2 Pita 2 - Ata New Testament

Tatisa kalavoi i'avuti so ixovulaulaunixi'a talopala

¹ Tatei la tapolopeti kalavoi se'i mi'avuti no taine'i Ta'isilaeli. La anu axonesi, xo tatisa kalavoi se'i masi ixali no taingengi ka ipakisinoxu votovoto kalavoi u'una so umamulonu lopala noxinge. Tamitema anene Tatananenge mupilixinu lapesi'a kalumo ia ane'i ixililiousi mole me'a ixalixu mamulosi'a paleasi.

² La tamitema tavu'alo ilomuxa'a ka imuline'i no anu ilixo mukilikalu noxi'a. Xe tamitema latala imaisou ilixo noxi'a laso ivikala masuaou Vote'i so vaikala manina.

³ Mo ane'i tamitema ne iisuxu mimimengi laso ito'omolu kusingengi mole itaxusousi. Ia tatei la Mosinge mulalaxinu mamulo so ukolinu susu noxi'a mo anu a uloloxa'a, anu uai uasi.

⁴ Aloxo ngelavusou, tatei loxo ta'angelo mose'i misusu la Mosinge iou uvaxaou susu noxi'asi uasi. Anu mukusai'a musu'ane'i no anu navu so mamulo mo so ixolu ikalavusu no isivoxo la ixomaiou voxo so ixalisou lakolisou susu noxi'a.

⁵ Xe noxi'a tamitema so tatei kalumo. Ane'i mixililiou Mosinge la anu iou uvaxauou susu noxi'asi uasi. Anu mumamulone'i no anu anipa tatila e muxalixu so unononu lialia mukalusi. Ia Noa e itema so mulanu vaikala mulapusi oli'a tamitema 7-si Mosinge mu'u­tululune'i.

⁶ Mo axone kalumo noxi'a Tasotomu xe Taxomola. Xo Mosinge mumamulonu taoni tamei ne oli'a tatemanu no anu navu mole lomuloxusi a muxolu. Anu mu'oxo axone mo so loxo tamitema ta'ei ixililiou ili'ila la ino'u lavulavu no anu mi e muxalisi'a tatei ne.

^7-8 Ia noxou itema Lotisi muxolu mulapu no taine'i tatemanu taoni tamei ne. Anu muxolu no taine'i xe voxo­voxo utotomu mumaisou ilixo noxi'a so mixililiou Mosinge la tanu e mulapu ne navuxu misevile. Mo vote'i so tamitema tamasua mimulinu masaxa no anu vasime'a ne muvau oponu tu'umaxu. Ia Mosinge mu'umenu Loti la uxalisou mamulo aloxo ane'i ne uasi.

⁹ Laso ane, anu upalasi lexe Tatananenge ulavusou vote'i so u'umene'i tamitemaou Mosinge no anu tovotovo loxo uxalisi'a. Xe anu ulavusou vote'i so ukolikolinu susu noxi'a tamitema so kilikalu xo mo uxali avile no anu voxo so Lakoti noxou.

¹⁰ La no anu ane so ukolinu susu, la u'oki noxi'a tami­tema e ilavusou ipilipilixinu vasi­me'a so imomoxu masaxa noxi'a nuni'u. Xe tamitema ane xo ne imatapianu xavi noxou Tatana­nenge so u'uli laxune'i. Ane'i tatisa kalavoi e ixali no taingengi to ne, ane'i tamitema so oxopai mo i'itine'i so imulinu masaxa noxi'amo. La ane'i imama'u uasi, ilemolu vaikala so pupuiaxi noxi'a ta'angelo e xavixavine'i musuku so tualasou Mosinge.

¹¹ Ane'i ta'angelo ne xavine'i uua'ulixa'a tamitema so oxopai ne avile ia ane'i ito'ome'a no anu vaikala no iou Tatananenge uasi.

¹² Xo ane'i tamitema to ne xavu­tali'a uasi aloxo tamisoposi no lialia xo masaxa ma'ia no anu vasime'a la imulinusi. Mi ma'ia tamitema ne ilavusou uasi la ivikala masuaou vitanisi. Xe noxi'a tamisoposi la ixaxali so tatetelisi'a ka tave'a isoisolisi. La anu axonesi, tami­tema ne tava'u vile uasi, ixolu xo laso ixalisou mamulo aloxo tamiso­posi nesi.

¹³ A ane'i ilavusou i'oxonu masuasi laso maixene ixalisou lakolisou e so imasua. Mo imaila to uasi, xo i'oxonu pati so iie mo i'oxone'i vuluvulusi a no asosi. Xe ine'e so ngapitane'i no anu ani'ani noxinge ia no opone'i la i'osa so i'oxo lolongenge, xo loxo manina la nuni noxi'a usu'asinge mo ulu'enu ualasinge to.

¹⁴ Xe loxo isaxisi'a tasema la ie'i uisuxa'a mo ixavutalanu ilixo nuni'usi. La ima'ila no anu susu noxi'a sevile uasisi mo ilavusou ilapune'i ane'i ane tane'i mamalaxusi kalumo. Ane'i utotomu iisu'isuxu mimi'a leviani la anu loxo opone'i musi­kulu laixe no anusi. Ane'i ne, laili so mamulosi ane.

¹⁵ Xo ane'i mipolopepenu vote'i manina mo mipolo va'axu mole misusususi. Ane'i mimulinu vote'i noxou Vala­mu e Veoli olu xo anu mu'oxonu ilixo masua so uxalisou lapesou no anu lamoli e oponu mututuluou.

¹⁶ Xe anu a so u'oxonu ilixo masua nela sila xolinu itema mula no anaxu tonikiou. Xo tatoniki ilavu­sou ivikala uasi ia no voxo ne Mosinge mu'oxo axone so ulavixu Valamu mo utanuxu no anu ilixou xovulaulau ne.

¹⁷ Tamitema ane xo ne la aloxo lexa luxu ane esi'esisi mo ane'i loxo sauma ane uxali ia la'ave utavulenu mole tasiauxu vitanisi. Ane'i ne tanixa'a isivoxo e tamokikisi a mulalaxisi'a.

¹⁸ Ane'i tamitema ne i'itine'i kaio anaxa'a ulexa no anu vaikala vuluvulusi. Xe ane'i ta'ei ane a isoko'u so ilala se no anu xoluxoluxa'a tamitema so isivoxo la tatisa kalavoi ne ipalea ilapune'i i'una imomomoxu masamasaxa nuni'u no vasime'ala.

¹⁹ Ilapune'i no anu polomisi aloxo 'o, “Loxo ngamulinexi la ngaxolu lalavulusi ane, xo mi ma'ia ngama­saxau la nga'oxonusi.” Ivikala axone ia ane'i me'a ixolu tasileviou ili'ilixo e uxalixu mamulosi'a. Xo mi ma'ia upalupalusinge la anu tilasinge mo nenge a tasileviousi.

²⁰ Xo tamitema imuline'i ne a mino'u lavulavu noxou Iesua Kalaisiti anu Tatananenge e mosou pamauli mo a mi'umene'i no anu ilixo nuni'u so lialia 'o. Ia loxo ilivuou mo i'amo no anu xe uua'ulixa'ae la xoluxoluxa'a uma­sua avile mole uua'ulixu ane tei loxo ixiunu ilixone'i uao.

²¹ Anu masi laixe loxo ilavusou vote'i so taxali talapu no iou Mosinge uasi. Xo loxo 'o io ilavusou ia ixiunu tumali'aou votovoto malemalenga e milomusou ne.

²² Mi e muxalisi'a ne mumulinu mu'isalili vaikala manina tamei aloxo 'o, “A'a u'exi ukalu la ulivuou so u'oula.” Xe vilela lexe, “Meme i'ulo no lexa ukalu la ilai imalinga no pitala.”