Lomu 11 - Ata New Testament

Ta'isilaeli utuxa'asi milopala

¹ Ioxe, eni atali'i aloxo 'o. Axova, Mosinge muxiunu tumalou noxi'a tamitemaou Ta'isilaeli avile? E uasi manina. Eni kalumo a Isilaeli a. Eni vile exali a ilusunu Apala'amu no anu laili noxou Peniamini.

² Ta'isilaeli ane'i tamitemaou Mosinge ane. Anu mulavusi'a tateimo, laso vaimomo 'o anu uxiunu tumalou noxi'a uasi. Xo ngalavusou vaikala pa'usou ane uxolu no lavukuou Mosinge e ua'aloxu Elaitia so oponu tu'umaxui'a Ta'isilaeli uasi? Xo anu mukalapusi'a mulai noxou Mosinge aloxo 'o,

³ “Uo Tatanaleli, ane'i mive'ave'a tapolopetimeni misoisoli mukalu. Mo tanitanixu navu so tamaxa'u mama'u ulai noxine ne ane'i mimamulonusi. La enisisi axoxolu 'o mo ane'i a imolo soli noxilola.”

⁴ Anu mukalapu axone ia Mosinge mukolinu lexe, “Uo nini­sisi uasi. Ane'i tamitemaxeli navasi'a loxo 7000 a ixoxolusio. Ane'i ne ixolasou tava'a so i'itinu ualasou Va'ali e mosi'a tamitema kalavoi uasi.”

⁵ Ioxe, tatei ne tamitemaou Mosinge utuxa'a mixolu, tasiauxa'a avile uasi. Mi ne mumulinu axone muxali vaimomo 'o kalumo. Mosinge muiaiama mo musosovosi'a tamitemaou se'i no taine'i Taiuta.

⁶ Tava'u so muso­sovosi'a ne no anu iaiamasi, mi so xaixai uasi. Xo loxo ukaline'i no anu xaixai laixe noxi'a la anene mi so iaiama uasi.

⁷ Ai, mi so tanengelili no anu. Xo mi ane Ta'isilaeli sasaie'iou so ino'u, ne ino'u to uasi. Ia ane'i anesi no taine'i loxo Mosinge muiloune'i, a mixalisou mi ne. Ia ane'i ane ino'u uasi ne, opone'i muxali pakia'usi.

⁸ Opone'i muxali pakia'usi laso muxali loxo ulemolu no anu Mosinge vaikalaou lexe, “Mosinge mupilixine'i so ie'i muvuvusi mo mixovulaulau. Ane'i ie'i umomomo so usaxi uasi mo sangali'a mutomu so ilomu uasi. Mi ne muxolu avile muxali vaimomo 'o.”

⁹ Xe Teviti mu'oxonu latilovo so ululusou mi ne kalumo aloxo 'o, “Ane'i opone'i ututulu no anu la'ilali tatila. I'oxonu laso ikalavoi lexe xoluxoluxa'a laixesi. Ia uasi, mi anenesi ne uoixa'a ane. Ane'i itulaki mo ilapau no taele la ixalisou nene'axu ilixo noxi'a.

¹⁰ Ane'i ie'i isivoxo mo isaxisaxi uasi. Mo ane'i ilanga xo itavulenu tu'umaxu tatila uxolu kaluxu uasi.”

Mosinge muiaiama noxi'a tamitema noale'ale

¹¹ Laso axova? Ane'i Ta'isilaeli mixiunu tumali'a noxou Mosinge laso anu mupilixine'i avileio? Uasi manina, xo aloxo 'o. Ane'i mima­tapianu pamauli noxou Mosinge laso muxali noxi'a tamitema noale'ale. Muxali noxi'a, ia anu so u'umenu noxi'a Ta'isilaeli avile uasi. Anu u'oxonu axone so ane'i imaisou xoluxolu laixe noxi'a tamitema noale'ale mo so ulapune'i.

¹² Laso talemolu aloxo 'o. No anu ilixo masua noxi'a Ta'isilaeli la anu muxalixu nene'axu laixe noxi'a tamitema noale'ale. Ioxe, loxo ili'i ane'i Ta'isilaeli ilopala xe ilivu noxou Mosingela, la nene'axu ulolutu musuku noxi'a tamitema no xale tuatuala.

¹³ Ioxe, eni Polu a. Eni avikala ulai noxinge ngingi tamitema so laili noale'ale. Mosinge musosovosilo eni aposeliou so axaxai no taingengi. Mo eni a'osasou xaixai anene misevile.

¹⁴ Xo aloxo 'o. Eni amasaxau lexe a'avutinoxu opone'i tatemanu tualasilo. Xo loxo imaisou nene'axu xaixai noxilo no taingengi la ane'i imasaxau kalumo. Mo loxo imasaxau la ane'i masi ixalisou pamauli kalumo.

¹⁵ Loxo ixalisou pamauli la laixe manina. Xo Mosinge mu'italone'i sevile io tamitema so xale tuatuala milivu noxou. Ia ili'i loxo u'osasi'ala, la anu iou vilesisi loxo itema ane musoli la umaulila.

¹⁶ Ioxe, latilovo vile aloxo 'o. Loxo ta'oxonu pileti mautunu vile la nenge talavusou tase'inu sevile so lexe noxou Mosinge. Ia pa'usou se nesi loxo noxou uasi. Xo pa'usou tase'ixu Mosinge axone, la usosovosou pileti mautunu loloni ne lexe noxou kalumo. Mo vile aloxo 'ola. Loxo ovu vile tava'u noxou Mosinge, la anu avo'avolu mukalusi ne noxou Mosingesi.

¹⁷ Ovu ne anu ovu olivi ane evile usaxila'u. Usaxila'u xe umaisou lexe avo'avolu se'i uxa­loxalo la uxotosou uxexe. Uxoto­sou uxexe la uno'u ovu olivi samele avolu. Uno'u ukalu la utoxosou no tanixu ane muxotosou muxexe. Utoxosou ne la anu uxolu mo tava'u ovu ne ulosou leme laixe.

¹⁸ La ngingi tamitema noale'ale ne, ngingi loxo olivi samele avolu ane Mosinge motoxosinge no anu olivi tava'u. Laso mamu so ngingi nga'itingengi lexe ngingi talaixe noxi'a avo'avolu se'i no ovu noxou Mosinge ne. Xo anu ovu tava'u ne uno'u lemexu noxinge uasi. Ngingi ngano'u leme no anu tava'u.

¹⁹ Ia ngingi masi nga'itingengi lexe, “Ai nexi talaixe a. Xo Mosinge muxexenu avo'avolu se'i e Ta'isi­laeli so nexi noale'ale tano'u tanixa'a mo tatoxo no anu ainu.”

²⁰ Ani manina, Mosinge muxe­xene'i, ia tava'u ma'ia? Xo ane'i ilopala uasi. Xe tava'u so ngingi ngaxolu no anu ovu vaimomo, xo ngelopalasi. Laso nga'itingengi uasi, ngamama'u.

²¹ Ngamama'u xo ovu avo'avolu maninasou e Ta'isilaeli mi'itine'i laso muxe­xene'i. Ia ngingi avolu samele loxo ngingi nga'itingengi la uxexengengi uasi? Uxexengengi ane.

²² Laso ngaxavutala laixe no anu ilixo noxou Mosinge. Xo tamitema se'i ne anu u'oxone'i laixe xe se'i ne ulosi'a tu'umaxu. Ngingi ngalopala laso anu u'oxongengi laixe. Ia ane'i ane ilopala uasi, la ulosi'a tu'umaxu. Laso ngaxavutala laixe xo loxo ngingi laili noale'ale ngaxiunu tumalinge no anu lopala noxinge la anu uxotongengi ngaxexe kalumo.

²³ Ia axova noxi'a Ta'isilaeli e muxexene'i tei? Loxo ili'i ane'i ixiunu opone'i mo ilopala, la umomomo so utoxosi'ala? Ia xo ma'i, anu umomomo ane. Anu uno'a mo ulivunixi'a itoxo no anu ainula.

²⁴ Xo aloxo 'o. Ngingi tei ne muno'inge no anu ovu olivi samele. Mo anu mune'e mo mutoxosinge no anu ainu iou vile ane usaxila'u. Anene aingengi ulovo uasi. Laso axova no anu avo'avolu ane muxexenu tei? Anu ialuxu noxou uasi. Anu uno'u mo ulivunoxu no anu ainu xo anene tanixu mu'isalili.

Mosinge upala'anixu iaiama noxou no ie'i tamitema latala

²⁵ Ioxe tavivilo, eni amasaxau apala'anixu mi vile masi utalume­ngengi. Alemolu so ngingi nga'iti­ngengi no anu lavulavu noxinge uasi. Vaikala anene aloxo 'o. Vaimomo 'o Ta'isilaeli tata'eisi ilopala noxou Tatananenge. Ia tavu'alo noxi'a ne opone'i pakia'u mo ilopala noxou uasi. Ane'i ixolu axone xo ano'o voxosinge tami­tema noale'ale so ngalopala. Ulai ulai xe loxo navasinge umomo­moe, laso anu ane. No voxo anene ane'i Ta'isilaili tapiena ilivu mo ilopala noxou Tatananenge.

²⁶ La no anu vote'i anene la Ta'isilaeli latala ixalisou pamauli. Xo no anu Mosinge vaikalaou muvikala aloxo 'o, “Mosou su'uli molu ne Saioni une'e. Anu une'e so usu'uline'i ta'ilusunu Iakovo. Usu'uline'i so italo no anu ilixo anene so ixililiou Mosinge.

²⁷ No voxo anene eni axalixu nene'axu konitalaki noxilo noxi'a. Eni aiasou susu noxi'a avile.”

²⁸ Laso nenge tavikalasi'a Ta'isi­laeli aloxo 'o. Ane'i mixiunu tumali'aou Vaikala laixe so Tata­nanenge Iesua. Xe no anu vote'i anene la ngingi noale'ale ngexa­lisou nene'axu laixe xo pamauli muxali noxinge. Ane'i mixililiou Vaikala anene ia Mosinge upili­xine'i avile uasi. Xo anu usexe­laxa'a noxi'a ta'ilusune'i e Apala'amuena.

²⁹ Xo aloxo 'o. Loxo Mosinge u'avalou itema vile mo uvavalima noxou so lexe ulosou mimi laixe la anu umomomo so uxiunu oponula uasi.

³⁰ Ioxe, tei la ngingi noale'ale ngelomuanu vaikalaou Mosinge. La vaimomo ane'i Ta'isilaeli i'oxo axone. La no anu vote'i anene la Mosinge mupala'anixu iaiama noxou noxinge.

³¹ Vaimomo 'o ane'i ilomuanu, ia ulai ili'i la ane'i ixiunu opone'i mo ilopala. Laso anu ane. No voxo anene la ane'i ixalisou iaiama aloxo ngingi ngexalisou 'o.

³² Anu Mosinge u'oxo axone. Anu uxolu uxo­maienge xo xe tano'u lavulavu lexe susu musakinenge mo nenge vote'i vile uasi. Talavu axone mukalu laso anu upala'anixu iaiama noxou noxinge avile.

Ta'itinu ualasou Mosinge xo lavulavuou misevile

³³ Ai takuluke manina. Lavula­vuou Mosinge mulolutu mo mu'asi'asi musuku. Nenge taxa­lisou tava'u axova? Tamulinu tamulinu la anu loxo lautu misevile, taxalisou laxu avile uasi.

³⁴ Xo loxo ulemolu no anu vaikalaou lexe, “Ena'ei mulavusou xavutalaou Tatananenge mukalu? Xo axova, itema vile mulosou lavulavu?

³⁵ Xe evile ulosou Mosinge mi vile laso anu ulotonu so ukolinu? E uasi manina.”

³⁶ Anu anusisi tava'u mimi mukalusi. Mo xo anu uxoxolu laso maixene mimi uxoxolu 'o. Manina misevile, mimi mukalusi ne uxoxolu so u'oxonu ualasou utilasi. Laso nenge kalumo taxolu ta'itinu ualasou ulai ulai utalo uasi.