2 Timoti 3 - Ata New Testament

Ilixone'i tamitema no anu kaluxusou voxovoxo

¹ Ia nalavu aloxo 'o. No anu kalu­xusou voxovoxo la tu'utu'umaxu iouiou uxali.

² Xo no voxo ne la tamitema me'a imasaxai'amo xe opone'i u'oxoxu lamolisi xe i'itine'i no anu vaivaikalai'a xe itoxa'a xe ipupui. Ane'i ilomuxa'a tamami'a taneni'a uasi xe loxo tamitema isu'uline'i axova la ilemolu laixesou uasi xe imatapianu mimi ane Mosinge u'osasou.

³ Mo ilavusou vote'i so isexelaxa'a leviani uasi xe vote'i uasisi so isolixu tu'umaxu loxo uxali no taine'i. La imunu­munuxa'a tamenexi'a so ilu'ene'i xe masamasaxa no vasime'a upamu­xane'isi. Ane'i ikasi'a no anu otosi xe imatapianu ili'ilixo aneva laixe.

⁴ Mo aloxo 'ola. Loxo vaimomo 'o ivaitami noxou evile la masi ne'iela ixiunu tumali'aou. Ane'i ipalea ilai no anu xavutala vuluvulusimo xe ikalavoi lexe ane'i tatiatila manina. La imasaxau xalo u'ela no anu osa vitanisi, ia Mosinge, la isexelaxu to uasi.

⁵ Tamitema ane xo ne isaxi lexe imulinu ili'ilixo ane Mosinge u'osasou, ia mi ne no anu sosousi, temanu to uasi. Xo xavi manina no anu vaikalaou Mosinge la ixiunu tumali'aou. Laso na'umenu vasi­mene mo naxolu va'axu noxi'a tamitema ane xo ne.

⁶ La tamitema axone ikamulinu vote'i so i'una'una no tatani so ixalisi'a tasema ane itilovo laixe uasi ka iuauoixa'a no anu vaikala. Ane'i tasema ne ixamulinu tane'i uto'otome'axu susu la'olu noxi'a mo masamasaxa noxi'a upalupalusi'asi.

⁷ Tasema ne opone'i ututuluou lavulavu so imolo, ia vaikalaou Mosinge temanu anu manina, la upalasi noxi'a uasisi.

⁸ Anu tatei la Tianesi ilou Tiamivilesi mixililiou Mosisi la anu axonesi noxi'a tamitema ano'o so ixililiou vaikala temanu anu manina. Tamitema ne xavutalai'a xalusousi mo ixolu va'axu avile no anu lopala na'a nenge.

⁹ Ia mi vile uasi, ane'i imomomo so isolonu avile uasi. Xo anu masi upalasi no ie'i latala lexe ane'i ixovulaulausi aloxo tamitema mitongone'i Tianesi ilou Tiamivi­lesi lexe mipune'isi.

Pelototo lexe Timoti ukamaku­lunu vaikalaou Mosinge

¹⁰ Ia nini la nemulileli no anu vote'isou epela'axu Mosinge vaikalaou noxi'a tamitema xe no anu ili'ilixoleli xe no anu mi ane taleli u'oxoxu so a'oxonu. Mo neutitiieli no anu lopala ilou sexela noxilo xe no anu vote'i so opoleli pakia'uou xaixai mo loxo tu'umaxu uxali la atavulenusi.

¹¹ Mo nelavu­sou xilili xe navunavu e etavulenu no avo'a tamitema ne Anitioki xe Aikoniamu xe Lisitila. Auo, xilili etavulenu no tuatuala ne mu'oki manina, ia Tatananenge mu'umeleli no anusi.

¹² Xo manina, tamitema mukalusi ta'ei ane ipita noxou Kalaisiti Iesua mo imasaxau xolu­xoluxa'a ulovou masaxa noxou Mosinge, la itavulenu xililisousi.

¹³ Ia tami­tema tamasua xe ane'i ane so ikalavoi kaio itulu no anu tani­tanixa'a toxonesi, la isusu xo mole utila avilesi. Ane'i ikakalavoine'i leviani xe ane'i kalumo imalukusou kalakalavoi.

¹⁴ Ia loxo nini, la mimi ane nexalisou lavulavu no anu mo nemulaxu pakia'u no taneni, la naxolu no anu anenesi. Xo nini nelavusou xoluxolunexe nexi ane tepela'inexu ne.

¹⁵ Mo tatei mi ne molomoloxenesio la nesoko'u so nalavulavu no anu lavuku so Mosinge vaikalaou mu'isalili. Lavu­ku ne xavinu so mulosine lavulavu u'asi'asi ane mulosoienixu vote'i so nalopala noxou Kalaisiti Iesua ka nexalisou pamauli noxou.

¹⁶ Vai­kala e uxolu no anu lavukuou Mosinge loloni la mu'avuti no anu tauxu. Mo anu laixe manina no anu xaixai so tapela'a tamitema xe so tatalosi'a loxo ipolo va'axu xe so talovonixi'a xe so tapamaxune'i no anu ilixo mulapusi.

¹⁷ Laso axone, la itema so xaixai noxou Mosinge la umomomo no anu xo mimi so xaixai laixe mukalusi a muai no avolu mukalu ne.