Ipilu 3 - Ata New Testament

Iesua u'uli'uli noxou Mosisi

¹ Ioxe tavivilo, Mosinge muxolu no tualasou la mu'avalinge so ukali­palangengi lexe ngingi tano­xou mu'isalili. Laso ngaxolu tangengi utaxunu Iesua. Anu apo­seli xo anu musosovosou Mosinge noxinge. Xe anu Pilisiti Tatila xo anu usosovosinge noxou Mosinge mo so no anu lopala noxinge talemolu, la anu uvalaxu.

² Xo Mosinge mutulusou no anu xaixai anene la muxalixu nene'axu ane. Xe noxou Mosisi la anu axonesi. Xo laili noxou ane'i loxo tasou Mosinge. Laso loxo mutulusou Mosisi so usaxila'u la mu'oxonu laixesi.

³ Ia loxo telavu. Loxo tamaisou tani vile uxali laixe la tavikalasou tani ne malaxo uasi, ta'itinu mosou ualasou, xo anu molu muxalixu. Laso axone kalumo noxou Iesua. Xo Mosinge mu'osasou Mosisi ia uala ane mu'itinu avile a noxou Iesuasi.

⁴ Tatani mukalusi uxali no avolu mosousi, ia mimi mukalusi Mosinge molu muxalixu.

⁵ Ioxe, Mosisi ne anu itema so xaixai mo loxo Mosinge mupilixinu xaixai ma'ia so u'oxonu no tasou la mumulinu laixesi. Mo kalumo anu mu'oxonu xaixai so mulemolu mimi ane so Mosinge upalasinoxu ili'i.

⁶ Ia noxou Kalaisiti la anu Mosinge Olu mo loxo Mosinge mutulusou so u'uli laxunu tasou la anu mu'oxonu lailaixe manina. Tasou ma'ia ne? A nenge ta'ei loxo oponenge utulu pakia'u no anu mi e ananenge ulemolu lexe talopa­lanu. Xe mi ane ta'oxo lexe talo­palanu taxomaiou la oponenge pumuxu no anusi.

Tamitemaou Mosingesi ixalisou ma'ila

⁷ Laso loxo Ulenu Laixe mule­molu aloxo 'o, “Vaimomo 'o ngalo­muxu vaikalaxeli.

⁸ Nga'oxonu opo­ngengi pakia'u a loxo ta'ilusu­ngengi tatei uasi. Xo no voxo loxo mixolu no anu xale lia esi'esi la ilomuanu vaikalaxeli mo mitovo­tovoleli.

⁹ Xe mixolu ne mitovo­tovoleli umomomo no tau ie 40 ia mimaisou mimi tatila exalixu no taine'i.

¹⁰ Laso maixene opoleli la'iaxui'a laili anene mo evikala aloxo 'o, 'Ane'i ano'o ne opone'i upolo va'axu noxilo avile. Mo ane'i ilavusou vote'isilo uasi manina.'

¹¹ La'iaxo axone laso evavalima no opoleli lexe umomomo uasi manina so i'una no anu xale lia so ma'ila.”

¹² Laso tavivilo ngalaxa'ingenge laixe xo loxova, masi se'i no taingengi isusu no opone'i so ilopala uasi mo ixiunu tumali'aou Mosinge e umamauli.

¹³ Tamaisou voxo vilevilesi uxaxali mo tale­molu lexe vaimomo xo anu voxo na'a nengesio. Ia talavusou telexu uasi, laso utotomu ngapelototo­singe mo nga'avutinixinge ngato'o. Xo loxo 'o io susu uxolu xe uxali pakia'u no opongengi la ulapu­ngengi avile ane.

¹⁴ Ia nenge ane lopala na'a nenge manina musoko'u no tava'u mo uxolu avile umo­momo no anu telexu olele, la nenge tamitemaou Kalaisiti maninasou ane.

¹⁵ Xe loxo telavu, vaikalaou aloxo 'o a uxolu, “Ngalomusou vaikalaxeli vaimomo 'o mo nga'oxonu opo­ngengi pakia'u uasi. Xo tatei ta'ilusungengi mi'oxo axone la mi'avutinoxu la'ia noxilo.”

¹⁶ Xo ane'i ta'ei milomusou Mosinge vaikalaou tei ia ilomuxu uasi mo mi'avutinoxu la'ia noxou ne? A tamitema e Mosisi mu'uli laxune'i milala ne Isipi to!

¹⁷ Xe Mosinge la'iaxui'a ta'ei mumo­momo no anu tau ie 40? A ane'i tamitema ane misusu ka vasime'a muta'olu vitanisi no xale lia esi'esi, ne?

¹⁸ Xe muvavalima no oponu lexe ane'i tavu'alo i'unalai no anu xale lia so ma'ila uasi. So u'apixa'a ta'ei ne? A ane'i e milomuanu vaikalaou, ne?

¹⁹ Laso ane, nenge tamaisou lexe i'unalai no anu xale lia so ma'ila uasi ne xo tava'u vilesisi ane so ilopala uasi.