Ipilu 5 - Ata New Testament

Pilisiti tatila e Iesua anu laixe umomomo so upamaulinenge

¹ Ioxe, vote'isou itema uxali pilisiti tatatila aloxo 'o. Mosinge uilounu no taine'i tamenexu ukalu laso utulusou. La xaixai noxou ne so usosovosi'a tamitema no anu mi ma'ia i'oxonu so ulai noxou Mosinge. A loxo tamitema ipilixinu mimi se'i so lexe ulai noxou Mosinge o ine'ene'i tamisoposi mo so pilisiti uvau so usu'asou susu noxi'a.

² Xe loxo tamitema lavu­lavui'a uasi ka ipolo va'axu la anu pilisitii'a ne ulovonixi'a. Ulovo­nixi'a ia u'okine'i uasi, u'oxonu se'isisi noxi'a xo anu kalumo itema mo ulavu lexe anu kalumo pelesousi.

³ Anu kalumo itema pelesiousi axone laso uve'a tami­soposi so susu noxi'a tamitemasi uasi. Anu u'oxonu so susu noxoumo kalumo.

⁴ Xe itema ne, molu utulusou no anu tanixu laixe so pilisiti tatila uasi. Mosinge molu u'avalou tei kaio utulusou, aloxo mu'oxonu noxou Aloni.

⁵ Ioxe, anu axone kalumo noxou Kalaisiti. Xo anu molu utulusou no anu tanixu laixe so pilisiti tatila uasi, Mosinge molu mu'oxonu. Xo loxo mulemolu noxou lexe, “Nini na'alixeli, vaimomo 'o eni so amamine a.”

⁶ Mo Mosinge mule­molu no anu vaikalaou pa'usou vilela lexe, “Nini naxolu no anu tanixene pilisiti ulai ulai kaluxu uasi. Nini napilisiti umulinu tanixu Melikisateki.”

⁷ Ioxe, no voxo loxo Iesua muxolu no anu vasimolu so lialia 'o la anu mulinga mo mukatu noxou Mosinge. La no voxo ne mutama mole iou lexaxu mula. Mukatu axone xo mulavu lexe loxo usoli la Mosingesi umo­momo so u'umenu upamaulinu no anu soli. Xe Mosinge mumaisou lexe mulu'enu mo mumama'u noxou axone laso mukolinu katu noxou.

⁸ Xo manina anu Mosinge Olu. Ia mutavulenu navunavu axone laso lavulavu so umulinu masaxa noxou Momu ne a mupala'a noxou avile.

⁹ Ioxe, lavulavuou so umulinu masaxa noxou Momu mumomomo loloni axone, laso anu muxali tava'u pamauli noxi'a tamitema ta'ei imulinu masaxa noxou. Upa­mauline'i mo so ulosi'a mauli ane kaluxu uasi.

¹⁰ Mosinge molu musosovosou no anu xaixai anene xo muvikala lexe anu uxali pilisiti tatila e umulinu tanixu Meliki­sateki.

No anu lopala na'a nenge la mamu so taxolu loxo tamolomolo

¹¹ No anu ngiou ane lexe Iesua tanixu pilisiti umulinu Melikisateki la mimi tavu'alo so tapala'anixu. Ia tamomomo uasi xo no anu lolomu noxinge la loxo sangalinge muto­musi.

¹² Ngingi ngexolu tamite­maou Mosinge maxuveni mukalu mo mane la ngingi menge ngavoto­votosou vaikalaou. La uasi, anu laixe so se'i ivotongengi no anu vaikalaou Mosinge tavatava'ula. Ngingi ngamomomo no anu la'ilali pakia'u uasi to, ngingi loxo ngaiexu sususio.

¹³ Xe tamitema ane loxo iiexu susu axonesi la ilavusou i'isalilinoxu vaikala mulapu uasi. Ane'i loxo tamolomolosi ane.

¹⁴ Ia loxo la'ilali pakia'u ne la anu si'a tamitema tane'i mukalu. Ane'i ilavusou vote'i so itilovosou mi ane laixe xe mi ane masua xo itovoto­vonu utotomu. Anu loxo ipilekitisi no anu.