Ipilu 4 - Ata New Testament

Ane'isi loxo ilopala la ixalisou ma'ila

¹ Ioxe, vavalima noxou Mosinge lexe ane'i ane ilopalasi i'unalai no anu tanixu ma'ila a ututulusio. Laso nenge tamama'u xo anu masi upala'a lexe se'i noxinge mane i'unalai la uasi, mitulu mitutulosi.

² Xo manina nenge telomusou votovoto so vaikala laixe a loxo ane'i tatei ne. Ilomusou vaikala laixe, ia usu'uline'i uasi xo ipitanu no anu lopala so ilomuxu uasi.

³ Ia nenge ane telopala la ta'unalai no anu tanixu ma'ila. Xo loxo Mosinge mulemolu, “Eni la'iaxo laso evavalima no opoleli lexe ane'i i'unalai no anu tanixu ma'ila noxilo uasi.” Muvikalasou xale lia e mulalaxinu si'a tatei ane. Xo loxo anu la musivitanoxu xaixai noxou tatei mi ne muxalixu lialia.

⁴ A loxo mulemolu so voxo ane 7 no anu vaikalaou pa'usou vile aloxo 'o, “Mosinge mukalusou xaixai noxou avile laso no anu voxo 7 la muma'ila.”

⁵ Xe no anu pa'usou e telemolu mukalu 'o lexe, “Ane'i i'unalai no anu tanixu ma'ila noxilo uasi.”

⁶ Laso ane. Ane'i ane milomusou votovoto so vaikala laixe tatei ne i'unalai no anu tanixu ma'ila noxou Mosinge uasi xo ilopala uasi. Ia ma'ila ne a uxoxolusi laso vote'i uxolu so tamitema mose'i i'unalai no anu vaimomo 'o.

⁷ Mi ne telavusou xo Mosinge mupela'i­ngexu voxo ane so ta'unalai. A mulemolu no anu anaxu Teviti ili'i manina no anu vaikala e telemolu se mukalu 'oe. Aloxo 'o, “Ngalomusou vaikalaxeli vaimomo 'o mo nga'oxonu opo­ngengi pakia'u uasi.”

⁸ Xo loxo Iosua u'unalaixi'a no anu tanixu ma'ila tatei ne, la tava'u uasi so Mosinge mulemolu voxo vilela aloxo 'ola.

⁹ Laso maixene telavu lexe tamitemaou Mosinge i'unalai no anu ma'ila iou vilesisi aloxo Voxo so Ma'ila.

¹⁰ Xo loxo itema u'unalai no anu ma'ila noxou Mosinge la uma'ila no anu xaixai noxou ane. Anu iou vilesisi loxo Mosinge mukalusou xaixai noxou mo muma'ila.

¹¹ Laso laixe so oponenge u'oxoxu tanixu ma'ila so ta'unalai. Xo loxo 'o io se'i noxinge imulinu ilixone'i ane'i tatei so ilomu uasi. Xe axone la i'unalai uasi ane, ilapau ilivusi.

¹² Ioxe, vaikalaou Mosinge anu umamauli xe anu xavinu musuku. La anaxu e anaxu misevile uua'u­lixu laviso so oto e anaxu tamei. Xe loxo uto'omenge la u'unalai avile no anu uxalixu kalipalasou tanenge xe ulenenge. Anu utilo­vosou xavutala mo masaxa no oponenge mukalusi, mi vile utalume uasisi. Anu loxo ukalika­lipalanu xinenge vo'uvo'uxu mo u'unalai no anu xinenge temanu avile.

¹³ Xo mi vile ane uxoxolu umomomo so utalumexu Mosinge uasi. No iou ne mimi mukalusi upalasisi, uai no tani keakeasi. Mo anu molu utilovosou ili'ilixo aneva ta'oxonu.

Iesua anu pilisiti tatila na'a nenge u'uli'uli avile

¹⁴ Ioxe, pilisiti tatila na'a nenge u'uli'uli avile ne mu'unalai no anu tasou Mosinge mukalu. Anu Iesua e Mosinge Olu. Laso lopala na'a nenge talemolu la tatetelisou pakia'u.

¹⁵ Xo loxo tovotovo uxalisinge la nenge taxamulinu lexe pelesingesi. Ia anu laixe xo pilisiti tatila na'a nenge ukali­palanu va'axu no anu tu'umaxu tatavulenu uasi. Anu oponu upita no anu mo uxamulinu xo tovotovo ma'ia uxalisinge ne la muxalisou tatei kalumo. Ia loxo anu la ususu no anu uasi.

¹⁶ Laso ta'ume uasi, talai alai no anu sia kingi noxou Mosinge xo anene tanixu iaiama. Talai axone laso taxamulinu lexe anu tanunenge ane. Mo loxo mi ma'ia uxalisinge la uiaiama so usu'ulinengesi.