2 Pita 1 - Ata New Testament

¹ Ioxe, eni Saimoni Pita a. Eni amitema so xaixai noxou Iesua Kalaisiti mo a aposeliou. Eni akaukavunu lapasi 'o ulai noxinge ngingi ane ngexalisou lopala manina iou vilesisi noxixe 'o. Vote'i so ngexalisou lopala ne a no anu ilixo mulapusi noxou Iesua Kalaisiti e Mosinge xe mosou pamaulisinge.

² Ngingi a ngala­vulavu noxi'a Mosinge ilou Iesua anu Tatananenge laso eni alinga lexe lavulavu ne u'oxonu iaiama ilou xoluxolu lalavulusi uleme mo ulolutu no anu mauli noxinge.

Mosinge musosovosi'a tamitemaou lumamo

³ No anu xaviou Kalaisiti so uxolu Mosinge la muitimenge mimi mukalusi so taxolu muamua'inenge no anu ili'ilixou Mosinge u'isalili. Mu'itimenge axova? A no anu vote'i e so molu mupala'anixu noxinge so talavusou. Mupala'a­nixu noxinge xe temaisou lexe anu xoluxoluxu iaxu mo lailaixe mu'u­li'uli, la anene vote'i so mu'ava­linge.

⁴ Anu ane, anene vote'isou so muxalixu nene'axu vavalima noxou xo muitimenge mimi lailaixe ane oponenge uleleilaxu. Mu'itimenge mimi lailaixe ne mo so no anu vote'i anene la nge'una ngepita no anu xoluxoluxu Mosinge u'isalili. Nge'una no anu xo mu'umengengi no anu masama­saxa masua e ulavusou upalusi'a tatemanu lialia no anu mamulosi.

⁵ Laso maixene noxinge, la xavingengi so ilixo laixe ukei ilou lopala noxinge mo lavulavu laixe ukei ilou ilixo laixe.

⁶ Xe no anu anene la ngapitapitanu no anu ano'o kalumo. Ngautululunu vasi­menge no anu masamasaxa masua mo ngatavulenu tu'umaxu aneva uxalisinge mo muamua'ingenge aloxo Mosingesi.

⁷ Xe ngapitanu no anu ano'ola. Nga'oxonu alau­nasi'a tavivinge talopala mo ngasexelangenge ngato'osi.

⁸ Loxo telemolu, ngingi ngexa­lisou lavulavu manina sou Tatananenge Iesua Kalaisiti. Laso loxo ili'ilixo laixe ano'o upita no anu lavulavu ne mo uleleme xe ulolutu noxinge la xoluxolungenge xalusou vitanisi uasi, anu uxalixu temanu laixe.

⁹ Ia loxo ili'ilixo ne uxolu noxou itema uasi la anu loxo iou isivoxo mole usaxisaxi uasisi. Xo itema ane xo ne anu tanuvulusi lexe susu ma'ia mu'oxonu la Mosinge mukalusou tina'uxu mo mu'uinu no anu mukalu.

¹⁰ Laso ane tavivilo, xavingengi avile so ngapala'anixu no anu ilixomengi lexe anu manina, anu mu'avalinge mo muiloungengi lexe ngingi tamitemaou. Xo loxo ngamaxa'u lexe mi ne maninasou, la vote'i so ngatulatulaki no anu lopala na'a ngingi uasi.

¹¹ Mo axone la ngalavu lexe aitenga u'alixaisinge avile so nga'unalai ngaxolu no voxo loxo Iesua Kalaisiti anu Tatananenge mo anu Itema so Pamaulisinge u'uli laxune'i tamitemaou kaluxu uasi.

¹² Xo manina, vaikala anu temanu manina ano'o ngelavusou mo a ngetulu pumungenge no anu mukalu. Ia amasaxau lexe tange­ngivulusiou uasi laso maixene utotomu alalaxinu vaikala so alivunoxu xavutalamengi no anu.

¹³ Mo axamulinu lexe anu laixe so loxo axolu no vasimelo so lialia 'osio la a'avutinixinge so xavu­talamengi ulivuoula.

¹⁴ Xo eni elavu lexe maxuveni uasi la axexesou vasimelo so lialia 'o. A Tatananenge Iesua Kalaisiti molu mupela'ilo axone.

¹⁵ Laso mai­xene xavileli so apelapela'inge mo so loxo asoli la vote'i uxolu so xavutalamengi ulivulivuou vaikala manina ne.

Ta'aposeli misaxisou iaxu Mosinge mupala'a a noxou Kalaisiti

¹⁶ No voxo loxo tepela'inge lexe Tatananenge Iesua Kalaisiti une'e no anu xaviou tatila la tamulinu a'alo ane tamitema me'a ixalixu no anu lavulavu noxi'a to uasi. Xo nexi texolu mo temaisou xavinu lamanaxu so uxolu Mosinge no iexi lavo'onu 'osi.

¹⁷ No voxo ne Mosinge anu Maminge muxolu no anu iaxu xoluxoluxu no tualasou la muvikala laixesou ilixou Kalaisiti mo mu'itinu ualasou lexe, “Ano'o alixeli ane asexelaxu, eni a'osasou misevile.”

¹⁸ A nexi mexe telomusou xolinu molu no tualasou Mosinge no voxo loxo noxi'a texolu no la'olu e Mosinge musosovosou ne.

¹⁹ Mi e tesaxi­sou ne muvalaxu vaikalai'a tapo­lopeti e uxolu no anu Mosinge vaikalaou laso maixene lopala noxixe no anu pakia'u e pakia'u avilesi. Vaikala ne anu loxo lalamo so uka no anu tanixu isivoxo xo mo Kalaisiti uxali uieisou opongengi aloxo taoto so maxasesela uiei no loxotolo. Laso anu laixe so ngingi kalumo xavutalamengi ututuluou vaikala anenesi.

²⁰ Ia mi vile mutiatila so ngala­vusou aloxo 'o. Umomomo uasi so itema vile uno'u vaikalai'a tami­tema so pela'a e uxolu no lavukuou Mosinge kaio ululusou laxu no anu lavulavu noxoumo.

²¹ Xo vaikala so pela'a vile tava'u no anu masaxa noxou itemamo uasisi. Vaikala ne muxali loxo Ulenu Laixe mu'avu­tinixi'a tami­tema so milanu vaikala ane molu noxou Mosingesi.