2 Tesalonaika 2 - Ata New TestamentMipela'axu mosou xilili 1 Tavivixe, tapela'ingexu lailivuxu Tatananenge Iesua Kalaisiti so upitanenge nenge'a noxou. Tapela'inge laso tamasaxau lolomu noxinge. 2 Masi no anu vaikala so pela'a o no anu votovoto o lapasi vile ikalavoi lexe noxilo la vaikala muxali noxinge lexe voxo noxou Tatananenge muxali mukalu. Tapela'inge lexe loxo vaikala axone muxali la opongengi u'avuti mo usasalo uasi. 3 Mamu so ngapele masaxa noxou itema vile so ukalavoingengi. Xo ngalomu, voxo olele uxali vitanisi uasi. Taimu so tamitema ipupuiou vaikalaou Mosinge uxali xe mosou xilili upala'a teio. Anene uxalisou mamulo ili'i. 4 Upala'a ukalu la uxililiou mimi mukalusi ane tamitema i'oxo lexe momosi'a. Uxililiou mo u'itinu lexe anu uno'u tanitanixu mimi ne so tamitema ilotu noxoumo. Mukalu la utalupexa no anu tasou Mosinge mo uvikala lexe anu Mosinge ane. 5 Xo ngaxavutalanu uasi? Exolu noxinge la elomolemolu mimi ano'o noxinge mukalu. 6 La ngelavu mukalu lexe mi ma'ia utatanuxu vote'i mo so upala'a kolokolo uasi. 7 Xo ilixo so xilili a uxolu mukalu ia upalasi avile uao. Uxoxolu axone xo xe anu ane utanutanuxusio uxexe laso ane. 8 Mosou xilili ne upala'a avile. Ioxe, anu uxoxolu xo mole Tatananenge Iesua uvau no anu tauxu. Tatananenge uvau mo ukalusou avile no anu voxo so ulivu mo upala'a. 9 Ia tei loxo mosou xilili ne uxali la u'isalili no anu masaxa noxou Uluaou. Mo no anu xavi noxou Uluaou la anu upala'anixu sosovo so xavi iouiou so u'oxo loloxa'a tamitema. 10 U'oxo loloxa'a tamitema mo ukalavoine'i no anu ili'ilixo masumasua so ixalisou mamulo. Ixalisou pamauli uasi xo loxo ilomusou vaikala manina la opone'i ulo so i'osasou uasi. 11 Laso Mosinge upilixine'i mo uxovulaulaunixa'a so ilopalanu kalakalavoisi. 12 Ane'i ilomuxu vaikala manina uasi mo i'osasou ili'ilixo masua axonesi laso ane'i ixalisou nene'axu ili'i loxo Mosinge utilovosi'a. Mosinge musosovosinge noxou Kalaisiti so upamaulinenge 13 Ia noxinge tavivixe la laixe so tavikalasinge laixe noxou Mosinge utotomu. Xo Tatananenge musexelangenge mo Mosinge musosovosinge tei tei manina lexe ngaxalisou pamauli. Xo ngingi ngelomusou vaikala manina xe ngekasou lexe maninasi laso Ulenu mukalipalangengi lexe ngingi tanoxou Mosinge mu'isalili. 14 Xo anu umasaxainge lexe ngingi ngaxali mo ngaxolu no anu iaxu Tatananenge Iesua Kalaisiti. Laso maixene anu mu'avalinge no anu vaikala laixe ane ngelomusou noxixe. 15 Laso tavivixe, ngatulu pumungenge mo ngakamakulunu vaikalaou Mosinge ane tepilixinu noxinge. Vaikala anene tepilixinu noxinge no anu ananexe o no anu lapalapasi. 16 Tatananenge Iesua Kalaisiti ilou Mosinge anu Maminge misexelanenge mo milosinge mamatola kaluxusou uasi mo miiaiamanenge. Laso ngingi ngaxolu lopala noxinge pakia'u so ngaxomaiou voxo olele. 17 La anu u'oxonu opongengi uai se'isisi mo u'oxonu pakia'inge so nga'oxonu xaixai noxou mo ngalanu vaikala laixesi. |
Copyright 1999 New Tribes Mission, Sanford, FL 32771-1487
New Tribes Mission