Lomu 13 - Ata New Testament

Tamulinu vaikalaou xamani

¹ Ioxe, mo aloxo 'o kalumo. Ngingi mukalusi ngamulinu vaikalaou xamanisi. Nenge talavu lexe tamitema so i'uli laxunenge axone ixali vitanisi uasi, Mosinge molu mutulusi'a no anu xaixai anene.

² Laso itema aneva uxililiou vaikalaou xamani ne, anu uxililiou vaikalai'a tamitema ane Mosinge molu mutulusi'a. Mo axone la anu utavulenu tu'umaxusou.

³ Xe itema ane u'oxonu ilixo masumasua la oponu u'ume ane xo xamani masi ulosou tu'umaxu. Ia loxo ngingi nga'oxonu ilixo laixesi la mi vile so nga'umolu uasi. Xamani ulosinge tu'umaxu uasi, uvikalasinge laixesi.

⁴ Xo xamani ne Mosinge musoso­vosou so vote'isou su'ulisinge so xoluxolu laixe. Ia loxo nga'oxonu ilixo masua la ngamama'u xo xamani ne anu xavinu so ukolinu susu. Mosinge musosovosou so itema ane u'oxonu ilixo masumasua la anu uxalisou lakolisou no anu vote'i anene.

⁵ Laso tava'u tamei so ngamulinu vaikalaou xamani. Vile aloxo 'o. Ngamulinusi xo uasi, la ngaxalisou tu'umaxusou. Xe vile aloxo 'o. Ngamulinu xo ngatilo­vosou no opongengi mo ngaxamu­linu lexe anene masaxa noxou Mosinge.

⁶ Ioxe, anene tava'u kalumo so ngasu'anu takisi. Xo Mosinge musosovosou xamani so uvu'ulinu mi anene.

⁷ Laso loxo xamani usosovosou takisi axova la ngalomuxu mo ngasu'anusi. Ane'i ta'ei mitulu tatiatilasinge la ngata­xane'i mo ngalomuxa'a.

Nenge tasexelaxa'a tamenexinge

⁸ Xe no anu mi loxo lamoli o ma'ia la ngakolinu tina'ungenge mo so ukalu avile. Ia no anu mi vilesisi e so ngasexelaxa'a tamenexinge la anu umomomo so ukalu avile uasi. Xo itema ane usexelaxu menexu la umulinu mo umomoxu lo.

⁹ Xo lo muvikala aloxo 'o, “Ngingi ngalai­lai noxi'a tasema vitanisi uasi. Ngingi ngave'a tamitema isoli uasi. Ngingi ngapakali uasi. Ngingi ngaisu'isu uasi.” Ioxe, lo anene xe lo mose'ila uao, la vaikala vile musu'asou mukalusi aloxo 'o, “Ngingi ngasexelaxa'a tamene­xinge a loxo ngasexelangenge ne.”

¹⁰ Xo loxo itema usexelaxu menexu la anu umomomo so u'oxonu masua uasi, u'oxonu laixesi. U'oxonu menexu laixesi laso anu umulinu mo umomoxu lo ane.

¹¹ Eni epelototosinge axone xo aloxo 'o. Voxosinge a mune'e alai mukalu so Mosinge ulosinge mauli loloni. No voxo loxo telopala noxou Kalaisiti la voxo anene nopaxasio ia anu a usuku unene'e. A'oxonu latilovo aloxo 'o. Ngatulu mo iengi ukala xo olovoxo so ai mukalu.

¹² Olovoxo so ai mukalu xo lamana so uka. Laso ngingi ngapilixinu ilixo so isivoxo mo ngateteli no anu ane so lamana. Nga'oxo axone mo so ilixo so isivoxo uua'ulingenge uasi.

¹³ Ngingi masi ngamuamua'i ulovo loxo tamitema ane imua­mua'i no anu lamanasi, ngapakisi loxo ane'i so isivoxo uasi. Loxo ngaxolaxola mo ngasipaki uasi. Xe ngingi nga'oxonu vasimenge vuluvulusi mo ilixo nuni'u uasi. Xe nga'avutinoxu tu'umaxu mo ngaisu'isu uasi.

¹⁴ Nga'oxo axone uasi, nga'oxo aloxo 'o. Ngingi ngaxolu noxou Tatananenge Iesua Kalaisiti ane, laso opongengi ututulu no anu vaikalaou. Ngapili­xingengi no anu susu tava'u no vasimenge so ngamulinu masaxa no anu uasi.