Ipilu 12 - Ata New Testament

Nenge tasaxi noxou Iesua mo talopalanusi

¹ Ioxe, laso ane'i tavu'alo musuku ane mi'uli noxinge ne ixolu la ixixaosinge aloxo sauma utaluta­lupexa no laxalaxa'ilu. Anu loxo nenge talesisi mo ane'i a isu'anu ie'iinge lexe taiave axova. Laso mimi ane u'au'ausinge la tapili­xinusi xe susu ane utotomu uuauoinenge la tamaxalexu. Tata­tosa uasi, taiave xavinu no anu lesisi ane uxolu no talanenge 'o.

² Tasaxi noxou Iesuasi xo anusi tava'u lopala na'a nenge mo anusi uxalixu nene'axu mi e talopalanu taxomaiou. Anu ne mutavulenu maila ia uxavutalanu uasi xe no ovu valautu la mu'italonu so musoli no anu xo oponu mu'oxoxu osa ane uxalisou ili'i 'o. Laso maixene anu a utalupexa no anu sia kingi noxou Mosinge no avolu tema.

³ Ioxe, ngaxavutala laixe noxou Iesua. Xo tamitema so susu mixililiou mu'oki ia anu mutulu pumuxusi. Laso ngingi kalumo ngatulu axone, ngatatosa uasi mo opongengi u'olo'olo uasi.

⁴ Xo ngingi nga'otoxu susu ia no anu oto anene la vile noxinge sialuxu unixisou uasi.

Mosinge ulavusou ulovonixinge nenge ta'olu

⁵ Xo axova, masi tangengivu­lusiou pelototo e Mosinge mu'oxo pakia'inge ngingi ta'olu no anu aloxo 'o, “Alixeli, loxo Tatana­nenge u'oxonu mi vile so ulovo­nixine la naxavutalanu lexe mi vitanisi mamu. Mo loxo upilixinu mi vile so upamuxaneni la oponeni kalaua uasi.

⁶ Xo ta'ei ane Tatananenge usexelaxa'a la ulovo­nixi'a ane. Xe ane'i ane umoxo'a lexe ta'olu la ulosi'a lakata.”

⁷ Ioxe, laso ngatulu pumungenge mo nga'osa so Mosinge ulovo­nixinge. Nga'osasou xo anu u'oxongengi axone xo ngingi ta'olu ane. Xo loxo itema u'oxo laixe la anu ulovonixi'a ta'olu uasi? Anu ulovonixi'a ane.

⁸ Laso maixene Mosinge ulavusou ulovonixinge ngingi ta'olu ne. Xo loxo uasi la ngingi ngalavu lexe ngingi ta'olu uasi manina ane, ngingi maminge vilemo a loxo tamolomolo so vote'i 'osi.

⁹ Mo kalumo, loxo tama­minge la milovonixinge mo nenge tataxane'isi. Ioxe, loxo tataxane'i tamaminge so vasimenge axone la axova noxou Mami'a ta'ulenenge? Ai, nenge talu'enenge so talomuxu laixe manina mo so axone la tamaulisi.

¹⁰ Xo ane'i tamaminge ne milovonixinge voxo ataxu sesi mo mimulinu xavutala na'asi. Ia noxou Mosinge loxo ulovonixinge, la anu so u'oxonenge laixesi xo umasaxa lexe ta'una no anu ilixo malemalenga noxou.

¹¹ Xe loxo no voxovoxo u'isalili so Mosinge upilixinu tu'umaxu so uxalisinge la nenge masi ta'osasou malaxo uasi, oponenge tu'umaxuousi. Ia loxo ilixo noxinge ulovoe laso ane, uxalixu nene'axu e xoluxolu lalavulusi mo ulapusi.

¹² Laso loxo avonge pelesousi so ulili vitanisi la ngatelonu. Xe tava'inge musoisoli la nga'avutinoxu mo ngamuamua'i.

¹³ Ngamuamua'i la no anu vote'i mulapusi mo so tava'inge uxiuxiu uasi, nga'isalili­noxu laixesi.

Loxo taxiunu tumalingeou Mosinge la tatavulenu tu'umaxusou

¹⁴ Xavingengi so opongengi vile­sisi noxi'a tamitema mukalusi. Mo xavingengi so xoluxolu noxinge u'isalili no anu masaxa noxou Tatananenge xo tamitema ane mukalipalane'i lexe tanoxousi la isaxisou.

¹⁵ Xe ngalaxa'ingenge laixe xo loxo 'o io se'i noxinge ine'e alai no anu iaiama noxou Mosinge sika ilapau ilivusi. Xe mamu so vuvulu'u masua uleme no taingengi mo uxalixu nene'axu sixula. Xo axone la uxalixu tu'utu'umaxu tapiena mo susu ne usuku noxinge tavu'alo.

¹⁶ Xe mamu so se'i noxinge tamitema so ilixo nuni'u. Xe se'i la tamitema so imatapianu mimi noxou Mosinge a loxo Iso. Xo tanixu laposalaxu ne anu mu'oxo lexe mi vitanisi mo mupilixinu so uno'u lakolisou e la'ilali soxu vilesisi.

¹⁷ Xe loxo ngelavu, ili'i muxiu xavutalaou mo umasaxau uxalisou vaikala lailaixe so xoluxoluxula. La mutatama mutatama so uxalisou ia Mosinge u'osasouxu uasi xo vote'i so Iso uxiu mo u'isalilinoxu oponu mani­nasoula uasi.

Nenge texali mukalu no anu Ielusalemo so tualasou Mosinge

¹⁸ Ioxe, loxo ngingi la ngaxali no anu mi ane ngasaxisou no iengi mo ngaxamulinu no vasimenge uasi. Xo ane'i tatei mixali no la'olu Sainai la mimaleisou lexe navu mu'ani'ani mo isi'isivoxo mo sivo toxoxu.

¹⁹ Xe milomusou piuka tamaxu mo xoli vile uvivikala. Muvivikala xe milomusou la mi'olo'olo mo mikatu noxou Mosisi lexe imasaxau so ilomusou vaikala nela uasi.

²⁰ Vaikala e mi'olo'olo no anu ne aloxo 'o, “Loxo itema o misoposi noxinge vile ulaisou la'olu la ngaleaxu no lavolavo'o so usoli.”

²¹ Mimalei­sou la'olu lexe muxali masua axone la Mosisi kalumo oponu kalaua xo mu'oxo lexe, “Ai, eni vasimelo u'olo'olo u'oki 'o!”

²² Ia loxo ngingi, la ngexali no anu la'olu Saioni mo no anu taoni noxou Mosinge e umamauli. Taoni e Ielusalemo so tualasou. Mo noxi'a ta'angelo i'osa'osa tautauseni e tautausenisi.

²³ Mo ngexali no anu pita tatila noxi'a talaposalaxa'a ane ualaualasi'a muxolu mukau­kavu no tualasou Mosinge. Mo noxou Mosinge anu Tiasi noxi'a tamitema mukalusi. Mo noxi'a ta'ulene'i tamitema talapusi ane muxalixi'a tamalemalenga.

²⁴ Mo ngexali noxou Iesua e itema so utulu nonixi so uvalaxu konitalaki alavua. Mo no sialuxu e mupeinu singe. Sialuxu ne muxalixu vaikala lailaixe manina no anu vaikala so sialu e Aveli mupeinu.

Talaxa'i laixe mo talomuxu vaikalaou Mosingesi

²⁵ Laso ngalaxa'i laixe mo mamu so ngaxiunu tumalingeou vaikalaou Mosinge ane a upilixinu noxinge. Xo ane'i tatei loxo milomusou xolinu no lialia xe milomuanu, la vote'i so i'umesou lakolisou uasi. Ioxe, loxo vaimomo 'o vaikalaou molu no tualasou ulu'e la vote'i uasi e uasi manina so ta'umesou lako­lisou loxo talomuanu.

²⁶ Xo tatei ne xolinu Mosinge mukunoxu lialia la muvavalima aloxo 'ola, “Voxo vilela eni akunoxu lialiala. Ia lialiasi uasi, akunoxu loxotolo kalumo.”

²⁷ Mulemolu voxo vilela axone la so upela'inge lexe ili'i anu ukunoxu lialia ilou loxotolo ane mukoinu so uxexenu avile. Ia mimi ane pumuxu so ukunikuni uasi la uxolusi.

²⁸ Xe nenge talavu lexe taxolu no anu voxo so Mosinge molu u'uli laxunenge tamitemaou la mi ne pumuxu so ukunikuni uasisi. Laso nenge tavikala laixesou mo talu'enenge xe tataxanu so ta'itinu ualasou xo mi ne u'osasou.

²⁹ Xo Mosinge anu loxo navu so usexeteluxu mi ma'ia uxililiou masaxa noxousi.