Kolosi 2 - Ata New Testament

Pelototo lexe Takolosi ixolu pakia'a no anu lopalasi

¹ Ioxe, eni amasaxau ngalavu lexe eni sasaieli manina no anu su'ulisinge ngoli'a tamitemaou Mosinge no taoni Laotisea, xe ane'i mukalusi ane ngoli'a ngalavusou ieli uasi.

² A'oxo axone mo so u'oxo pakia'u tangengi xe so sexala uteinoxu opongengi upita vilesisi. Eni amasaxau lexe ngapalava no anu lavulavu mo so mi vile u'oxonu opongengi uvaxa une'e uasi. Xe ngalavu manina no anu mi e Mosinge mutalumeu ka mupa­la'anixu 'o. Mi e anu Kalaisiti molu.

³ Xo vaikala mo lavulavu mu'asi'asi mukalusi uta'olu noxou Kalaisiti aloxo itema mimiou lailaixe mo lamoliou uai utalume no anu kesisou.

⁴ Eni alemolu vaikala aloxo 'o xo mamu so itema vile une'e ulemolu vaikala ane tamaxu lailaixe ia so u'oxo lolongenge no anusi.

⁵ Xo manina, eni exolu nopaxa noxinge aloxo 'o ia taleli a uxolu noxinge ne. Laso eni a'osa so amaisou xaixai noxinge ulovosi mo lopala noxinge pakia'u noxou Kalaisiti.

Tava'u mauli manina a noxou Kalaisitisi

⁶ Ioxe, ngingi opongengi mukasou Kalaisiti Iesua lexe anu Tata­nanenge, laso ngamuamua'i no anu masaxa noxoumo.

⁷ Ngatulu pumungenge noxou aloxo ovu uli'u usili mo uteteli no lia. Xe tava'u lopala noxinge noxou so ngaso­losolonu aloxo itulusou tani no anu tava'u so utelai. Mi ne nga'oxonu aloxo votovoto ane ngexalisou mukalu mupela'ingexu mo ngaxolu opongengi uana'ana no anu osa'ilasi.

⁸ La ngalaxa'i laixe xo loxo 'o io evile masi ukalavusungengi no anu lavulavu noxi'a takeleva mo vaivaikala ane temanu uasi. Tamitema ane xo ne ilomuxu vaikalaou Kalaisiti uasi. Ane'i ilavusou imulinu ilixo noxi'a tatiatila tatei xe pakia'a no anu mimi tavatava'u so upamuxanu xoluxolu so lialiasi.

⁹ Ia loxo Kalaisiti, anu muxali itema aloxo nenge 'o, io temanu xoluxoluxu Mosinge loloni a uxolu noxou.

¹⁰ Laso ngingi ngaxolu noxou la ngexalisou mauli loloni. Xe anu la u'uli laxune'i tami mukalusi ane xavine'i mo ualaua­lasi'a.

¹¹ Mo aloxo 'ola. No anu vote'i e so ngepita noxou la ngexalisou sosovo no anu vasimenge. Ia sosovo ano'o ne anu muxali no avo'a tamitema uasisi. Sosovo maninasou 'o ngexa­lisou noxou Kalaisiti xo no anu xaixai noxou la mukalipalanenge no anu xavinu susu tava'u no vasimenge.

¹² Xo ngingi ngekelele ngepita noxou Kalaisiti laso no voxo so mi'asixu la anu loxo ngingi kalumo ngeai ne. Xe ngelopala no anu xaixai noxou Mosinge so mutulusou Kalaisiti no anu soli laso anu loxo ngingi kalumo ngetulu ngemauli.

¹³ La tei ngexolu no anu solisi xo no anu susu ilou susu tava'u no vasimenge ane mupamu­xangengi nesio. Ia Mosinge mutulusinge ngemauli xo mupita­ngengi noxou Kalaisiti loxo mutulusou. Anu mukalusou tina'u­nenge so susu mukalusi.

¹⁴ Xo kaukavu muxolu so mulemolu lavuloto mukalusi ane texolaxola'u. Ia tina'unenge xe lavuloto e mulemolu mamulosinge ne anu muiasou mo muxexenu avile xo anu loxo mulililinu no ovu valautusi.

¹⁵ Mo kalumo anu mukalusou xavi noxi'a tami ane xavine'i mo ualaualasi'a. Xo no anu vote'i e so Kalaisiti mulili no ovu valautu la Mosinge mupala'anixu lamana lexe muua'ulixa'a tami ne avile.

Ta'ei ane oli'a Kalaisiti misoli la mikalipala no anu lavuloto

¹⁶ Laso mamu so itema vile upamuxangengi no anu lavuloto so lexe nga'ou o ngaiexu mi ma'ia xe so voxo tatila so lalotu mo lavilelu so so'io alavua mo no anu Voxo so Ma'ila.

¹⁷ Xo mimi anene anu loxo xalexu mi ane so uxali ili'isi. Ia temanu manina a noxou Kalaisitisi.

¹⁸ Mo loxo evile u'itinu no anu mi vile u'oxo lexe umaisou no anu aisaxi ka uvikala lexe ngalu'e­ngengi mo ngamaxa'u mama'u noxi'a ta'angelo la mamu so ngalomuxu. Itema loxo umalo­xo'inge axone la anu umulinu xavutala no anu vasimolusi so u'itinu vitanisi axone.

¹⁹ Tami­tema ane xo ne itoxo laixe noxou Kalaisiti uasisi. Xo anu kisinge manina mo ani'aninenge molu a noxousi. Xe noxousi, la vasimolu pa'upa'usou utoxo laixe no anu vo'uvo'uxu, mo uleme no anu lemexu ane molu noxou Mosingesi.

²⁰ Ngingi ngesoli no anu soli noxou Kalaisiti mo ngekalipala no anu mimi tavatava'u so upa­muxanu xoluxolu so lialiasi. Laso tava'u axova so muamua'ingenge aloxo ngingi tamitema so lia­liasio? Mo axova so nga'i­talongengi ka ngalomuxu lavuloto ane uvika­langengi aloxo 'o,

²¹ “Mi ne ngalaisou mamu. Mi ano'o nga'ou uasi. Mi olele ngakasou uasi.”

²² Lavuloto mo pelototo ane xo ne anu mi noxi'a tamitemamo, xo anu uvikalasou mimi ane tano'u ka upalea ukalusi.

²³ Xo manina, lavuloto ane xo ne usaxi lexe anu so ulosi'a tamitema lavulavu no anu vote'i so ilotusi xe ilu'ene'i vitanisi xe me'a i'oki'okinu vasi­me'asi. Ia lavuloto ane xo ne usu'uli sevile uasi so ukalusou masaxa no anu vasi­menge.