2 Kolini 4 - Ata New Testament

Latilovosou lasopeni pilika

¹ Ioxe, Mosinge mu'alaunanexi la mupilixinu xaixai ano'o noxixe laso nexi talavusou tatatosa no anu uasi.

² Xe nexi telalaxinu oponexi lexe ili'ilixo ane tamitema i'oxonu ka italumeu xo imailamulinu ne, nexi talai no anu uasisi. Laso muamua'inexe no anu kalavoi uasi xe taxiuxiunu laxu Mosinge vaikalaou uasi. Nexi talavusou talanu vaikala maninasi mo so anu upalasi no tane'i tamitema lexe xaixai na'a nexi ulapu no iou Mosingesi.

³ Ia loxo laxu vaikala laixe talanu ne utalumexa'a se'i, la anu utalumexa'a ane'i ane so imamulosi.

⁴ Xo ane'i ane ilopala uasi ne, mosou lialia 'o mutomunu xavutalai'a. Laso lamanaxu vaikala laixe so iaxu Kalaisiti ne isaxisou uasi. Kalaisiti anu pikisa so umaxa'u Mosinge noxinge ia ane'i, la itongonu uasi.

⁵ La nexi 'o talavusou taa'aloxu ilixomexi uasi, nexi tavotovoto lexe Kalaisiti Iesua anu Tatananenge. Mo nexi tamolo tanexiu masaxa noxou Iesua so taxolu loxo tasilevi noxinge.

⁶ Xo tatei la Mosinge muvikala lexe, “Lamana uka no isivoxo.” Laso lamanaxu muta­losou oponexi kaio tesaxisou Kalaisiti iou la iaxu Mosinge mulamana noxixe.

⁷ Ia mi lailaixe ne a uxolu noxixe aloxo mi e lamolisou mutiatila uai nonano no anu lasopeni pilika vitanisi. Mo so axone la tamitema ilavu lexe anu mi na'a neximo uasi, anene mi so xavi ane u'uli'uli noxou Mosingesi.

⁸ Manina, tu'utu'umaxu ulavusou uxalixa­lilinexe ia uma­mulonexi uasi. Xe alaxu tavu'alo ta'oxo lexe, “Iu vote'i axovae?” Ia oponexi tu'umaxu so tapilixinu xaixai avile uasi.

⁹ Xe tamitema ilosixe navunavu ia Mosinge uxexesixe uasi. Xe leviani imaloxo'ixe ia ikalusixe avile uasi.

¹⁰ Xe nexi taxixao mo tamitema imolo mamu­losou vasimexe aloxo mimolo soli noxou Iesua ka mivau. Laso no anu xoluxoluxu vasimexe 'o la upala'a­nixu maulixu Iesua kalumo.

¹¹ Xo nexi tamolo tanexiu masaxa noxou Iesua laso tamitema utotomu itovonu so ivexexu. Nexi tapilixinu vasimexe no anu soli axone so mauli noxou Iesua upalasi no anu.

¹² Laso soli a uxaxali noxixe mo so mauli a uxaxali noxinge ne.

¹³ Tatei itema vile mulopala noxou Mosinge laso no anu vaikalaou la mukaukavu lexe, “Eni elopala noxou Mosinge laso elanu vaikalaou.” La oponexi axone kalumo, xo nexi telopalanu laso telanu vaikalaou.

¹⁴ Xo telavu lexe Mosinge mutelonu Tatananenge Iesua laso nenge ane taxolu noxou Iesua la utelonenge axone kalumo. Ukalu la anu utulusinge nenge'a no iou.

¹⁵ Evikala axone xo elavu lexe mimi ane uxaxalisixe 'o ne so su'ulisinge. Mo so axone la iaiama noxou Mosinge ane uxaxala noxi'a tamitema tavu'alo la u'avutinixi'a so vaikalasou laixe ilemolu ne ulolutu mo u'itinu Mosinge uala­sousi.

Polu muvikala lexe ane'i milopala laso mino'u xavi

¹⁶ Laso maixene nexi tatatosa uasi. Xo no anu xoluxoluxu vasimexe la mupelepelesi ia no anu xoluxoluxu tanexi la uxalixali alavua voxovoxo utotomu.

¹⁷ Xe tu'utu'umaxu ane tatavulenu 'o taxamulinu lexe anu papaxesi mo anu so uxolu maxuveni uasi. La anu ne so usu'ulinexi xo anu uxalixu mi ane lailaixe mo mutiatila so uxolu kaluxu uasi. Mi ne talulusou axova, xo mi vile so talemolu ka tatilovosou no anu uasisi?

¹⁸ Laso mimi ane tasaxisou no ienge la tautitiou uasi. Mimi ane so tautitiou a mimi ane tasaxisou no ienge uasi. Xo mimi ane tasaxisou no ienge ukalu palea. Ia mimi ane tasaxisou no ienge uasi la uxolu kaluxu uasi.