Lomu 1 - Ata New Testament

Polu muvikala aso noxi'a Talomu

¹ Eni Polu a. Eni amitema so xaixai noxou Kalaisiti Iesua. Anu molu mutulusilo so axali aposeliou mo musosovosilo so alanu vaikala laixe noxou Mosinge.

² Vaikala ne tatei Mosinge muvavalimasou no anu anaxa'a tapolopetiou. Vava­lima ne mikaukavunu mo a uxoxolu no anu vaikalaou male­malenga.

³ Vaikala laixe ne, so upala'anixu Olu. Anu Olu ne, anu itema manina xo anu ilusunu Teviti.

⁴ Mo anu Mosinge Olu manina kalumo xo Ulenu Laixe mupela'ingexu no anu xavi noxou. Mupela'ingexu no anu vote'i e so mutulusou mu'umenu Iesua Kalaisiti anu Tatananenge no anu soli.

⁵ Laso tava'u so Mosinge mutulusixe ta'aposeliou ne, a no anu iaiama noxou Olusi. Mutu­lusixe so tapitane'i tamitema noale'ale no anu ualasou Iesua, mo so ilopala noxou mo imulinu vaikalaou.

⁶ Mo ngingi ne, ngingi pa'usou noxi'a ane'i ane tepitane'i lexe tamitemaou Iesua Kalaisiti.

⁷ Laso lapasi ano'o ulai noxinge ngingi Talomu ane Mosinge muse­xelangenge mo mukalipalangengi lexe noxou mu'isalili. Masaxa noxilo lexe ngingi ngaxa­mulinu iaiama mo mamatola noxou Mosinge anu Maminge xe Tatana­nenge Iesua Kalaisiti.

Polu oponu mutulu lexe umaisi'a Talomu

⁸ Ioxe, tei la avikalangengi aloxo 'o. A'alo so lopala noxinge a muxali no xale xale tuatuala mukalusi. A'alo anene muxali noxilo laso a'itinu Mosinge no anu ualasou Iesua Kalaisiti.

⁹ Eni asexelaxu Mosinge misevile mo xavileliou xaixai mulosilo. Xaixai anene so alanu vaikala laixe so Olu. Anu ulavusou opoleli lexe ututulu noxingesi.

¹⁰ Opoleli ututulu noxinge so apilixingengi noxou. Mo alavusou avikala noxou aloxo 'o, “Mosilo, alaxu tavu'alo e'oxo lexe alai noxi'a Talomu, ia mimi se'i mutanuxo. Ia loxo nini nemasaxa la na'oxonu vote'isilo so alai noxi'a.”

¹¹ Avikala noxou Mosinge axone xo amasaxa manina lexe amai­singe. Xo iaiama ane Ulenu Laixe mu'oxonu noxilo la amasaxau lexe avulunu noxingela. Mo so axone la ngingi pakia'inge.

¹² Ia mi ne, enisisi uasi. Nenge nenge'a ta'oxonu pakia'inge no anu lopala noxinge ngato'o.

¹³ Xo tavivilo, eni amasaxau ngalavu laixe lexe alaxu tavu'alo atovonu so ane'e noxinge. Ia mimi mutanutanuxo to'. Atovo ane'e noxinge so lexe xaixai noxilo uxalixu nene'axu no taingengi. Xo no anu tuatuala elai no anu la nene'axu muxali axone noxi'a tamitema noale'ale.

¹⁴ Mosinge musosovosilo so alanu vaikalaou, laso mamu so a'apisou noxi'a tamitema se'i. Mamu so a'apisou noxi'a Takiliki o noxi'a ane'i Takiliki uasi. Xe noxi'a tamitema so lavulavu o tamitema so lavulavu uasi.

¹⁵ Laso maixene opoleli uauavutinge so aa'aloxu vaikala laixe noxinge Talomu kalumo.

Vaikala laixe ne xavinu

¹⁶ Eni amama'u so alanu vaikala laixe ne uasi. Xo anene vote'i so xavi noxou Mosinge so upamau­line'i tamitema ane'i ane ilopalanu. Anene vote'i so Taiuta xe tamitema noale'ale kalumo ixalisou pamau­lisi.

¹⁷ Xo no anu vaikala laixesi Mosinge upela'ingexu vote'i so anu umoxo'inge lexe nenge tamale­malenga. Vote'i ne so talopala mo ta'italonengesi. Anu ane, vote'i anenesi. Xo no anu vaikalaou Mosinge uvikala lexe, “Loxo tamitema ipilixine'i mo ilopala no anu vaikalaou, la Mosinge umo­xo'a lexe ixoxolu tamalemalenga avile.”

Tamitema latala mixiunu tumali'aou Mosinge

¹⁸ Ia nenge talavu lexe Mosinge uxolu no tualasou laixe mo oponu sixulaou susu mo ilixo masua noxi'a tamitema. Mo anu la'ia noxou ne, anu uxalisi'a, xo ane'i itanuxu vaikala manina noxou no anu ilixo masua ne.

¹⁹ Xo ilixo noxou Mosinge a uxoxolu no ie'isi xo anu molu mupala'anixu noxi'a.

²⁰ Ilixo noxou mupala'a, musoko'u no anu mi ne mukoinu mimi mukalusi mo muxali vaimomo 'o. Mo aloxo ne, la anu mupala'anixu xavi kaluxu uasi noxou xe ili'ilixo noxou u'isalili. Laso tamitema saexa'a uxolasi xo mimi ane muxalixu a uxolu no ie'isi.

²¹ Mo aloxo 'o. Ane'i ilavusou Mosinge ia i'itinu ualasou uasi mo ivikala laixe noxou uasi. Laso xavutala noxi'a muxovulaulausi mo opone'i isivoxosi.

²² Ane'i i'itine'i lexe lavulavu noxi'a tatila. Ia uasi, ane'i kisi'a mutomusi.

²³ Anu Mosinge ne ilixo noxou iaxusi mo kaluxu uasi ia tamitema itoxu uasi. Ane'i i'oxonu lakolisou Mosinge maninasou la ipuinu mi loxo itema vitanisi o ngiala o misoposi o sineke so i'itinu.

²⁴ I'oxo axone, laso Mosinge upilixine'i so imulinu masaxa masumasua noxi'asi. Mo utotomu ane'i ipita so i'oxonu susu no anu vasime'a ngato'o.

²⁵ La vaikala manina noxou Mosinge ne ane'i ilomuxu uasi, ikolinu no anu kalakalavoisi. Ane'i i'itinu mimi se'i so mosi'a, ia Mosou mimi ne ane'i ixiunu tumali'a noxou. Ai manina misevile, loxo nenge ta'oxo laixe, la ta'itinu ualasousi. Ta'itinu ulai ulai utalo uasi.

²⁶ Ioxe, ane'i mixiunu tumali'a noxou axone, la anu upilixine'i no anu masamasaxa ukilikalu noxi'a. Ane'i tasema kalumo imulinu ilixo laixe so taula'i uasi, imulinu ili'ilixo iou vilemo.

²⁷ Xe tamulu kalumo i'italonu ilixo laixe so itaula'ixa'a tasema. La navu u'ani no tane'i so imasaxai'a ngato'o. Ane'i tamulu ne i'oxonu ilixo ukilikalu noxi'a ngato'o. Laso maixene ixalisou lakolisou ilixo ne tu'umaxu.

²⁸ Mo aloxo 'o. Ane'i itaxanu lavulavui'a so Mosinge uasi, laso anu u'italone'i so imulinu xavutala masua noxi'a nesi. Mo i'oxonu ili'ilixo ane ulovo uasi manina.

²⁹ Ili'ilixo masua iouiou ne aloxo 'o. Ane'i iisuisu xe ive'ave'a tami­tema isoisoli xe i'oto'oto xe ixalixu tu'utu'umaxu xe ikalavoi xe ito'o­to'ome'a no anu vaikala xe imunu­munxa'a ngato'o.

³⁰ Ane'i ilavusou ikalavoisi'a tamenexi'a xe imata­pianu Mosinge xe itaxane'i tatia­tilasi'a uasi xe itoxa'asi xe ixalixu ili'ilixo alavua masumasua xe utotomu ilomuxa'a tamami'a oli'a taneni'a uasi.

³¹ Mo ane'i ixolaxola mo loxo ilemolu mi vile la imulinu uasi. Ane'i isexelaxa'a ngato'o uasi xe mi ma'ia imasaxau la ino'usi. Tane'ixa'a tamenexi'a uasi.

³² Xe ane'i ilavusou lo malemalenga noxou Mosinge lexe lakolisou ilixo anene solisi. Ilavusou ia ane'i opone'i ututuluou mi aloxo nesi. Opone'i ututuluou, xe kalumo la i'itinu ualasi'a ta'ei loxo imulinu ili'ilixo anene.