Epesusi 4 - Ata New Testament

Mupitanenge vilesisi so texali vasimolu Kalaisiti

¹ Ioxe loxo elemolu, eni Polu a. Eni e'oxonu xaixai noxou Tatananenge laso maixene ekalavususou 'o. Xaixai noxilo so elanu vaikala ane Mosinge molu mu'avalinge no anu. Ngelomuxu ava ne laso atama pakia'u noxinge lexe xoluxolu noxinge ulovou ava anene.

² Aloxo 'o. Ngingi masi nga'itingengi uasi ngalu'engengi noxi'a tavivinge. Loxo ane'i i'oxo axova la opongengi ulu'e noxi'asi. Xe loxo ilosinge tu'umaxu axova la ngaxavutalanu uasi, ngasexela­xa'asi.

³ Xo Ulenu molu mupita­ngengi vilesisi so opongengi uai se'isisiinge ngato'o. Laso ngingi xavingengi mo ngateteli axone so mi vile ukalipalangengi uasi.

⁴ Xo vasimolu Kalaisiti vilesisi mo Ulenu vilesisi mo ngalopalanu ngaxomaiou mi vilesisi kalumo. Mosinge molu mu'avalinge so ngalopalanu ngaxomaiou mi vilesisi e voxo lailaixe ili'io.

⁵ Mo Tatananenge vilesisi mo lopala noxinge vilesisi mo tava'u so ngekelele no anu lexa mi vilesisi kalumo.

⁶ Mo Mosinge anu Maminge vilesisi. Anu u'uli'uli noxi'a tamitemaou mo uxolu no taine'i mo uxalixu masaxa noxou no anu xoluxoluxa'a.

⁷ Ioxe, anu manina ia Kalaisiti muveluvelunu iaiama noxou noxinge vilevilesi no anu masaxa noxou.

⁸ Laso maixene uvikala no anu Mosinge vaikalaou lexe, “No voxo loxo mutelai la anu mu'uli laxune'i takalavusu. Mo muiti'a tamitema mimi lailaixe.”

⁹ Vaikala anene lexe mutelai ne laxu aloxo 'o. Tei la Kalaisiti mulu'e no laxu lialia.

¹⁰ Mulu'e xo xe mukalu la anu mutelai no tualasou Mosingela. Mutelai laso xavi noxou a ua'ana'ana teitexi ne xe no lialia mukalusi.

¹¹ Mimi lailaixe muiti'a tamitema ne lavulavu so xaixai aloxo 'o. Noxi'a se'i la ane'i tamitema ta'aposeli xe se'i tamitema so pela'a xe se'i la ane'i tamitema so ilanu vaikala laixe so Kalaisiti xe se'i so ivu'uline'i mo ipelototosi'a Mosinge ta'olu.

¹² Kalaisiti mu'itimenge lavulavu lailaixe ne so usu'ulinenge tamitemaou Mosinge no anu xaixai noxou. Mo so axone la nenge e vasimolu Kalaisiti uxali pakia'u.

¹³ Mo so nenge oponenge vilesisi no anu lopala mo lavuluvusou Mosinge Olu. Xo axone la xoluxolu noxinge loxo tamitema ane tane'i mukalu mo xoluxolu noxinge noxou Kalaisiti uxali lolonisi.

¹⁴ Xo tamolomolo ilavu­sou ilomuxa'a tamitema vitanisi. Ia nenge ta'oxo axone uasi, tatilovo laixe. Xo tamitema se'i masi ilalaxinu xavutalai'a so ixilisinenge mo i'oxo lolonenge. Laso loxo talomuxa'a vitanisi, la taxali loxo uaxa ane xasi ilou sivo upamupamuxanu vuluvulusi.

¹⁵ Mamu so ta'oxo axone, ta'oxo aloxo 'o. Nenge tasexelanenge ngato'o mo talemolu vaikala maninasi. Mo so axone la taxali pakia'inge xo tano'u lemenenge noxou Kalaisitisi. Xo nenge vasimolu mo anu kisinge.

¹⁶ Mo no anu latilovo ne asolonu aloxo 'ola. Anu kisinge Kalaisiti u'oxonu vasimolu e nenge tatoxo laixe. Nenge tapiena ia anu upitanenge noxou laso nenge taxali loxo vasimolu vilesisi loloni. Xe nenge vasimolu pa'upa'usou loxo tase­xelanenge ngato'o, la taleme pakia'inge mo nenge vilevilesi ta'oxonu xaixai noxou.

Laixe so Mosinge ta'olu imuamua'i no anu xoluxolu alavua

¹⁷ Ioxe, eni apelototosinge pakia'u no anu ualasou Tatananenge aloxo 'o. Mamu so ngamuamua'i no anu xoluxolu noxi'a tamitema noale'ale e ilamana uasi. Xo xavutalai'a uxovulaulausi.

¹⁸ Mo opone'i isivoxosi mo pakia'u. Opone'i pakia'u axone laso ita'olu vitanisi, ixolu va'axu no anu xoluxolu noxou Mosinge.

¹⁹ Ane'i ipilixinu vasime'a no anu ilixo masumasua mo i'unalai no anu xoluxolu nuni'u manina. I'oxonu ilixo axone ia imaila to uasi, opone'i ututuluousi.

²⁰ Ia loxo ngingi, la ngelavu mukalu no anu vaikala manina so Kalaisiti. La ngelavu lexe ili'ilixo anene, ulovuou vaikala manina ne uasi.

²¹ Xo tamitema mivotongengi tei xe nge'una noxou Iesua laso vaikalasou manina ne mupalasi noxinge.

²² Masi mipelototosinge so xoluxolu noxinge tei lexe ngamulinu uasi. Xo anu susu tava'u no vasimenge anu loxo lavalava e usu'asinge. Usu'asinge mo uxalixu masamasaxa masua ane u'oxo lolongenge. Laso utotomu ngasi­sinu uxexe.

^23-24 Ngasisinu ane tei mo utotomu ngasakinu xoluxolu alavua so usu'asinge. Xo no anu xoluxolu alavua ne Mosinge molu muxalingenge tamalemalenga mo talapu. Mo so axone la xavutala no opongengi uxali alavua mo laixe kalumo.

²⁵ Ioxe, laso vaikala kalakalavoi la ngamatapianusi. Ngalemolu vai­kala maninasi noxinge ngato'o. Xo nenge mukalusi 'o nenge vasimolu Kalaisiti, laso noxou la nenge vilesisi.

²⁶ Loxo ngaxamulinu la'ia no opongengi la ngalaxa'i laixe xo masi ngasusu ane. Mo mamu so la'ia noxinge uxolu aso loloni.

²⁷ Mamu so ngalosou Uluaou vote'i so utovongengi so ngalai no anu susu.

²⁸ Nini ena'ei nalavusou napakali la natalo no anu mi anene. Natalo mo naxaxai so naxalixu mimi laixe no avonesi. Mo so axone la nasu'uline'i tamitema ane i'a mimi o xa'a la'ilali uasi.

²⁹ Mo mamu so ngalemolu vaikala nuni'u ula no anangenge. Ngalemolu vaikala so mamatolasi so u'oxonu pakia'a ane'i ane opone'i tu'uma­xusou mi vile. Xo axone la ane'i ta'ei ilomusou vaikalamengi la usu'uline'i laixe ane.

³⁰ Mo nga'o­xonu mi vile so Mosinge anu Ulenu Laixe oponu tu'umaxu uasi. Anu Ulenu ne Mosinge mulosinge so usosovosinge lexe ngingi tamite­maou. Anu mulotongengi mukalu la anu sosovo noxou ne uxolu noxinge umomomo no anu voxo so uno'inge avile.

³¹ Ngingi masi ngamatapianu vaikala ane so u'oxonu opongengi sixula. Mo la'iangenge o ngakaitolongengi ngato'o uasi. Mo mamu so nga'oto mo ngato'otomenge no anu vaikala. Mo ilixo so ngamunumunuxa'a tamenexinge so ngalu'ene'i ne ngapilixinusi.

³² Ngapilixinu mo nga'oxo aloxo 'o. Ngingi nga'oxo laixe mo tangengingenge ngato'o. Xo susu ma'ia noxi'a tamenexinge la uxolu no xavutalamengi avile uasi. Nga'oxonu loxo Mosinge. Xo ngingi ngexolu noxou Kalaisiti laso anu muiasou susu noxinge avile.