2 Kolini 7 - Ata New Testament

¹ Laso tavivilo, vavalima noxou Mosinge anene a uxolu noxinge mukalu 'oe. Laso nenge takalipa­lanenge no anu mimi ane so u'oxonu vasimenge ilou ulenenge nuni'u. Xe taxolu tamama'u noxou Mosinge kaio xavinenge so taxa­lixu xoluxolunenge ulapu loloni.

Polu mulemolu osa'ilasi'a Takolini

² Ioxe, opongengi uxaxa noxixe mo so u'osasixe. Xo nexi ta'oxonu masua noxou evile uasi xe tavila'isou evile uasi xe takalavoi so taxalisou mimi noxou evile uasi.

³ Eni alemolu vaikala ano'o so ato'omengexu uasi. Xo elemolu mukalu lexe nexi telosinge oponexi laso loxo nenge'a tasoli o tamauli la mi vile so ukalipala­nenge uasi.

⁴ La elavu manina lexe avikala noxinge aloxo 'o la ngingi ngalomuxu, laso atatalumeu mi vile no opoleli uasi. Eni a'osa so aa'alongenge noxi'a leviani. Manina, nexi tatavulenu tu'utu'u­maxu ia loxo axavutala­ngengi la opoleli uai se'isisi mo osa'ilasinge misevile.

⁵ Mo mala'o loxo texali ne Mase­tonia la xoluxolunexe manamana'u sevile uasi. Utotomu tu'utu'umaxu muxalixalilinexe. Xo noale la xililisi xe no oponexi la kalauasi.

⁶ Ia Mosinge ulavusou umamato­lane'i tamitema ta'ei opone'i tu'umaxu. Laso anu mupalusou Taitusi mune'e noxixe, la no anu vote'i anene mumamatolanexi.

⁷ Texalisou mamatola so muxali axone ia no anu vote'i vilela aloxo 'o. Anu mua'aloxu voxo so muxali noxinge lexe ngingi ngemama­tolanu. Xe mua'alongenge lexe opongengi ututulu so ngamaisilo mo ngingi tangengixo misevile mo ngetatamasou mi e ngepolo va'axu no anu. Mua'alongenge axone laso osa'ila noxilo mutiatila.

⁸ Xo mala'o loxo ekalanu lapasi mune'e noxinge e muvau opongengi tu'umaxu, la opoleli mumulinu mo e'oxo lexe, Iu, laixe loxo ekalanu uasi.” Ia vaimomo 'o e'osa so ekalanu axone xo elomu lexe muvau opongengi tu'umaxu ia voxo se ataxusi.

⁹ Laso eni a'osa so ngetavulenu tu'umaxu no opo­ngengi ne uasi. Ia ngetavulenu tu'umaxu anene xo mole mupala­sinoxu susu noxinge ka ngexiunu opongengi, la mi nesi e'osasou. Laso vaikalamexi umasuangengi sevile uasi xo tu'umaxu ngeta­vulenu no opongengi ne mumulinu masaxa noxou Mosingesi.

¹⁰ Xo tu'umaxu no oponu itema loxo u'avuti no anu masaxa noxou Mosingesi la anene uxalixu xiu ane. Xe ili'i la itema ne u'osasou tu'umaxu anene xo muxalixu pamauli noxousi. Ia loxo itema oponu tu'umaxuou mimi so lialia 'osi la anene uxalixu nene'axu uasi, uxalixu solisi.

¹¹ Laso manina, Mosinge mu'oxonu opongengi mutu'umaxu axone ia ngingi menge ngamaisou nene'axu laixe a muxali no anu xoluxolu noxinge ne. Xo no anu vote'i anene la mupalusinge so ngetilovosou mo nge'isalilinoxu susu no taingengi. Xe noxou anu ane mupolo va'axu la ngepalea so ngelovonixu xo ngingi a ngamama'ui ne. Xe opongengi mutatamasi lexe nexi tane'e so nenge'a talovonixu mi ne. La no anu mimi mukalusi e nge'oxonu ne la ngemaxa'u opongengi lexe anu ulapusi.

¹² Laso ekaukavunu lapasi mulai noxinge ne la masi nga'oxo lexe tava'u so ulovonixu anu ane mususu o so umamatolanu anu ane mutavulenu navunavusou susu. Ia uasi, tava'u aloxo 'o. Ekaukavunu so upalasi noxinge no iou Mosinge lexe sexelasixe a noxinge ne misevile.

¹³ La mi ne muxalixu nene'axu laso mumama­tolanexi. Ioxe, mi ne mumamatolanexi mo te'osasou. Ia mi ane mu'avutinoxu osa noxixe mutiatila ane so Taitusi muxolu no taingengi la ilixo noxinge laixe mu'oxonu oponu muai se'isisi.

¹⁴ Tei la e'itinu ualasinge noxou Taitusi so ea'aloxu ilixomengi lexe laixesi. La amai­lamulinu vaikalaxeli ne uasi xo mi ma'ia telemolu noxou la molu mumaisou lexe maninasi. Vaikala ma'ia nexi telemolu noxinge la maninasi mo anu mupalasi lexe vaikala ane telemolu noxou la anu axonesi.

¹⁵ Xo loxo Taitusi muxali noxinge la ngemama'u mo opo­ngengi mu'olo'olo so loxo mupelo­totosinge axova la ngingi mukalusi ngelomuxu. Laso vaimomo 'o loxo oponu ulivu no anu voxo loxo muxolu no taingengi ne la anu tanungenge misevile.

¹⁶ La eni a'osa xo eni elavu manina no opoleli lexe mi ma'ia nga'oxonu la anu ulapusi ane.