2 Kolini 8 - Ata New Testament

Talopala mipitanu avo'a so su'ulisi'a Taiutea

¹ Ioxe tavivixe, nexi tapalo mata­nangengi no anu iaiama noxou Mosinge ane mu'avutinoxu no taine'i tatemanu pitapita ne Masetonia polovinisi.

² Xo ane'i mita­vulenu tu'utu'umaxu tatila mo mixolu avo'a muxaxasi. Ia Mosinge mu'avutinoxu osa noxi'a mo avo'a temanu mulolutu so mi'alaunasi'a tavimo'a talopala.

³ La avikala lamana lexe ane'i vilevilesi mipi­lixinu lamoli ta'eimo ane'i me'a mixamulinu lexe imomomo no anu. Ia italo axone uasi, mipitanu se'i no latanula, mole me'a mikalusi'a avile.

⁴ La mikatu noxixe mo miuolotete lexe avo'a kalumo upita no anu su'ulisi'a tamitemaou Mosinge u'isalili ne Iutea ne.

⁵ Nexi te'oxo lexe masi isu'uli se aloxo 'osi, la ua', milolutuxusi. Xo tei la ane'i mipilixine'i noxou Tatananenge xe mukalu la mimulinu masaxa noxou Mosinge so mipilixine'i noxixe.

⁶ Mala'o la Taitusi musoko'u so u'avutinoxu iaiama no taingengi. Laso nexi pakia'ixe noxou lexe anu ulivu noxinge so usivitanoxu xaixai anene avile.

⁷ No anu mimi mukalusi nga'oxonu la nene'axu mulolutusi. Aloxo 'o. Lopala noxinge mo vaikala laixe noxinge mo lavulavumengi mo masaxa noxinge noxou Tatananenge mo sexela noxinge e te'avutinoxu ne, anene mukalusi mulolutusi. Laso no anu xaixai so iaiama ano'o la ngalolutuxusi kalumo.

⁸ Ia amulaxu lo noxinge no anu uasi. Epela'inge lexe ane'i leviani mi'osa so isu'uli axone mo so utovonu sexela noxinge. Mo so axova, ngingi kalumo nga'osa so ngasu'uli axone o uasi?

⁹ Xo ngingi ngelavu mukalu no anu iaiama noxou Tatananenge Iesua Kalaisiti. Anu muxolu no latanu mimi avile ia anu muxali loxo oloxola vitanisi so usu'ulingengi. Mo so no anu vote'i so mu'oloxola axone la anu mumulangenge no anu latanu mimi avile.

¹⁰ Ioxe, eni apala'anixu xavuta­laxeli noxinge no anu xaixai so ngapitanu avonge. Xo no anu tau ie mukalu 'o la ngesoko'u tei mo opongengi mu'osasou.

¹¹ Laso ngasivitanoxu avilesi. No anu vote'i so nge'osa mo ngesoko'u la anu axone so ngakalusou umo­momo avile no anu lasixelisou.

¹² Xo loxo itema mimiou axova xe u'osa so usosovosou pa'usou umo­momo no anu ka upilixinu, la Mosinge u'osasou ane. Anu usounu itema ne so uua'ulixu lasixeli ane ulovou mimiou uasisi.

¹³ Eni apelototosinge so ngasu'uli ia anu so ngingi ngatavulenu navunavusou io ane'i ixolu lala­vulusi uasi. Anu tava'u so xolu­xolungenge ngoli'a umomo­mosi.

¹⁴ Xo vaimomo 'o ngingi mimi sevile laso ngasu'uline'i ane'i ane uasi olele. Ia ili'i masi ngingi ngasoti xe ane'i mimi sevile laso ane'i isu'ulingengi ane. Mo so axone la ane'i xe ngingi xoluxo­lungenge umomomosi.

¹⁵ Xo loxo Mosinge vaikalaou mulemolu tatei lexe, “Tamitema mose'i xavine'i so itaxusou la'ilali tavu'alo ia ani'a­nixa'a la umomomo no anu lasixelisousi. Xe ane'i ane xavine'i uasi mo itaxusou sevilesi la isolixa'a uasi, ani'anixa'a umo­momo kalumo no anu lasixe­lisousi.”

Polu mupalusi'a tamenexu se'i milai ne Kolini

¹⁶ La eni avikala laixe noxou Mosinge xo mu'avutinoxu sexela­singe no oponu Taitusi a iou vilesisi loxo nexi 'o.

¹⁷ Xo nexi pakia'ixe lexe ulivu noxingela la anu oponu axone. Ia mi ne muxolu no oponu lumamo laso une'e noxinge xo no anu masaxa noxoumo.

¹⁸ Xe nexi tapalusou vivinge vile so ilou ine'e noxinge ne. Anu vivinge 'o ne, tatemanu pitapita milavusou ualasou xo no anu xaixai noxou e so ulanu vaikala laixe.

¹⁹ Mo aloxo 'ola. Ane'i tatemanu pitapita miso­sovosou so noxi'a taxixao ta'oxonu xaixai so iaiama e nenge nenge'a tapitanu avonge no anu 'o. Nexi tasaxila'u xaixai anene so u'itinu ualasou Tatananenge xe umaxa'u oponexi lexe ututuluou su'ulisi.

²⁰ Nexi talaxa'i laixe xo loxo 'o io vaikala uxali so uto'omexexu vote'i so tepa­muxanu nene'axu alauna tatila noxi'a Mosinge ta'olu.

²¹ Opo­nexi utulu lexe ilixomexi lamanasi no iou Tatananenge. Ia no iou Tata­nanengesi uasi, tama­saxau lexe ulamana no ie'i tamitema kalumo.

²² Mo nexi tepalusou vivinge vilela so oli'a ikei ine'e noxinge. Anu ne tepilixinu xaixai tavu'alo noxou la tetilovosou lexe muia­venixu laixesi. Xe oponu ututulu manina so une'e uxaxai no taingengi aloxo 'o xo ulavu manina lexe ilixomengi masi laixesi.

²³ Xe noxou Taitusi 'o la ngingi ngelavusou mukalu lexe anu vaita­mixeli xe anu ulavusou uva'isuleli no anu xaixai no taingengi. Mo noxi'a tavivinge tamei 'o tatemanu pitapita mipa­lusi'a so isosovosi'a. Ane'i ilou ilavusou i'itinu iaxu Kalaisitisi.

²⁴ Laso loxo ixolu no taingengi ne la ngapala'anixu sexela noxinge noxi'a. Mo so loxo ilivu no anu pitapita la ipalasinoxu sexela noxinge lexe temanu mo ivalaxu vaikalamexi so tea'alo­ngenge laixe.