Ipilu 6 - Ata New Testament

Talivu no anu mimi so xoluxolu tatei uasi

¹ Ioxe, laso votovoto tavatava'u so Itema Mosinge musosovosou la ta'oso'oso no anusi uasi. Tasu'anu talanengeou mo xavinenge so tasukusuku talai no anu mimi ane so u'oxonu lopala noxinge uleme. Xo tei la telamana mo tepilixinu xaixai ane mauli no anu uasi mo so telopala noxou Mosingesi. Anene tava'u lopala na'a nenge ia mamu so talivulivuou utotomu.

² Mo kalumo mi loxo lavuloto so ili'ilixo no anu ulo'ulo mo ane so tamulaxu avonge xe vaivaikalasou voxo so tatulu tamauli no anu soli mo voxo so tamitema ixalisou nene'axu ilixo noxi'a kaluxu uasi ne, mimi axone ta'oso'oso no anu uasi.

³ Laso loxo Mosinge upele masaxa la tasu'anu talanengeousi mo talai u'ulisi.

⁴ Xo tamitema mose'i ne Mosinge mulamananixa'a xe mi laixe ane molu no tualasou Mosinge mixa­mulinu mo Ulenu Laixe muxa­xaisi'a kalumo.

⁵ Mo milomusou vaikalaou Mosinge tu'axu xe mimaisou sosovo so xavi noxou Mosinge ane upala'a no anu voxosou ili'i.

⁶ Ioxe, loxo vaikala manina upalasi noxi'a tamitema axone ia ili'i ixiunu tumali'aou mo ixexesou la vote'i so ixiunu opone'ila uasi manina. Xo i'oxo axone la anu loxo ane'i me'a ililixu Mosinge Olu no ovu valautula mo ilosou maila no ie'i tamitema.

⁷ Xo aloxo 'o. Uali ulavusou usisili utotomu mo u'una no anu lialia. Xe loxo lialia ne uxalixu la'ilali la usu'uline'i tamitema itotou no anu ne. Laso axone la Mosinge u'osasou lialia ne so ulosou lemexu laixe.

⁸ Ia loxo lialia uxalixu lamota ana'anaxu xe mi ane uleme vitavitanisi la anu nene'axu uasi, lia masuasi. Anu axone la Mosinge uvikalasou lexe masuasi mo ulai ili'i la isexeteluxusi.

⁹ Tamaula, nexi telemolu vaikala ialuxu ano'o la masi muto'omenge. Ia nexi talopala lexe mi axone uxali noxinge uasi, xo no oponexi taxamulinu lexe nene'axu pamauli manina uxali no anu xoluxo­lungenge ne.

¹⁰ Xo loxo Mosinge utilovosinge la ukilikalu uasi. Xaixai noxinge mo sexela noxinge nge'oxonu no anu ualasou ne anu tanuvulusiou uasi. Sexela anene a mupala'a no anu su'uli loxo nge'oxonu noxi'a tamitemaou u'isalili. Mo mi ne a nga'oxonusio.

¹¹ Laso oponexi lexe ngingi vilevilesi xavingengi axone so ngateteli pakia'u no anu lopala noxinge. Mo ngaxolu pumungenge axone ulai avile uxali no anu voxosou nene'axu lopala noxinge uxali loloni.

¹² La ngatotosa uasi. Ngauanexa'a talopala ta'ei ane mixolu pumuxa'a mo mixalisou nene'axu vavalima noxou Mosinge.

Nenge talavu manina lexe vavalima noxou Mosinge uxalixu nene'axu

¹³ Ioxe, tatei loxo Mosinge muva­valima noxou Apala'amu la anu so ulemolu uala vile so usakinu vavalima ne lexe pakia'u. Ia ualasou evile utiatila noxou so ulemolu uasi laso anu musakinu no anu ualasoumo.

¹⁴ La muvikala aloxo 'o, “Manina misevile. Eni a'oxoneni laixe mo axalixi'a laili noxine tavu'alo e tavu'alo.”

¹⁵ Laso Apala'amu muxolu se'isisi maxuveni xo laso muxalisou nene'axu vavalima ne.

¹⁶ Xo loxo itema vile menexu uxililiou vaikalaou la vote'i so u'oxonu pakia'usou vaikalaou aloxo 'o. Anu ulemolu ualasou itema vile ane tatila noxou so usakinu vavalima noxou lexe manina. U'oxo axone laso tu'umaxu ne ulapau vitanisi.

¹⁷ Ioxe, Mosinge mu'oxo axone kalumo. Xo anu mumasaxa so upela'a laili ane so ixalisou nene'axu vavalima lexe oponu umomomo so uxiu uasi. Laso maixene mulemolu ualasou so musakinu no anu.

¹⁸ Laso ane. Telavu lexe anu umomomo so ukalavoi uasi xo no anu mi tamei pumuxu manina ane telavusou lexe uxiu uasi. Mi e vavalima noxou xe ualasou e musakinu no anu. Xo nenge te'ume telai so taxolu tatalume noxou. Laso oponenge utulu pakia'u mo tateteli no anu mi ane talopalanu taxomaiou so taxalisou ili'i.

¹⁹ Talopalanu taxo­maiou axone la anu loxo axa so xoluxolu noxinge xo anu manina mo pumuxusi. Tava'u e noxou Iesua xo anu mupolo no tainu lavalava mo mu'unalai avile no anu ngiou noxou Mosinge mu'isalili.

²⁰ Iesua mu'unalai ne la anu mu'uli noxinge ane. Xo anu muxali pilisiti tatila so umulinu tanixu Melikisateki ulai ulai kaluxu uasi.