Ipilu 7 - Ata New Testament

Melikisateki ne anu itema ualasou tatila

¹ Ioxe, Melikisateki 'o, ne anu kingi so Salemo xe anu pilisiti noxou Mosinge anu U'uli'uli. No voxo loxo Apala'amu muua'ulixa'a mo muve'ave'a takingi xe a ulilivu, la Melikisateki muxalisou no vote'i. Muxalisou la muvikala laixe so xoluxolu noxou Apala'amu.

² Xe Apala'amu la muxexenu pa'usou no anu 10 no anu mimi muxalisou no anu oto. Muxexenu ka mulosou Melikisateki. Uala e Melikisateki ne loxo taxiunu la laxu lexe kingi so malemalenga. Xe anu kingi so Salemo la anu laxu lexe kingi so xoluxoluxu lala­vulusi.

³ Itema ne Mosinge vaikalaou upela'ingexu uasi laso anu loxo momu uasi xe nenu uasi xe nanasou uasi. Anu tava'u uasi mo kaluxusou uasi. Maulixu muxali a loxo noxou Mosinge Olu xo anu uxoxolu no anu tanixu pilisiti ane kaluxu uasi.

⁴ Mo ngaxavutalanu itema ne lexe ualasou mutiatila musuku. Xo motuovunenge Apala'amu muka­lipalanu pa'usou lailaixe no anu 10 no anu mimi muxalisou no anu oto.

⁵ Xo lo uvikala lexe tamitema mukalusi ikalipanu mimii'a pa'usou no anu 10 so ilosi'a laili noxou Livai ta'ei ane itulu tapilisiti. Manina, ane'i tamitema ne ane'i ta'ilusunu Apala'amusi ia ipilixinu mimii'a ne noxi'a tavimovimo'a Talivai.

⁶ Ia noxou Melikisateki la anu so laili noxi'a Talivai uasi ia muxalisou mimiou Apala'amu pa'usou no anu 10. Xe mukalu la muvikala laixe so xoluxoluxu noxou anu ane Mosinge muva­valima noxou ne.

⁷ Mo loxo telavu, itema so uvikala laixe so xoluxolu la anu ualasou tatila noxou anu ane muvikalasou ne. Anu vote'isou axonesi, umomomo so uxiu uasi.

⁸ Ioxe, no anu ane so tapilisiti ixalisou pa'usou 10 noxi'a tami­tema la telexu vile aloxo 'o. Ane'i tapilisiti ane ixalisou ne ane'i isolisi. Ia noxou anu ane muxalisou mimi noxou Apala'amu la Mosinge vaikalaou ulemolu kaluxusou mauli noxou uasi.

⁹ Xe anu umomomo so tavikala aloxo 'ola. Apala'amu mupilixinu pa'usou no anu 10 ne la anu loxo Livai kalumo mu'oxonu.

¹⁰ Xo no voxo loxo Apala'amu muxalisou Melikisateki la anu loxo Livai kalumo mupi­lixinu mimi ne xo muxolu no anu vasimolu ilusunu Apala'amu mukalu.

Pilisiti tatila alavua 'o muua'ulixa'a tapilisiti tatei avile

¹¹ Ioxe, tatei lo muxali noxi'a Ta'isilaeli la muvikala lexe Talivai itulu no anu xaixai so ipilisiti. Xe mune'e la Mosinge musosovosou pilisiti vile alavua anu so laili noxou Aloni ne uasi. Noxou alavua 'o la mutulusou no anu tanixu mumulinu noxou Melikisateki. Ioxe, loxo xaixai noxi'a tapilisiti Talivai olele uxalixa'a tamitema laixe loloni avile, laso axova so mutulusou pilisiti alavua 'o?

¹² Xe loxo laili so ipilisiti ukalu mo uxiu axone la lo uxiu kalumo.

¹³ Xo pilisiti alavua Mosinge vaikalaou mulemolu ne anu so laili vilemo. No anu laili noxou ne, vile uxaxai no anu tanixu navu no tasou Mosinge uasi.

¹⁴ Xo loxo telavu, Tatananenge anu muxali no anu laili noxou Iuta. Xe no anu tanixu pilisiti no anu laili anene, la Mosisi vaikala vile no anu uasi.

¹⁵ Ioxe, mi ano'o mupala'a avile xo pilisiti alavua e muxali la mumu­linu mu'isalili noxou Melikisateki.

¹⁶ Xo noxou ano'o la tava'u so mu'una no anu tanixu pilisiti ne, mi so vasimenge lexe muxali no anu laili aneva uasi. Tava'u tanixu ne a xavi no anu xoluxolu noxou e kaluxusou uasisi.

¹⁷ Xo Mosinge vaikalaou aloxo 'o, “Nini naxolu napilisiti kaluxusou uasi. Naxolu no anu tanixu pilisiti umulinu noxou Melikisateki.”

¹⁸ Vaikala anene upela'inge lexe Mosinge muxexenu lo ane muxolu tei xo anu xavinu so usu'ulinenge uasi.

¹⁹ Xo lo umomomo so uxalixu mi vile laixe loloni uasi to! Ioxe, muxexenu ane tei so mukolinu no anu alavua laixe e talopalanu taxomaiou 'o. Laso maixene anu tava'u so tane'e alai noxou Mosinge.

²⁰ Mo aloxo 'ola. Ane'i tapilisiti ne ane'i itulu toxonesi. Ia loxo Mosinge musosovosou Iesua la anu mulemolu vaikala pakia'u so muvavalima no anu.

²¹ Xo loxo tapilisiti olele la vavalima vile so utetelisi'a no anu tanixa'a uasi. Ia loxo noxou 'o la tava'u tanixu ne a vavalima Mosinge mulemolu aloxo 'o, “Tatananenge muvava­lima mo anu uxiunu oponu uasi. Muvikala lexe nini naxolu napi­lisiti kaluxusou uasi.”

²² Laso maixene Iesua anu sosovo no anu konitalaki alavua ane uua'ulixu ane tei avile.

²³ Xe vile aloxo 'ola. Tapilisiti ane tei ne ane'i tavu'alo musuku xo ane'i misoisolisi. Tanitanixa'a no anu xaixai ne mutalotalo no anu solisi.

²⁴ Ia loxo noxou Iesua la anu uxolu no anu tanixu pilisiti ne ulai ulai utalo uasi. Evile so ukolinula uasi xo anu usoli uasi.

²⁵ Anu uxolu axone laso ta'ei ipolo noxou so ilai noxou Mosinge la anu upamauline'i. Upamauline'i la mi ne utalo uasi xo anu a uxoxolu uvalaxa'a noxou Mosinge kaluxu­sou uasi.

²⁶ Laso ane, Iesua anu laixe umomomo so anu uxolu no anu tanixu pilisiti tatila na'a nenge. Xo anu malemalenga mo ulapu no iou Mosinge. Mi vile nuni'u noxou uasi, uxolu ukalipala avile noxi'a tamitema so susu mo a uxolu teitexi no tualasou Mosinge.

²⁷ Xo loxo tapilisiti tatiatila olele la voxovoxo utotomu ilavusou ine'enu mimi lexe noxou Mosinge so usu'asou susu noxi'amo xe susu noxi'a tamitema. Ia loxo noxou Iesua la susu uasi laso tava'u so u'oxo axone uasi. Anu molu mupilixinu mauli noxou so susu noxi'a tamitemasi, mo alaxu vilesisi.

²⁸ Aloxo 'o. No anu lo la musosovosi'a tapilisiti tatiatila ane tamitemasi, laso pelesi'asi. Ia vaikala so vavalima Mosinge mulemolu muxali ili'i no anu lo mo anu usosovosou itema vitanisi uasi. Anu mutulusou Mosinge Olu ane uxoxolu laixe loloni kaluxusou uasi.