Kolosi 3 - Ata New Testament

Ta'ei ane oli'a Kalaisiti misoli la oli'a mitulu kalumo

¹ Ioxe, Mosinge mutulusou Kalaisiti no anu soli la ngingi ngoli'a ngetulu ne. Laso opongengi u'oxoxu mimi ane so teiteximo. Xo teitexi ne, Kalaisiti a utalupexa no anu sia kingi noxou no anu Mosinge avolu tema.

² Tangengi utuluou mimi teitexisi, mamu so xavutalamengi uiave­iaveou mimi so lialiasi.

³ Xo ngingi ne ngesoli ane, laso mauli noxinge a uxolu utalume nonano noxou Kalaisiti mo a ngapita noxou Mosinge.

⁴ La mauli noxinge maninasou a noxou Kalaisitisi. Laso no voxo so upala'a avile la ngingi kalumo, xo ngingi ngoli'a Kalaisiti ngapala'a no anu xolu­xoluxu iaxu.

Tamitemaou Mosinge ixolu no anu mauli alavua

⁵ Laso ngavau masamasaxa no anu vasimenge so lialia usoli. Mimi loxo ilaixu vasime'a vitanisi xe ili'ilixo nuni'u xe opone'i u'ela xe opone'i usoliou susu xe isu'isu. Xo no anu isu'isu ne, oponenge ututuluou mi vile xo mole uxali loxo mosinge kalavoi.

⁶ Mimi anene la Mosinge oponu la'iaxuou mo a mulalaxi so ukolinu.

⁷ Anu tatei la muamua'i noxinge axone xo mimi nesi mupamuxanu xoluxolu noxinge.

⁸ Ia vaimomo 'o ngapilixinu ili'i­lixo masua loxo la'ia mo xalo u'ela mo opongengi sixula mo ngapupui mo ilixo so vaikala nuni'u ula no anangenge.

⁹ Xe ngakala­voingengi ngato'o mamu xo ili'ilixo so susu tava'u no vasi­menge a ngexexenu ne.

¹⁰ Nge­xexenu ka ngetelonu mauli alavua. Mosinge mukoi­ngengi ngexali tamitema ta'alavua axone mo a uxiuxiungengi so ngaxali ta'ala­vuala. U'oxongengi axone so ngaxali loxo anu molu mo lavulavu noxinge sou ulomotelesi.

¹¹ Nenge mukalusi texali ta'ala­vua laso mi vile so ukali­palanengela uasi. Nenge taxavutalanenge lexe nenge se'i Takiliki xe Taiuta o ane'i so sosovo xe ane'i so sosovo uasi xe tokipelesi iouiou xe ane'i no anu lailaili o tasilevi xe ane'i ane ixolu lalavulusimo uasi. Mimi so ukalipalanenge axone la uasi xo nenge mukalusi taxolu noxou Kalaisiti mo anu a uxolu nonano noxinge mukalusi.

Laixe so Mosinge ta'olu ixolu no anu sexelasi

¹² Tamitema ane Mosinge mui­loune'i mo mukalipalane'i lexe tamitemaou ane usexelaxa'a, a ngingi to ne. Laso nga'oxo ilixo aloxo 'o. Tangengingenge ngato'o mo nga'oxonu alaunasinge mo ngalu'engengi mo opongengi lexa mo opongengi u'avuti noxi'a tamenexinge palea uasi.

¹³ Loxo tamenexinge isusunixinge la ngata­vulenusi mo ngalu'enu opongengi noxi'asi. Ngaiasou susu noxinge ngato'o axone xo Tatananenge muiasou susu noxinge ne.

¹⁴ Ia mi ane mu'uli'uli no anu ilixo laixe ano'o mukalusi a sexelasi. Xo mi e lailaixe so uteinixinge ngapita opongengi vilesisi anesi.

¹⁵ Mo ngapilixingengi mo so xoluxolu lalavulusi noxou Kalaisiti upamu­xanu opongengi. Xo anene tava'u so Mosinge mu'avalinge ngepita no anu vasimolu Kalaisiti. Mo ngaxolu no anu osa'ilasi.

¹⁶ Xe nga'ita­longengi so vaikalaou Kalaisiti uxolu upalava no tangengi. La ngingi vilevilesi ngavotongengi mo ngapelototo­singe ngato'o no anu vaikala mu'asi'asi. Xe ngalexenu lexe no anu Lavuku so Lexelexe mo lexe ane so u'itinu Mosinge ualasou mo lexe ane Ulenu u'avutinoxu no opongengi so ngavikala laixe noxou Mosinge.

¹⁷ La no anu mi ma'ia ngalemolu o nga'oxonu la no anu ualasou Tatananenge Iesuasi. Mo no anu ualasousi la ngavikala laixe noxou Mosinge anu Maminge.

Pelototo so xoluxolu no anu pamili

¹⁸ Ngingi tasema, ngalu'engengi so ngaxolu no laxa'a tamulumengi xo anene ulovou masaxa noxou Tatananenge.

¹⁹ Xe ngingi tamulu, ngasexelaxa'a tasemamengi mo mamu so opongengi sixulai'a.

²⁰ Xe ngingi tamolomolo, ngalo­muxu vaikalai'a tamaminge tane­ninge no anu mimi mukalusi, xo anene Mosinge u'osasou manina.

²¹ Ia ngingi tamami'a, la mamu so ngakusukusu'a ta'ilinge xo mo la'ia u'avuti no opone'i. Xo loxo 'o io i'oxo lexe, “Uo, eni amomomo to uasi.”

Polu mupelototosi'a tamitema so xaixai oli'a tavosii'a

²² Mo aloxo 'ola. Ngingi ane ngaxolu tasilevi la ngalomuxu vaikalai'a tavosimengi no anu mimi mukalusi. Xe mamu so ngaxaxai laixe no ie'i so ngaxi­lisine'i no anusi. Ngamama'u noxou Tatananenge mo ngamolo tangengiou vote'i so nga'oxonu xaxai noxinge laixe utotomusi.

²³ No anu xaixai noxinge aneva la xavingengiou avilesi xo no opongengi la ngalavu lexe ngaxaixaisi'a tamitemasi uasi, ngaxaxaisou Tatananenge ane.

²⁴ Mo mi so tangengiou aloxo 'o. Ili'i la Tatananenge ulosinge lapemenge no voxo loxo uvelu­velunu mimi lailaixe e musoso­vosou lexe noxi'a tamitemaou. Xo ngingi ngaxolu tamitema so xaixai noxou Kalaisiti, xe anusi a Vosimengi manina.

²⁵ La itema ane ususu la uxalisou nene'axu ilixou masua ne, xo Mosinge utilovosi'a tamitema mukalusi no anu vote'i vilesisi.