Mosi'a a.”

¹² Mo no voxo anene nenge mukalusi tatulu no laxunu Mosinge. La nenge tavikala lamana noxou no anu mi ma'ia te'oxonu o telemolu o texavutalanu.

Nenge ta'oxone'i tavivinge so itulaki uasi

¹³ Laso avikala lamana aloxo 'o. Nenge tapilixinu ilixo so tatilo­vosinge ngato'o. Nenge tamulinu xavutala ane vile aloxo 'o. Nenge ta'oxonu mi vile so tavivinge itulaki no anu uasi. Latilovo ne laxu aloxo 'o. Loxo ane'i i'oxo lexe mi vile masua, la nenge ta'oxonu no ie'i uasi. Xo nenge masi tasoune'i so i'una no anu mi e ilemolu lexe masua ne.

¹⁴ Xo Tatananenge Iesua mulamananixu xavutalaxeli lexe ani'ani vile nuni'u no iou Mosinge uasi. Ia loxo tamitema se'i opone'i lexe ani'ani vile nuni'u la ane'i isusu loxo i'ou ane.

¹⁵ Laso loxo nga'ou la'ilali vile no ie'i tavivinge, xe loxo opone'i lexe anene masua no iou Mosinge, la ngingi ngalosi'a tu'umaxu ane. Mo axone la ngasexelaxa'a uasi ane. Xo ngingi nga'ou la ngaxamulinu lexe mi vile uasi. Ia tavivinge ne, anu Kalaisiti musolisi'a kalumo. Laso mamu so ane'i itavulenu tu'umaxusou la'ilalingenge.

¹⁶ Laso loxo la'ilali ane nga'oxo lexe laixe uxalixu vaikala masua, la nga'ou uasi.

¹⁷ Xo no voxo so Mosinge molu u'uli laxune'i tamitemaou la ta'oso'oso no anu mi aloxone uasi. Xo no voxo anene oponenge utulu no anu mi ma'ia so ta'ou o taiexu? E uasi. Nenge oponenge utulu no anu ilixo malemalenga mo xoluxolu lalavulusi mo osa'ila ane molu noxou Ulenu Laixesi.

¹⁸ Loxo ngingi ngamulinu ilixo axone mo nga'oxonu xaixai noxou Kalaisiti la Mosinge u'osasou. Mo tamitema imaisou ilixo noxinge axone lexe laixe.

¹⁹ Ioxe, laso nenge oponenge masi ututulu no anu ilixo laixe so uxalixu oponenge vilesisi. Mo nenge ta'oxonu pakia'inge ngato'o no anu lopala noxinge.

²⁰ Opo­ngengi ututuluou la'ilali uasi xo masi ngamamulonu xaixai noxou Mosinge. Manina, la'ilali mukalusi ne laixe so ta'ousi. Ia loxo nga'ou la'ilali no ie'i tavivinge ane opone'i uxililiou, la anu masua ane. Anu masua xo opongengi vilesisi so xaixai noxou Mosinge uasi.

²¹ Loxo nga'ou misoposi o ngaie uaini xe loxo u'oxone'i tavivinge itulaki, la laixe loxo nga'oxonu uasi.

²² Loxo ngingi se'i lopala noxinge pakia'u la ngingi masi nga'oxo lexe, “Ai, la'ilali ma'ia ne, eni a'ousi.” Anu laixe so opongengi utulu axonesi, uvaxa une'e uasi. Ia xavutala anene uxolu noxinge vilevilesi mo so Mosingesi ulavu­sou opongengi.

²³ Ia ngingi ane opongengi tamei mo tangengilili lexe la'ilali vile laixe so nga'ou o nga'ou uasi, la ngaxolusi. Nga'ou uasi, xo lopala noxinge utulu pakia'u no anu mi anene uasi. Xo telexu aloxo 'o. Mi ma'ia upolo va'axu no anu lopala, la anu susu ane.