Ipilu 8 - Ata New Testament

Pilisiti tatila na'a nenge a uxolu no tualasou Mosinge

¹ Ioxe, tava'u vaikalamenge mukalusi 'o aloxo 'o. Nenge pilisiti tatila axone a uxoxolu. Anu ane mutalupexa no avolu tema no anu sia noxou Kingi Tatila e no tualasou.

² Mo anu a uxaxai so upilisiti no ngiou noxou Mosinge mu'isalili no tasou ne. Tasou ne utulu no avo'a tamitema uasi, Tatananenge molu mutulusou.

³ Xaixai noxi'a tapilisiti tatatila mukalusi a so ine'enu mimi lexe noxou Mosinge xe ane so i'elaxu ulai noxou. Laso anu axone noxou pilisiti tatila na'a nenge. Anu kalumo so une'enu mi vile laixe lexe noxou Mosinge.

⁴ Xe loxo anu uxoxolu no lialia la anu so pilisiti uasi ane. Xo ane'i so lialia a ixoxolu mo imulinu lo so ixalixu mimi lexe noxou Mosinge.

⁵ Ia mi e ixaxaisou ne anu loxo pikisasou mo loxo xalexu mi maninasou e uxoxolu no tualasou Mosinge. Anu iou vilesisi loxo noxou Mosisi. Xo no voxo anu so utulusou tasou Mosinge laseli la Mosinge muve­letalosou aloxo 'o, “Loxo na'oxonu tani laseli la namulinu u'isalili no anu pikisasou a loxo nemaleisou no la'olu.”

⁶ Ia Iesua mutulu no anu xaixai lailaixe misevile mo tanixu pilisiti noxou ne uua'ulixu ane noxi'a tapilisiti so lialia avile. Xo anu mutulu nonixi so uvalaxu konitalaki alavua. Anu alavua 'o muua'ulixu konitalaki tei xo mimi e uvavalimasou la lailaixe avile no anu mimi e teinu muvavalimasou.

Konitalaki alavua 'o muua'ulixu ane tei

⁷ Xo aloxo 'o. Loxo konitalaki ane tei laixe loloni la tava'u uasi so Mosinge ulalaxinu xavutala lexe ukolinu no anu tameisou 'o.

⁸ Ia Mosinge u'osasi'a tamitema tatei ne uasi xo muvikala aloxo 'o, “Ngalomu. Voxo une'e so eni Tatanangengi axalixu konitalaki alavua noxixe noxi'a laili Ta'isilaeli xe laili Taiuta.

⁹ Anu iou vilemo no anu konitalaki e e'oxonu noxi'a ta'ilusune'i. Xo tatei eni etila'a so elane'i no xale lia ne Isipi xe mukalu la e'oxonu konitalaki noxi'a. Ia ane'i imulinu to uasi laso eni Tatanangengi exiunu tumalilo noxi'a.

¹⁰ Ia no anu konitalaki alavua eni a'oxonu noxi'a laili Ta'isilaeli ili'i la aloxo 'o. Eni amulaxu lo noxilo no anu alaie'i mo akaukavunu no anu opone'i. La eni axolu a Mosi'a xe ane'i ixolu tamitemaxeli.

¹¹ Laso pelototo so ivikalane'i ngato'o lexe, 'Ai, nala­vulavu noxou Tatananenge.' la ilemolu uasi. Xo ane'i tamitema vitanisi mo tamitema ualaualasi'a la ane'i mukalusi ilavusilosi.

¹² Xo eni aiaiama noxi'a so akolinu ilixo masua noxi'a uasi mo susu noxi'a la axavutalanula uasi.”

¹³ Laso ane. Vaikala e Mosinge mulemolu so konitalaki alavua 'o la umaxa'u lexe anu ane tei la mamuxanu. Anu teinu mo mama­xanu axone la anu so tasiauxu ane.