Ipilu 2 - Ata New Testament

Pamauli ane Mosinge muxalixu anu mi mutiatila musuku

¹ Ioxe, Mosinge Olu u'uli'uli avile axone laso vaikala laixesou e telomusou mukalu la takamakulunu pakia'u. Talaxa'i laixe xo loxo 'o io masi tasasalo taxexesou.

² Xo aloxo 'o. Tatei Mosinge mupolonu vaikalaou noxi'a ta'angelo. La vaikala ne mupala'a lexe manina xo loxo itema muxola'u o mulomuanu la muxalisou nene'axu ulovou ilixo noxousi.

³ Anene tatei, ia vaimomo 'o vote'i so pamauli lailaixe a mupala'a. Laso loxo tataxanu uasi mo ta'oxo lexe mi vitanisi la tamaxalexu la'ia noxou Mosinge axova? Xo Tatananenge molu mupala'anixu tei xe ane'i ta'ei milomuxui laso mipela'ingexu ili'i.

⁴ La Mosinge muvalaxu vaikalai'a lexe manina xo mi'oxonu sosovo so xavi ane takuluke no anu xe mipaipoune'i tamitema ipipiena iouiou. Mo Ulenu Laixe muveluvelunu lavu­lavu so xaixai iouiou no anu masaxa noxousi.

Iesua anu mosou pamauli noxinge

⁵ Xo loxo no anu lialia alavua ane uxali ili'i e tavivikalasou 'o, la Mosinge usosovosi'a ta'angelo so i'uli laxunu uasi.

⁶ Xo no anu Mosinge vaikalaou pa'usou vile la itema vile muvikala aloxo 'o, “Nexi tamitema 'o, nexi tami ma'ia so naxavutalanexi? Nexi tami vitanisi a, loxova so taneninexe aloxo 'o?

⁷ Xo loxo nexalinexe la nemu­lanexe so taxolu no laxa'a ta'angelo voxo ataxusi. Nemulanexe no anu taninexe lailaixe ne mo nelosixe uala tatila.

⁸ Xo mimi mukalusi nekoinu ne nemulaxu no lanexe so ta'uli laxunu.” Ioxe, vaikalaou ne Mosinge usu'asou mimi mukalusi xo loxo mutulusou itema so u'uli laxunu mimi mukalusi axone la mi vile uxolu vitanisi uasi. Ia axova, xo vaimomo 'o nenge tamaisou mimi mukalusi uxolu no lanenge tamitema so ta'uli laxunula uasi.

⁹ Ia mi vile uasi, xo nenge tasaxi noxou Iesuasi. Xo anu mulu'enu so muxolu no laxa'a ta'angelo, ia voxo ataxusi. Mulu'enu ne so utavulenu navunavu mumomomo avile no anu soli. La anene vote'isou iaiama noxou Mosinge xo Iesua muno'u tanixa'a tamitema mukalusi so u'unalai no anu soli axone. Laso maixene Mosinge mu'itinu mo mulosou uala tatila mo tanixu e mu'uli'uli avile.

¹⁰ Mosinge anu tava'u so mimi mukalusi muxali mo anu tava'u so mimi a uxoxolu. Ioxe, anu masaxa noxou Mosinge lexe ta'olu tavu'alo i'unalai ixolu no anu xoluxoluxu iaxusi. Laso anu muxalixu vote'i­sou mi ne u'isalili a noxou Iesuasi. Xo anu mutavulenu navunavu laso anu laixe loloni so mutulu mosou pamauli noxi'a Mosinge ta'olu ne.

¹¹ Ta'olu ne, Iesua ukalipalane'i lexe ane'i tanoxou Mosinge mu'isalili. Ioxe, anu xe ane'i ne ixolu Mami'a vilesisi laso maixene anu u'osa so uleme'a lexe tavimo­vimou ane, uxamulinu maila no anu uasisi.

¹² Xo vaikalaou aloxo 'o, “Eni amoxomoxo'u ualasine no taine'i tavivilo. Loxo nexi taxolu tapita la a'itinu ualasine.”

¹³ Xe no anu vile la muvikala lexe, “Eni axolu axomaiou alopalanu mimi ane mulemolu.” Xe aloxo 'ola, “Namalei, eni axolu no taine'i Mosinge ta'olu ane mulosilo.”

¹⁴ Ioxe, ta'olu ne ane'i tamitemasi ane, vasime'a vitanisi. Laso Iesua muxali a loxo ane'isi mo so ulai no anu soli. Mulai no anu soli mo so xavi noxou Uluaou so upalusi'a tamitema no anu soli, la Iesua mukalusou avile.

¹⁵ Xe ume no anu soli musakine'i tamitema no anu xoluxoluxa'a avile. Ia Iesua musoli kalumo so u'umene'i no anu mo so ume ne upamuxane'ila uasi.

¹⁶ Xo manina misevile. Iesua mu'oxonu su'uli anene so si'a ta'angelo uasi. Su'uli anene so si'a laili noxou Apala'amusi.

¹⁷ Laso no anu su'ulisi'a tavimovimou ne la vote'i vilesisi, anu uxali u'isalili aloxo ane'i nesi. Mo so axone la anu muxali pilisiti tatila ane tanuxa'a mo muxalixu nene'axu xaixai e Mosinge mupilixinu noxou. Xaixai anene so ulotonu tina'u so susu noxi'a tamitema.

¹⁸ Xe aloxo 'ola. Loxo tovotovo uxalisi'a ne la anu umomomo so usu'uline'i xo anu kalumo muxa­mulinu navunavu no anu tovo­tovo.