2 Timoti 4 - Ata New Testament

Pelototo lexe Timoti xavinu so ulanu vaikalaou Mosinge

¹ No voxo ili'i loxo Kalaisiti Iesua une'e upala'a so ukingi la anu utongone'i tamitema muka­lusi, ane'i ane imamauli xe ane'i ane misoisoli. Laso no ie'i Mosinge ilou Kalaisiti Iesua la eni apelototosine pakia'u aloxo 'o.

² Xavineni so navotovo­tosou Mosinge vaikalaou. Mamu so nakalipalanu voxo se'i lexe taimusou u'isalili xe voxo se'i lexe taimusou uasi. Naxolu nalalaxi so nalanu no anu voxovoxo mukalusi. La nale­molu vaikala ane so uto'o­molu opone'i tamitema so susu noxi'a mo ane so uxiunu opone'i. Naxolu oponeni se'isisi manina noxi'a so napelototosi'a mo na'isali­linoxu Mosinge vaikalaou noxi'a.

³ Xo nalomu, voxo une'e la tami­tema latala ilomuanu vaikala ane pumuxu mo manina. Ane'i imasa­xau vaikala ane ukikisou sangali'a xo ixamulinu sixisou no anu vaikala iouiou. Ixamulinu axone laso i'ava'avalia tamitema so ine'e ipili­xinu vaikala ane i'osasou so ilomusousi.

⁴ Laso itomunu sangali'a no anu vaikala manina ka ikisinu so ilomuxu a'alo e tamitema me'a mixalixusi.

⁵ Ia loxo nini, la xavutalameni lamana so natilovo­sou mimi mukalusi. Loxo naxalisou navunavu la natavulenusi mo na'o­xonu xaixaimeni e so nalanu vaikala laixe. Xaixai ane Mosinge mupilixinu noxine ne, namomoxu avilesi.

Polu mulemolu soli noxou lexe alaimanasi

⁶ Ioxe, voxo mune'e alai mukalu so sialuxo unixi ula aloxo uaini e inixi'u so lexe noxou Mosinge. Voxo so alutu a so uxali 'oe.

⁷ Eni eiave xavileli no anu lesisi so mauli 'o mo exali avile no anu sosovo no telexu. Xe no anu lopala na'a nenge la elaxa'inu laixe.

⁸ La palaisi na'a xeli so itema uuini no anu lesisi a mulalaxi muai mukalu xo Mosinge mumoxo'ilo lexe eni alapu no iou. Xe Tatananenge e mosou tilovo mulapusi, la ulosilo palaisi ne no anu voxo olele. Ia enisi uasi, anu ulosi'a ane'i mukalusi ane opone'i u'oxoxu voxo so pala'axu kalumo.

Vaikala lexe Timoti upalea une'e noxou Polu

⁹ Laso nini napalea nane'e noxilo 'o.

¹⁰ Xo Temasi mu'osasou xoluxolu so lialia 'osi la muxexesilo mo mulai no taoni Tesalonaika. Xe Kelesenisi mulai ne Xalesia polovinisi. Xe Taitusi la mulai no xale lia ne Talimesia.

¹¹ Anu Lukusi noxou taxolu 'o. Laso loxo nane'e la nano'u Maki une'e kalumo xo anu itema laixe so usu'ulileli no anu xaixai.

¹² Noxou Tikikusi la epalusou mulai ne Epesusi.

¹³ No voxo loxo nane'e la nano'u saketi veveni ane e'italonu no tasou Kalipusi ne Toloasi. Xe nataxusou lavulavuku mukalusi, ia lavula­vuku ane mi'oxonu no anu tami­soposi sosoie'i la taneniou u'isalili so nane'enu kalumo.

¹⁴ Alekisana anu itema so u'oxonu mimi no anu valasi anu muxalixu tu'umaxu iouiou noxilo. Anu Tatananenge molu ukolinu u'isalili no anu ilixo noxou.

¹⁵ Laso nini kalumo nalaxa'i laixe noxou itema ne xo anu xavinu so muxililiou votovoto noxixe.

¹⁶ No anu alaxu tei so etulu ekolinu vaikala no lakoti la evile so uvalaxo uasi, ane'i mukalusi mipaxelesilo. Eni amasaxau lexe Mosinge ulosi'a lakolisou ilixo ne uasi.

¹⁷ Ia mi vile uasi, xo Tatananenge molu muveisa'ileli mo mu'oxo pakia'ilo. Laso maixene eni emomomo so elanu vaikala laixe loloni avile so tamitema noale'ale 'o milomusou. Xe anu mu'umeleli aloxo no anu laioni anaxu.

¹⁸ La anu axonesi Tatananenge upamaulileli no anu mimi masumasua a so i'oxonu noxilo. Upamaulileli mo ulaxa'ileli laixe so u'unalaixilo axolu no anu ane so molu u'uli laxune'i tamitemaou. La nenge ta'itinu ualasou ulai ulai mole utalo uasisi. Vaikala ano'o maninasi.

¹⁹ Nalemolu aso noxilo noxi'a Pilisila ilou Akuila xe noxi'a tatemanu tasou Onesivolusi.

²⁰ Elasitusi a uxoxolu ne Kolini ia Tolovimusi musiki laso e'italonu muxolu ne Miletusi.

²¹ Xavineni so naxali tei no anu tau lelemesou. Ane'i Iuvulusi xe Putenisi xe Linusi xe Kolotia oli'a tavivinge talopala lai 'o mukalusi mikalanu aso noxine.

²² Tatananenge a uxolu no anu uleneni xe iaiama noxou usu'asinge ne mukalusi. Anu anesi.