2 Timoti 2 - Ata New Testament

Pelototo lexe Timoti uxolu ami vile laixe noxou Kalaisiti Iesua

¹ Ioxe laso alixeli, utotomu na'ita­loneni mo so iaiama noxou Kalaisiti Iesua u'oxonu pakia'ine.

² Xe no anu mimi mukalusi ane nelomusou noxilo no ie'i tamitema latala, la napilixinu noxi'a tamulu ane nalopalane'i lexe isaxila'u laixe. Mo so axone la ane'i imo­momo so ipela'axu leviani kalumo.

³ Xe noxine, la na'una napita noxixe no anu oto 'o so nini kalumo natavulenu tu'umaxusou aloxo ami laixe noxou Kalaisiti Iesua.

⁴ Xo noxi'a ta'ami loxo i'oxonu xaixai no anu ami la ipitanu no anu xaixai se'i so vasime'ala uasi. Ixolu opone'i ututuluou xaixai noxi'a no anu amisi, mo so tilasi'a u'osasi'axu.

⁵ Xe vile, la noxou itema so ulesisi. Xo loxo umulinu votevote'i so lesisi u'isalili uasi, la anu umomomo uasi so uno'u palaisi so itema uuini.

⁶ Xe noxou itema ane so uxaxai tatila so utounu mo usaxila'u xai kalumo. Anu itema nesi so uno'u pa'usou temanu u'uli'uli noxi'a leviani.

⁷ Taneni utaxunu latilovo e elemolu 'o laixe laso Tatananenge molu upalasinoxu laxulaxu mukalusi noxine.

⁸ Ioxe, utotomu taneniou ilusunu Teviti e Iesua Kalaisiti anu ane musoli ka mutulu mumauli, aloxo eni alavusou alemolu no anu vaikala laixe e alalanu.

⁹ Alalanu la anenesi tava'u so tamitema ilosilo tu'utu'umaxu. Ilosilo tu'u­tu'uma­xusou mole mikalavusuleli aloxo eni alasikelisi. Ia mi vile uasi, xo imomomo so ikalavusunu vaika­laou Mosinge uasisi.

¹⁰ Laso maixene loxo mi ma'ia uxalisilo la alavusou a'oxo pakia'u opoleli lexe atavulenusi, xo amasaxau asu'uli­ne'i tamitema ane Mosinge muiloune'i lexe tanoxou. Amasa­xau lexe ane'i kalumo ixalisou pamauli e noxou Kalaisiti Iesua mo so i'una no anu xoluxoluxu lailaixe mo iaxu kaluxu uasi.

¹¹ Anu vaikala ano'o umomomo manina so talopalanu. Aloxo 'o. Loxo nenge tepita manina noxou so tesoli, la nenge tapita noxou kalumo so taxolu tamauli.

¹² Mo loxo tatulu pakia'inge so tata­vulenu tu'utu'umaxusou, la nenge tapita noxou no anu kingi. Loxo taxiunu tumalinge noxou, la anu kalumo uxiunu tumalou noxinge.

¹³ Ia loxo nenge tavavalima lexe tamulinu xe ili'i oponenge usasalo, la anu oponu uxiu uasi. Anu uxalixu nene'axu vavalima noxou xo anu umomomo so uxiunu oponuou vaikalaou uasisi.

Pelototo lexe Timoti xavinuou xaixai noxou Mosinge

¹⁴ Ioxe, utotomu nalivunoxu xavu­talai'a Mosinge ta'olu no anu vaikala ano'o mo napelototosi'a pakia'u no iou Mosinge lexe mamu so ipelesou anaxa'aou laxu vaikala kitukitu. Xo ilixo axone uxalixu nene'axu to uasi, anu umasuane'i tamitema ane ixolu ilomusousi ane.

¹⁵ Xe nini la xavineni so naxali itema so xaixai laixe noxou Mosinge mo so u'osasinexu. Laso na'isalilinoxu laixe vaikala manina xo axone la mi vile so namaila­mulinu no iou uasi.

¹⁶ Ia na'umenu vasimene no anu vaikala lexalexa vitanisi ane Mosinge u'osasou uasi. Xo vaikala axone ulapune'i tamitema no anu ili'ilixo ane upolo va'axu no anu masaxa noxou avile.

¹⁷ Vaikala axone u'ani usuku aloxo xalevi kole 'o. Ane'i tamei noxi'a tamosou vaikala axone a Imeniusi ilou Viletusi.

¹⁸ Xo ilou mipolo va'axu no anu vaikala manina mo ivikala lexe Mosinge mutulusi'a tamitema no anu soli mukalu. La no anu vaikalai'a ne mivila'isou lopalai'a leviani.

¹⁹ Ia Mosinge mutulusou tava'u pita noxou mo anu a ututulu pumuxusi. No anu tava'u ne mukaukavunu vaikala aloxo 'o, “Tatananenge mulavu lexe tami­tema ta'ei ane tanoxou mu'isa­lilisi.” Mo aloxo 'ola, “Tamitema ta'ei mukalusi itavulenu ualasou Tatananenge la ikalipalane'i no anu ilixo masumasua.”

²⁰ Mo avikala aloxo 'ola. Loxo tani ane tiatila la lisi iouiou masi uta'olu ne. Se'i i'oxonu no anu koli xe siliva mo se'i no anu ovu xe pilika. Laso lisi ane lailaixe ne, anu so voxo mutiatilasi ia ane laixe malaxo uasi, la ino'u no anu voxo vitavitanisi 'osi.

²¹ Ioxe, loxo itema u'uinu no anu ili'ilixo masua ane telemolu mukalu 'oe, la anu uxolu loxo lisi ane ikalipalanu so xaixai laixesi. Uxolu ulalaxi so Mosou uno'u ka upamuxanu no anu xaixai aneva laixe mukalusi.

²² Laso nini, la na'umolu mo na'umesou masamasaxa ane ulavu­sou upalusi'a tamaulu. Anene na'umesou, ia mi ane so oponeni uiaveou a ilixo mulapusi xe lopala xe sexela xe xoluxolu lalavulusi. Ngingi ngoli'a tamitema mukalusi ane opone'i malemalenga so imama'u mo ikatu noxou Tatana­nenge, ngaxolu no anu anenesi.

²³ Ia mamu so namulaxu sangali­neou vaikala vuluvulusi ane tamitema me'a ixavutalanusi. Xo mi axone uxalixu oto no anu vaikalasi.

²⁴ La mamu so uokuvoi noxou Tatananenge anu itema so u'oto mo upelesou anaxu. Anu laixe so oponu lexa noxi'a tamitema mukalusi. Xe loxo se'i i'oxo pai noxou la anu oponu u'avuti uasi, utavulenu mo ukamulinu vote'i so upela'axu ilixo laixesi.

²⁵ Mo ane'i tamitema so xilili la uxaxaisi'a se'isisi so ulovonixu xavutalai'a. Xo axone la Mosinge masi uxalixu vote'i so ixiunu mo i'isalilinoxu opone'i so susu noxi'a kaio vaikala manina upalasi noxi'a.

²⁶ Ane'i loxo mi'amo no anu uoi noxou Uluaou ka mutetelisi'a so imulinu masaxa noxoumo. Ia loxo vaikala manina upalasi noxi'a laso ane, xavutalai'a ulamanasi mo ixexe no anu uoi noxou Uluaou ne.