2 Kolini 9 - Ata New Testament

Polu mupelototo so vote'isou ipitanu avo'a

¹ Ioxe, tava'u uasi so akaukavunu vaikala piena so su'uli ane ngakalanu noxi'a tamitemaou Mosinge mu'isalili.

² Xo eni elavu lexe opongengi mulalaxi no anu mukalu. Mo alaxu tavu'alo ea'alo­ngenge so a'itinu ilixomengi noxi'a Tamasetonia lexe, “Ai, ane'i Ta'akaia ne milalaxi lumamo, a misoko'u no tau ie mulai 'oe!” Xe ane'i milomu lexe ngingi nge'osa so ngapitanu avonge axone la mu'avutinoxu opone'i tavu'alo noxi'a kalumo.

³ Ia eni amasaxau lexe vaikalamexi so te'itingengi axone ulapau vitanisi uasi. Ama­saxau lexe ngalalaxinu su'uli ne laixe, laso maixene epalusi'a tavivinge 'o mine'e noxinge ne.

⁴ Nexi talopalangengi lexe nga'oxo loxo ngelemolu ia loxo ane'e noxinge ili'i xe Tamasetonia se'i noxi'a takei la masi axova? Loxo taxali xe ngalalaxi uasi, la maila une'e noxixe xe ngingi kalumo ane.

⁵ Laso evikalane'i tavivinge 'o lexe i'uli ine'e noxinge so iva'isungengi no anu lalaxisou su'uli lailaixe ane ngevavalimasou mukalu. Mo so loxo ane'e la tamitema imalei lexe ngingi menge nge'osa so ngapilixinu su'uli lailaixe ne, itema vile usoungengi no anu uasi.

⁶ La tangengiou vaikala ano'o laixe. Itema utotou isusu'a se la umolou temanu isusu'a se kalumo. Xe itema utotou ulolutu la ulolutuxu temanu kalumo.

⁷ Laso ngingi vilevilesi ngaxavutala laixe tei kaio ngapilixinu mi ma'ia nga'osa so ngapilixinu ne. Mamu so opongengi tu'umaxu o ngaxa­mulinu lexe itema usoungengi no anu. Xo Mosinge u'osasou itema ane oponu lexa so upilixinu su'uli.

⁸ La Mosinge umomomo so upixi­vangengi no anu mimi lai­laixe so xoluxolu. Laso no anu xaixai laixe aneva la vote'i uxolu xo mimimengi umomomo xe se'i no latanula.

⁹ Mosinge vaikalaou ulemolu mi ne aloxo 'o, “Itema ane upilipilixinu avolu noxi'a ta'olo­xola la anu loxo itema upeipeinu ngiangiaxu no xai. Ilixo ulapu noxou itema ne uxolu kaluxu uasi.”

¹⁰ Ioxe, Mosinge molu uxalixu ngiangiaxu so itema utapu'u no xai xe anu molu uxalixu temanu so ani'anixu itema ne. La anu axonesi noxinge kalumo so ngaxaxai no anu ilixo ulapusi. Xo anu molu ulosinge mimi so ngapilipilixinu xe anu molu uxalixu nene'axu lailaixe no anu.

¹¹ Mosinge upixi­vangengi axone mo so ngingi kalumo avonge temanu noxi'a leviani. Xe loxo nexi talaixu avonge temanu ne noxi'a, la anene uxalixu osa no opone'i so ilemolu noxou Mosinge.

¹² Xo vaimomo 'o xoluxoluxa'a tamitemaou Mosinge no anu vasime'a ne loxo xalusousi. Ia loxo su'uli noxinge uxalisi'a la uana'ana mole ukasavalasi no anu vaikala laixe tavu'alo ilemolu noxou Mosinge.

¹³ Laso no anu su'uli noxinge ne la upala'anixu ilixo laixe noxinge no ie'i tamitema. Xo anu upalasi noxi'a lexe anene nene'axu vaikalamengi ngalemolu lexe ngelomuxu vaikala laixe so Kalaisiti. Xe ane'i imaisou avonge temanu ulai noxi'a xe noxi'a leviani ne la ane'i i'itinu Mosinge ualasou noxinge.

¹⁴ La ilavu lexe iaiama noxou Mosinge mulolutu noxinge. Laso loxo ivikala noxou so ipilixingengi la tane'ingenge misevile.

¹⁵ Uo, vai­kala axova so talulusou mi lailaixe Mosinge mu'itimenge? Ia mi vile uasi, nenge'a tavikala laixesou noxousi.