Ipilu 9 - Ata New Testament

Pilisiti tatila so tatei mulavusou une'enu misoposi sialuxu so usu'asou susu

¹ Ioxe, konitalaki tei ne anu lo no anu kalumo so upamuxanu vote'i so tamitema ilai noxou Mosinge. Mo anu tasou muxolu no lialia 'o.

² Tasou ne milalaxinu no anu laseli aloxo 'o. Nonano la ngiou ane noale la tanixu lalamo xe latevolo xe pileti mimulaxu ne so uai no iou Mosinge. Ngiou ne talemolu lexe ngiou noxou Mosinge.

³ Xe no tumalou ngiou ne la mililixu lavalava papatu vile so ukakapisou ngiou ane talemolu lexe noxou Mosinge u'isalili.

⁴ Nonano ne mimi aloxo 'o. Mi loxo latevolo se mi'oxonu no anu koli so tanixu mi e i'elaxu so tuma'u lailaixe. Xe kesi so konitalaki ane misu'asou pa'upa'umolu no anu koli. Nonano no anu kesi la lisi koli so mana xe vilaxo noxou Aloni ane malusou muleme no anu xe lavo'o alelaxu e konitalaki mukaukavu no anu.

⁵ Xe no latanu kesi la mi'oxonu mi loxo ta'angelo so usosovo lexe Mosinge iaxu muxolu no taine'i. La anene tanixu iaiama u'isalili. Ia no anu ano'o nenge umomomo so talulusou mi kitukitu no anu uasi.

⁶ Ioxe, milalaxinu axone mukalu la voxovoxo utotomu tapilisiti i'una'u­nalai se nonano no anu ngiou noxou Mosinge ane noale. Mi'u­na'u­nalai so i'oxonu xaixai noxi'a ne.

⁷ Ia loxo ngiou tameisou nonano ne la pilisiti tatila anusisi umomomo so u'unalai no anu voxo vilesisi no anu tau ie vilevilesi. U'unalai la ulai vitanisi uasi, uno'u sialu une'enu noxou Mosinge so susu noxoumo xe susu noxi'a tamitema ane i'oxonu ia ilavusou uasi.

⁸ Anu axone mo so Ulenu Laixe upela'inge aloxo 'o. Loxo tani teinu so tamitema ilai noxou Mosinge a uxolusio la vote'i so nenge ta'unalai no anu ngiou noxou Mosinge u'isalili ne upalasi uasi.

⁹ Anu tani ne anu loxo pikisa so upela'inge nenge tamitema so voxo vaimomo 'o. Xo ane'i milavusou ine'enu mimi lexe noxou Mosinge mo mimi se'i ne mi'elaxu. Ia mimi anene umomomo uasi so u'isali­linoxu tane'i mo so ilavu lexe tina'uxa'a so susu ukalu.

¹⁰ Xo ili'ilixo e mi'oxonu ne anu mi so i'ou xe iiexu mo mi loxo ulo'ulo. Ia lavuloto axone anu so vasimengesi, anu so upamuxane'i xo mo Mosinge uxiunu mimi uxali alavua laixe.

Kalaisiti molu mune'enu sialuxu so lakolisou susu

¹¹ Ia vaimomo 'o Kalaisiti muxali mukalu mo anu mutulu pilisiti tatila no anu mimi lailaixe ane muxali. Xo loxo anu la mu'unalai avile mukalu no anu tani ane muua'ulixu mo lailaixe manina no anu tani tei. Xo tani ne muxali no avo'a tamitema uasi, anu mi so lialia 'o to uasi.

¹² Xe anu uno'u sialuxa'a takoti oli'a ta'ili'a takau uasi, mu'unalai no anu sialuxusi. Mu'unalai no anu tanixu Mosinge ne lalaxu uasi, alaxu vilesisi ane. Xo mulotonenge telivu taxolu noxou Mosinge kaluxu uasi.

¹³ Xo no anu ane tei loxo itema uxali nuni'u no iou Mosinge la pilisiti ulavusou uno'u sialuxu koti o kau mulu ka upitanu no anu lomuloxu kau sema ane mi'elaxu. Upitanu ukalu laso upeipeinu no anu vasimolu itema ne so uxalixu malemalenga mo ukalipalanu lexe noxou Mosinge.

¹⁴ Ioxe, anene vote'i so malemalenga tei. Ia loxo sialuxu Kalaisiti la lailaixe mo uua'ulixu anene laso xaixai no anu uua'ulixu ane tei avile kalumo. Xo Ulenu ane kaluxusou uasi mupa­muxanu so mupilixinu maulixu malemalenga noxou Mosinge. Laso sialuxu uxaxaisou vasime­ngesi uasi, ulai avile no tanenge so u'uinu mo u'oxonu uai laixe. Mo so tatalo no anu xaixai ane mauli no anu uasi mo ta'oxonu xaixai noxou Mosinge e umamauli.

Sialuxu Kalaisiti anu sosovosou konitalaki alavua

¹⁵ Laso ano'o tava'u so Kalaisiti utulu nonixi mo uvalaxu konitalaki alavua. Mo so ane'i ane Mosinge mu'avali'a la ixalisou nene'axu vavalima ane uxolu kaluxu uasi. Mi ne umomomo uxali xo susu ane tamitema mi'oxonu no anu koni­talaki tei la anu soli noxou mulotonu. Laso maixene anu vote'i uxolu so ixolu lalavulusi.

¹⁶ Xo aloxo 'o. Loxo itema uxavutala no anu mimiou lexe ena'ei so uxalisou loxo usoli la ukaukavunu lapepasou a loxo konitalaki. Ia temanu lapepa ne uxali no anu soli noxousi.

¹⁷ Laso loxo itema ne uxoxolusio la mi ne uaisi. Ia loxo usolii laso ane, temanu mi loxo konitalaki ne uxali.

¹⁸ Laso no anu konitalaki tei ne la uxali vitanisi uasi, misosovosou no anu sialu ka mu'avuti.

¹⁹ Xo tei la Mosisi mupela'axu tamitema so lo mukalusi. Xe mukalu la muno'u kau ilie ilou koti sialuxa'a ka muilanu ilou lexa. Mukalu la muno'u ovu isopi avolu xe musakinu sipisipi laxusou lauoinu no anu so mumamanu sialusou. Mumamanu laso mupeipeinu sialu no anu lavuku so lo xe noxi'a tamitema.

²⁰ Xe muvikala aloxo 'o, “Ano'o sialu so usosovosou koni­talaki e Mosinge mupilixinu noxinge so ngamulinu.”

²¹ La Mosisi mu'oxo axone kalumo so mupeipeinu sialu no anu tani laseli xe no anu mimi mukalusi so xaixai nonano ne.

²² Xe loxo no anu lo la vote'i so mimi mukalusi uxali malemalenga a no anu sialusi. Mimi vilevilesisi vote'isou male­malenga iou vilemo. Mo vote'i so tina'u so susu uiasi kalumo a no anu sialu nesi.

Mi e Kalaisiti mupilixinu la ukalusou tina'u so susu avile

²³ Ioxe, mimi mukalusi ne anu loxo pikisasou mimi maninasou e uxoxolu no tualasou Mosinge la muxali malemalenga no anu sialuxa'a tamisoposisi. Ia loxo temanu maninasou no tualasou Mosinge la vote'i so malemalenga no anu ne a sialu ane lailaixe avile.

²⁴ Xo Kalaisiti u'unalai uasi no anu tasou Mosinge e muxali no avo'a tamitema so loxo pikisasi. Uasi to! Mu'unalai no anu ane maninasou no tualasou Mosinge mo a uxoxolu no iou Mosinge so usosovosinge noxou.

²⁵ Xe loxo tapilisiti tatiatila la tau tau ie mukalusi i'unalaixu sialuxa'a tamisoposi no ngiou noxou Mosinge u'isalili. Ia loxo noxou Kalaisiti la upilixinu mauli noxou lalaxu uasi.

²⁶ Xo axone la anu masi utavulenu tu'umaxu utotomu musoko'u no voxo loxo Mosinge mukoinu lialia xo mo muxali vaimomo 'o. Ia uasi, xo vaimomo 'o mi ne kaluxusou voxovoxo a mune'e alaisi 'oe la Kalaisiti muxali mupala'a. Muxali alaxu vilesisi so upilixinu mauli noxou mo so uxexenu susu.

²⁷ Xo tamitema mukalusi isoli alaxu vilesisi. Xe mukalu la itulu no laxunu Mosinge so utilovosi'a.

²⁸ Ioxe, noxou Kalaisiti la anu axone kalumo xo mupilixinu mauli noxou alaxu vilesisi so utavulenu susu noxi'a tamitema latala. Xe ili'i la anu upala'a alaxu tameisoula, ia so uxexenu susula uasi. Une'e so uno'a ane'i ane opone'i ututuluou lailivuxu.