Iuti 1 - Ata New Testament

¹ Eni Iuti a. Eni amitema so xaixai noxou Iesua Kalaisiti mo eni avimou Tiemisi a. Eni akaukavunu lapasi ano'o ulai noxinge tami­tema ane Mosinge molu mu'ava­linge. Ngingi ne Mosinge anu Maminge usexelangenge misevile xe Iesua Kalaisiti a u'oxo lato­losinge.

² Eni amasaxau lexe alauna xe xoluxolu lalavulusi xe sexela uleleme mo ulolotu no anu mauli noxinge.

Tamosou e mixililiou vaikala manina mipakisi mi'una'una no anu pita

³ Ioxe tamaula, eni opoleli mutu­tulu lexe akaukavu ulai noxinge so usu'ulinu xavutalamengi no anu pamauli ane nenge nenge'a texa­lisou mukalu. Ia examulinu lexe eni masi akaukavunu vaikalasou ngiou vile aloxo 'o kalumo. Amasaxau a'avutinixinge so ngasoa pakia'u mo ngautululunu lopala na'a nenge. Vaikala so lopala anene Mosinge mupilixinu loloni noxinge tamite­maou mu'isalili mo ili'i la uxiunu o usolonu no latanu la uasisi.

⁴ Xo tamitema se'i a mipakisi mi'una'una noxinge ne. Tamitema ane xo ne sosovo so mamulo muxolu noxi'a tateimo xo ixiunu tumali'aou ilixo noxou Mosinge. Ane'i ipilixine'i no anu ilixo masumasua iouiou kaio ixiunu vaikala so iaiama noxou Mosinge so ivalaxu ilixone'i ne. La ixiunu tumali'aou Tilasinge mo Tatananenge vilesisi e Iesua Kalaisiti.

⁵ Mi se'i aloxo 'o ngelavusou mukalu ia alemolu so tange­ngioula. Tatei Tatananenge mupa­mauline'i mo mu'umene'i Ta'isilaeli no xale lia ne Isipi, xe ili'i la mumamulone'i ane'i tanoxi'a ane ilopalanu uasi.

⁶ Xe loxo ta'angelo leviani la miua'ulixu lamakisou xavi noxi'a xe ixolu se'isisi no anu tanixa'a u'isalili uasi, mia'alasou. Laso Tatananenge muloilokisi'a no anu seni ane uxolu kaluxu uasi so ixolu ikalavusu no anu isivoxo xo mo voxo tatila so tilovo olele uxali.

⁷ Mo aloxo tatemanu taoni ne Sotomu xe Xomola xe taotaoni no pa'ume'a. Ilixone'i iou vilesisi loxo ta'angelo to ne xo milaixu vasime'a no anu susu ane nuni'u mo iou vilemo manina. Laso Mosinge mumamulone'i no anu navu ane uxolu kaluxu uasi mo so ulosoie'i tamitema mukalusi lexe anene lakolisou ilixo axone.

⁸ La anu axonesi noxi'a tamitema ane mipakisi mi'una no taingengi ne. Xo ane'i iai isaxi la u'avutinoxu opone'i so i'oxonu mimi nuni'u iouiou no vasime'a. Xe tamitema ane xo ne ixililiou xavi noxou Tatananenge so u'uli laxune'i. La ane'i imama'u uasi, ilemolu vaikala so pupuiaxi noxi'a ta'angelo e xavixavine'i musuku so tualasou Mosinge.

⁹ Ane'i i'itine'i manina ane, xo tila manina noxi'a ta'angelou Mosinge e Maikeli ulemolu vaikala so upupuiou Uluaou to uasi. No voxo loxo Maikeli ilou Uluaou mipelesou anaxa'asou Mosisi vasimolu la Maikeli mumama'u so ulemolu mamulosou Uluaou. Anu muvikala noxou aloxo 'osi, “Tatananenge molu ulavixenexu vaikalameni ne.”

¹⁰ Tamitema ane xo ne ilavusou ivikala masuaou mi ma'ia upalasi noxi'a uasi. Ane'i ne xavutali'a uasi aloxo tamisoposi xo masaxa ma'ia no anu vasime'a la imulinusi. Imulinusi xo mole mi e i'oxonu ne uxalixu mamulosi'asi.

¹¹ Anu uxali masua manina noxi'a. Xo mipolo no anu vote'i e noxou Kaini. Xe xavutali'a no anu lapesi laso mivaxasi mipita no anu susu noxou Valamu. Xe mi'oxo pai noxou Mosinge aloxo Kola mu'oxonu laso ixalisou mamulo­sou iou vilesisi loxo anusi.

¹² Ngingi ngapita nga'ani so ngamaxa'u sexelasinge ngato'o ia loxo tamitema ne i'una no anu la imama'u uasi, ane'i ixalixu loxo pati mole anu mi nuni'u moe. Ane'i opone'i ututulu so ixalisou mi ma'ia imasaxausi. Ane'i loxo sauma ane sivo utavulenu vitanisi, anu uxali ia ulosinge uali uasisi. Ane'i loxo ovu ane utavulenu nene'axu no anu voxosou uasi laso mauli no anu uasisi, anu loxo usolisi. Xe loxo tamitema imaisou unene'a uasi la iluvunu usu'asi, laso ane, soli tameisou uxalisou ne.

¹³ Ane'i loxo xasi ane uxolaxola upaxelelesi. La ilixone'i ane laixe so imailamulinu ne upala'a no tani keakeasi aloxo livilivi upala'a no luaki. Ane'i loxo tataoto imulinu vote'isi'a u'isalili uasi, ixixao vitanisi. Laso maixene Mosinge mulalaxinu tanixa'a no anu isivoxo e tamokikisi so ixolu no anu kaluxu uasi.

¹⁴ Ioxe, musko'u noxou Atamu xe mulu'e muxali no anu lasilili 7-sou la itema e Inoki muxali no anu. La anu mulanu vaikala so pela'a si'a tamitema tamasua anene. Xo muvikala lexe, “Eni emaisou Tata­nanenge oli'a ta'angelo talaixe tauseni tavu'alo mine'e.

¹⁵ Mine'e so anu utilovosi'a tamitema muka­lusi kaio ulemolu mamulosi'a tami­tema ane mixililiou ilixo noxou Mosinge mo milai no anu vote'i ane u'osasou uasi. Xe so ukolinu vaikala masumasua tamitema so susu ne milemolu so ixililiou Mosinge.”

¹⁶ Ane'i to ne tamosou kalapu xe mi ma'ia uxalisi'a la imunumunuxa'a tamenexi'a no anu. Mo masaxa masua no anu vasime'a loxo uxali la imulinusi. Ane'i ivikala vuluvulusi so i'itine'i xe loxo imasaxau mi ma'ia noxi'a tamitema la ilavusou ito'omolu kusine'ixu tosi.

Pelototo lexe Mosinge ta'olu ixolu opone'i pumuxusi

¹⁷ Ia tamaula, loxo noxinge la tangengiou vaikala ane ta'apo­seliou Tatananenge Iesua Kalaisiti mile­molu lumamo so lexe mi ma'ia uxali.

¹⁸ Ane'i mipela'inge lexe, “No anu kaluxusou voxo la tami­tema so imolo suku ixali la ixiunu tumali'aou masaxa noxou Mosinge kaio imulinu masaxa masua noxi'amo.”

¹⁹ Ane'i xo ne tamosou e so ixalixu kalipala no anu pita­pita. Mo ane'i imulinu ili'ilixo so lialia xe Ulenu Laixe uxolu noxi'a to uasi.

²⁰ Ia tamaula, loxo noxinge la nga'italongengi mo so lopala laixe noxinge uxalixu lemengenge. Mo ngapilixingengi noxou Ulenu Laixe so upamuxangengi no anu vaikala e ngalemolu noxou Mosinge.

²¹ Xe ngatulu pumungenge no anu sexela noxou Mosinge so ngaxomaiou voxo so Tatananenge Iesua Kalaisiti u'alaunasinge no anu mauli kaluxu uasi.

²² Mo loxo se'i noxinge isasalo no anu lopala la nga'okine'i uasi, nga'alaunasi'asi.

²³ Xe tami­tema se'ila, la a so i'una no navu laso ngatokine'i mo nga'umene'i no anu. Xe noxi'a leviani ane mipili­xine'i no anu masaxa masua noxi'a la susu musuasi'a mole anu loxo lavulutii'a nuni'u kalumo avile. Laso nga'alaunasi'a so ngasu'uline'i ia ngamama'u mo ngamatapianu susu noxi'a xo loxo 'o io nuni noxi'a utei noxinge.

Nenge'a ta'itinu ualasou Mosingesi

²⁴ Ioxe, Mosingesi umomomo so ulaxa'ingengi mo so ngatulaki ngalapau uasi. Mo anusi umo­momo so uxalixinge no anu tanixu iaxu no tualasou. Xe loxo ngatulu no iou ne la no anu osa'ilasi xo susu vile noxinge so usaxisou uasisi.

²⁵ Mosinge anu mosou pamauli­singe xo muxalixu a noxou Iesua Kalaisiti anu Tatananenge. Laso nenge ta'itinu ualasou xo anusi iaxu mo anu kingi u'uli'uli mo xaviou ilou ualasou uua'ulixu mimi muka­lusi. Tei no anu voxovoxo la anu uxoxolu, xe uxoxolu vaimomo, xe uxoxolu ili'i kaluxu uasi. Vaikala ano'o maninasi. Anu anesi.