Lomu 12 - Ata New Testament

Polu upelototo so xoluxoluxa'a Mosinge ta'olu

¹ Laso tavivilo, nenge tamaisou iaiama noxou Mosinge axone laso eni atama pakia'u noxinge aloxo 'o. Tamitema ilaixi'a tamisoposi so lexe noxou Mosinge. Ioxe, ngingi nga'oxo axone no anu vasimenge. Ngalosinge mo ngakalipalangengi lexe noxou u'isalili, xo anu u'osasinge ane. Ngaxolu nga'itinu ualasou no anu mauli noxinge.

² Mo ngingi ngamuamua'i loxo tamitema ane ixoxolu no isivoxosio uasi. Ngingi ngapilixingengi noxou Mosinge so anu uxiuxiunu xavuta­lamengi mo uxalixu alavua. Uxa­lixu alavua laso no anu xoluxolu noxinge ngingi ngamomomo so ngatilovosou masaxa noxou Mosinge. Mo axone la ngalavu no anu ilixo laixe mo ulapusi ane u'osasou.

³ Ioxe, Mosinge muiaiama noxilo mo musosovosilo so alanu vaika­laou. Laso apelototosinge ngingi mukalusi aloxo 'o. Ngingi vilevilesi nga'itingengi lexe ngingi talaixe noxi'a tamenexinge uasi. Ngingi menge ngatilovosinge laixe, xo lopala noxinge ne Mosinge molu mulosinge no anu masaxa noxousi.

⁴ Latilovo aloxo 'o. Nenge talavu lexe vasimenge pa'upa'usou tavu'alo. La pa'upa'usou ne anu xaixai no anu u'isa'isalili.

⁵ La anu axonesi nenge Mosinge ta'olu loxo vasimolu Kalaisiti. Nenge tavu'alo musuku ia noxou la nenge vilesisi xo nenge vasimolu pa'upa'usou ane.

⁶ Nenge vasimolu pa'upa'usou ne Mosinge muiaiama noxinge mo mulosinge lavulavu no anu xaixai iouiou. Mulosinge axone laso nenge vilevilesi ta'oxonu xaixai mupilixinu noxinge. Aloxo 'o. Loxo itema so pela'a la anu ulopala mo ulanu vaikala so pela'asi.

⁷ Loxo itema vile so su'uli la anu usu'ulisi. Xe loxo itema vile tisa so votovotoe la anu uvotovotosi.

⁸ Loxo itema vile so u'oxo pakia'a Mosinge ta'olu la u'oxonusi. Xe loxo itema vile so u'alauna la u'oxonu manina, utukala uasi. Xe loxo itema vile so u'uli laxune'i tamenexu la anu oponu utulu no anu mi nesi. Xe loxo itema so tanuxa'a tamenexu ane itavulenu tu'umaxu la anu u'osasou so u'oxonusi.

⁹ Mo aloxo 'o. Loxo ngasexelaxa'a tamenexinge la ngasexelaxa'a manina, ngakalavoi uasi. Xe ngamatapianu ilixo masua mo ngakamakulunu ilixo laixe pakia'u.

¹⁰ Mo ngamasaxa'inge ngato'o xo ngingi tavivinge ane. La ngingi vilevilesi ngalu'engengi io ngavi­kalasi'a tavivinge laixe.

¹¹ Mo ngapauxe no anu xaixai noxou Tatananenge uasi. Ngapilixingengi noxou Ulenu Laixe so u'avutini­xinge so xavingengiou xaixai anene.

¹² Ngaxolu opongengi ulu'e mo ngalopalanu voxo so osa'ila ili'i. Xe loxo tu'umaxu uxali la ngatulu pakia'ingesi. Mo opongengi ututu­lusi so ngavikala noxou Mosinge.

¹³ Loxo tamitemaou Mosinge u'isalili se'i i'a mimi o la'ilali uasi la ngapitanu avonge so ngasu'uline'i. Xe loxo taasila ixali la ngavu'uline'i laixe. Xe aitengasinge ukisi noxi'a tamitema mukalusi.

¹⁴ Mo loxo tamitema i'oxongengi masua la ngavikalasi'a noxou Mosinge so u'oxone'i laixe. Ani manina, ngalingau su'ulisi'asi, ngalingau mamulosi'a uasi.

¹⁵ Xe loxo tamitema i'osa la ngoli'a nga'osa ane. O loxo tamitema itama la ngoli'a ngatama.

¹⁶ Ilixo noxinge iou vilesisi noxi'a tamitema mukalusi. Nga'itingengi so ngaxi­xao noxi'a tamitema tatiatilasi uasi. Ngalu'engengi mo ngaxixaosi'a tamitema vitanisi kalumo. Mamu so nga'itingengi mo nga'oxo lexe, “Ai, eni amosou lavulavu a.” Nga'oxo axone uasi.

¹⁷ Xe aloxo 'ola. Loxo tamitema i'oxonu masua noxinge la ngako­linu no anu masua uasi. Nga'oxonu ilixo ane ulapu no ie'i tamitemasi.

¹⁸ Loxo ngingi vote'i la ngaxalixu tu'utu'umaxu uasi. Laixe loxo ngoli'a tamitema latala ngaxolu laixesi.

¹⁹ Ai tamaula, loxo tami­tema ilosinge tu'umaxu la ngingi ngatovonu so ngakolinu ilixo noxi'a uasi. Ngapilixinu noxou Mosinge so loxo anu molu la'iaxui'a la molu ukolinu. Xo tatei mikaukavunu Tatananenge vaika­laou aloxo 'o, “Lakolisou ilixo masumasua ne anu mi na'a xelisi, ne eni melo akolinu.”

²⁰ Anene mi noxou Mosinge, ia ngingi la nga'oxo loxo ulemolu no anu vaikalaou aloxo 'ola, “Loxo ulua­meni vile usolixu la na'itixu la'ilali. O loxo usoliou lexa la natauxou lexa. Loxo na'oxonu laixe axone la anu umailamulinu ilixo mu'oxonu noxine.”

²¹ Ngapilixingengi so ilixo masumasua uua'ulingenge uasi. Ngingi ngaua'ulixu ilixo masumasua no anu ilixo laixesi.