2 Timoti 1 - Ata New Testament

¹ Eni Polu a. Eni aposeliou Kalaisiti Iesua xo no anu masaxa noxou Mosinge. Anu musosovosilo axone so apela'a tamitema no anu vavalimasou mauli e uxoxolu noxou Kalaisiti Iesua so ixalisou.

² Eni akaukavunu lapasi ano'o ulai noxine Timoti, nini na'alixeli ane asexelaxene misevile. Eni amasa­xau lexe nini naxamulinu iaiama mo mamatola mo xoluxolu lalavu­lusi noxou Mosinge anu Maminge ilou Kalaisiti Iesua anu Tatana­nenge.

Pelototo lexe mamu so Timoti umailamulinu vaikala laixe

³ Eni alemolu laixe noxou Mosinge xo taleli uai laixe no iou so a'oxonu xaixai noxou aloxo ta'ilusuleli mi'oxonu tatei. Xe no anu vaivaikala ane alemolu noxou kakau olovoxo la utotomu axavuta­laneni so apilixineni kalumo.

⁴ Mo axavutalanu mala'o loxo ieni lexaxu mulapau, la opoleli utatama so amaisine ne. Xo axone la axamulinu osa'ila tatila ane.

⁵ Xe eni taleliou lopala maninasou ane uxolu noxine ne. No anu lopala nesi la mutalupexa tei noxie xasine Loisi xe nenine Iunisi. Mo eni alavu manina no opoleli lexe anu a uxolu noxine kalumo.

⁶ Laso eni amasaxau a'avutinixine no anu mi laixe e Mosinge mupilixinu noxinge no voxo loxo emulaxu avolo noxine tatei. Mupilixinu noxinge la aloxo navusi, laso nini natautauxu so uka alavuala.

⁷ Xo nelavu, Mosinge mulosinge Ulenu la anu so u'oxonu oponenge kalaua uasi. Anu Ulenu so ulosinge xavi mo sexela xe usu'ulinenge so tapamuxanu xoluxolunenge laixe.

⁸ Ioxe, laso namaila so nalanu vaikalasou Tatananenge mamu. Xe eni amitema so lakalavusu xo noxou a, ia mamu so namaila­mulileli. Nini nano'u xavi noxou Mosinge so napita noxilo mo natavulenu tu'umaxusou vaikala laixe kalumo.

⁹ Xo Mosinge mupamaulinenge mo mu'avalinge so ukalipalanenge lexe nenge tanoxou u'isalili. Anu mi so xaixai noxinge to uasi, muxali no anu masaxa noxousi. La anene nene'axu iaiama noxou ane mupilixinu noxinge no anu vote'i e noxou Kalaisiti Iesua tei tei manina loxo voxovoxo usoko'u uao.

¹⁰ Vaimomo 'o, Itema so Pamauli noxinge e Kalaisiti Iesua a mupa­la'a mukalu, laso no anu vote'i anene iaiama noxou Mosinge mupalasisi. Kalasiti Iesua mukalu­sou xavinu soli xe no anu vaikala laixe noxou la mulamananixu vote'i so tamitema ixalisou mauli manina mo xoluxolu kaluxu uasi.

¹¹ Anu mumasaxa'ilo so axaxai­sou vaikala laixe nesi, laso mutulusilo so avotovotosou vaika­laou xe a'oxonu xaixai aposeli xe apela'a tamitemaou no anu vaikala laxu.

¹² Laso maixene atavulenu navunavusou 'o ia amailamulinu uasi. Xo anu ane alolopalanu la elavusou ilixou, mo elavu manina no opoleli lexe anu umomomo so uutululunu vaikalaou e mupilixinu noxilo 'o. Uutululunu uxolu laixe xo mo uxali no anu voxosou olele.

¹³ Timoti, nini taneniou vaikala lailaixe ane nelomusou noxilo la navulunu noxi'a tamitema axonesi. Mo nalanu no anu lopala ilou sexela ane taxalisou noxou Kalaisiti Iesua.

¹⁴ Laso mi lailaixe e Mosinge mupilixinu so nasaxila'u ne, la Ulenu Laixe e uxolu noxinge usu'ulineni so na'oxo latolosou.

¹⁵ Xe loxo nelavu, tamitema so Esia polovinisi e misu'ulileli a mixexesilo mukalusi. Ane'i tamei noxi'a ane Vixelusi ilou Elimo­xenesi milai kalumo.

¹⁶ Ia loxo noxou Onesivolusi, la eni alinga noxou Tatananenge lexe anu u'oxonu alauna noxi'a oli'a tatemanu tasou. Xo alaxu tavu'alo anu Onesivolusi ne mune'e mu'oxonu taleli muai laixe mo anu umailamulileli so akalavusu 'o uasi.

¹⁷ Xo loxo muxali ne Lomu 'o la xavinu so mukamulileli. Mukaka­mulileli xo laso muxalisilo.

¹⁸ Laso maixene alinga noxou Tatananenge lexe anu u'oxonu alaunasou no anu voxo olele. Mo ngingi kalumo ngelavu laixe no anu xaixai tatila ane mu'oxonu ne Epesusi so musu'ulileli.