2 Tesalonaika 3 - Ata New Testament

Poluena mivikalane'i lexe, “Ngingi ngapilixinexi noxou Mosinge”

¹ Mo tavivixe, mi vile aloxo 'ola. Ngingi ngalingau su'ulisixe noxou Tatananenge mo so vaikalaou upalea so ulailai no tuatuala. Laso axone la anu vaikalasou utitila a loxo muxali no taingengi ne.

² Mo kalumo la ngavikala noxou so u'oxo latolosixe noxi'a tamitema tamasua so xilili. Xo ngelavu, tavu'alo ilopala to uasi!

³ Ia ilixou Tatananenge aloxo 'o. Loxo talopalanu la ulapau vitanisi uasi. Laso anu molu u'oxonu pakia'inge mo uutululungengi noxou Uluaou.

⁴ La no oponexi nexi talavu manina lexe Tatana­nenge usu'ulingengi mo so no anu pelototo noxixe la ngingi a ngamulinu vaimomo 'o xe ili'i kalumo.

⁵ No anu masaxa noxixe lexe Tatananenge upamuxanu opo­ngengi mo so ngalavu laixe no anu sexela noxou Mosinge mo so ngatulu pumungenge so ngatavu­lenu tu'utu'umaxu a loxo Kalaisiti.

Mamu so Mosinge ta'olu ipaupauxe

⁶ Ioxe tavivixe, no anu ualasou Tatananenge Iesua Kalaisiti tavikala pakia'u noxinge aloxo 'o. Loxo tavivinge se'i xoluxoluxa'a vuluvulusi mo ilomuxu vaikala ane tevulunu noxinge uasi la ngaka­lipalangengi sevile noxi'a.

⁷ Xe ngelavusou ilixomexi texolu no taingengi lexe xoluxolunexe vulu­vulusi uasi. La ngamulinexi axone.

⁸ Xo texolu no taingengi la taloxu la'ilali no avonge uasi, mi ma'ia teno'u la telotonusi. Laso teta­vulenu tu'umaxu mo sasaiexi so texaxai aso olovoxo. Te'oxo axone mo so navungenge so ngavu'u­linexi uasi.

⁹ Loxo nexi tamasaxau la nexi laiti so tano'u su'uli noxinge no anu vasimexe. Ia uasi, tano'u uasi xo temasaxau taxali pikisa laixe no ienge so ngamulinu ilixo noxixe.

¹⁰ Xo ngelavu, nexi texolu no taingengi la pelototo e telemolu aloxo 'o. Itema loxo upauxesi la utama no avolusi, nga'itixu ani'ani uasi.

¹¹ Ia nexi telomu lexe se'i no taingengi ixoxolu vuluvulusi, i'oxonu xaixai vile uasi. Xaixai noxi'a anesi so ixixao ilexalexa vitanisi.

¹² Laso nexi tapelototo mo tavikala pakia'u no anu ualasou Tatananenge Iesua Kalaisiti noxi'a tamitema anene aloxo 'o. Ngingi ngaxolu se'isisi no anu xaixai noxinge mo so nga'ani'ani no anu nene'axu avongesi.

¹³ Mo tavivixe, mamu so kalaka­langenge no anu ili'ilixo laixe.

¹⁴ Xe loxo vile no taingengi ulomuanu pelototo noxixe no anu lapasi 'o la ngatongonu laixe mo ngavaitami noxou itema ne uasi mo so umailamulinu ilixou ne.

¹⁵ Ngavaitami noxou uasi, ia nga'oxo noxou loxo uluamengi uasi. Anu vivinge ane, laso ngapelototosou laixe.

Polu muvikala aso noxi'a

¹⁶ Tatananenge anu tava'u xolu­xolu lalavulusi molu usu'ulingengi mo so mi ma'ia uxali la opongengi uai se'isisi. Tatananenge ne a uxoxolu noxinge vilevilesi ne.

¹⁷ Eni Polu a akaukavunu vaikala aso noxinge no avolo 'o. Xo ano'o sosovo noxilo so uxolu no anu lapasi noxilo mukalusi. Ngamaisou kaukavu noxilo ano'o.

¹⁸ Iaiama noxou Tatananenge Iesua Kalaisiti a uxoxolu noxinge mukalusi. Anu anesi.