2 Kolini 6 - Ata New Testament

Ta'aposeli mitavulenu tu'utu'umaxu tavu'alo

¹ La nexi noxou Mosinge tava'isuxu xaixai noxou. Laso nexi tavikala pakia'u noxinge lexe iaiama noxou Mosinge la ngatololonu mamu.

² Xo anu muvikala lexe, “No anu taimusou u'isalili la elomuxu tama noxinge. Xo no anu voxo e esoso­vosou so pamauli la esu'ulingengi ane.” Laso ngalomu, vaimomo 'o anu taimu ulemolu ne u'isalili xe vaimomo 'o anu voxo so pamauli nesi.

³ Ioxe, nexi ta'oxonu mi vile so tamitema itulaki no anu uasi xo tamasaxau lexe vaikala masuaou xaixai noxixe 'o uxali uasi.

⁴ Nexi tamitema so xaixai noxou Mosinge laso oponexi utulu lexe anu upalasi no ie'i tamitema lexe ilixomexi ulapusi. Xo loxo tu'utu'umaxu o navunavu o mimi so uvila'isixe uxali la tatulu pumunexesi.

⁵ Xe ane'i taxilili ilavusou i'otu'otunexi mo ikalavusunexi mo ixalilinexe so iieiesixe. La nexi sasaiexi manina mo tano'u ai uasi mo taxolu tasolinexesi xo no anu xaixai noxixe 'osi.

⁶ Xe ilixomexi la no anu malemalenga mo lavulavusi. Mo tapalea so la'ianexe uasi, ta'oxonu alauna noxi'a tamitemasi. Ulenu Laixesi upamu­xanexi laso tasexelaxa'a no oponexi manina, takalavoi no anu uasi.

⁷ Xe nexi talanu vaikala manina no anu xavi noxou Mosingesi. Mo anu loxo tatetelisou ilixo malemalenga no avoxe tamei so ta'oto no anu mo ta'oxo lato­losou vaikalaou ne.

⁸ Xe noxi'a leviani la itaxanexi ia leviani la ilu'enu ualasixe. Ane'i leviani ivikala masua no tumalixe ia leviani ia'alonexe laixe. Ane'i leviani i'oxo lexe nexi takakalavoi ia leviani ivalaxu vaikalamexi lexe maninasi.

⁹ La nexi loxo tami vitanisi ia tamotu no tuatuala ilavusou ualasixe. Anu loxo soli uxaxalisixe utotomu ia ngamalei, nexi a taxolu tamaulisi. Mimi tavu'alo muxali so ulovoninexe ia ukalusixe avile uasi.

¹⁰ La nexi taxolu no anu tamasi ia mi vile uasi xo taxoxolu no anu osa'ilasi. Xe nexi loxo ta'oloxola ia mi vile uasi xo tavu'alo mipalava no avoxe 'o. Xe no anu xoluxolu so vasimexe la anu loxo xalusousi ia mi vile uasi xo no anu ulenexi la muana'anasi.

¹¹ Ai, ngingi Takolinio, mi ma'ia muxolu no oponexi la tepalasinoxu noxinge avile, ananexe papaxe so tavikalangengixusi.

¹² Nexi opo­nexi a noxingesi ia ngingi la ngalavusou nga'apixu opongengi noxixe.

¹³ Laso eni avikalangengi a loxo itema ukatu noxi'a ta'olu. No anu vote'i vilesisi a loxo oponexi noxinge 'o, la ngakolinu so ngaki­sinu opongengi noxixe kalumo.

Tamitemaou Mosinge ane'i tasou

¹⁴ Mamu so ngasakingengi noxi'a ane'i ane ilopala uasi. Xo axova, ilixo malemalenga uvaitami no anu xilili? O lamana upita no anu isivoxo?

¹⁵ Mo axova, Kalaisiti oponu vilesisi noxou Uluaou? Xe itema ane mulopala noxou Kalaisiti ilou itema ane ulopala uasi la xavutalai'a vilesisi, ne?

¹⁶ Mo axovala, nenge ta'unanu momosi'a kalavoi no anu tasou Mosinge? Uasi to! Xo nenge a tasou Mosinge e umamauli. Mi ne Mosinge mulemolu tatei aloxo 'o, “Eni axolu nonano noxi'a mo amuamua'i no taine'i. La eni axolu a Mosi'a xe ane'i ixolu tami­temaxeli.”

¹⁷ Laso ane, tamulinu loxo Tatananenge mulemolu aloxo 'ola, “Ngala no taine'i mo ngakalitotongengi. Mo ngakasi no anu mi ane nuni'u uasi. Laso eni opoleli u'osasinge.

¹⁸ Xe eni axolu a maminge mo ngingi ngaxolu ta'alixeli.” Vaikalaou Tatananenge U'uli'uli axone.