2 Kolini 3 - Ata New Testament

Ta'aposeli ane'i tamitema so ixaxaisou konitalaki alavua

¹ Laso axova, nexi telemolu vaikala anene so taxilisingengi mo so nga'osasixexu? O masi ta'oxonu loxo ane'i se'i? Talinga noxi'a tamitema so ikaukavunu lapasi mo ipala'anixu ilixomexi lexe anu laixe ka ikalanu ulai noxinge? Xe masi talingau lapasi axone noxinge so ngakaukavunu kalumo? Uasi to!

² Xo ngingi to ne, a loxo lapasi so upala'anixu ilixomexi. La vaivai­kala so lapasi ne a uxolu no oponexi 'o so tamitema mukalusi i'itisou mo ilavusou.

³ Xe anu upalasi lexe ngingi ne lapasi ane Kalaisiti molu mukaukavunu ka mupolonu no avoxe 'o. Ia anu uno'u mi loxo peni so lapasiou ne uasi, mukaukavunu a noxou Ulenu Laixesi. Xe umakinu vaikala no anu lavo'o alelaxu uasi, mukauka­vunu avile no anu opone'i tami­tema.

⁴ Laso telexu aloxo 'o. Nexi talavu lexe xaixai anene uxalixu nene'axu laixe xo Mosinge musosovosixexu noxou Kalaisitisi.

⁵ Xo loxo nexi mexe la tamomomo so taxalixu nene'axu laixe axone uasi. Ia nexi a tamomomo, xo noxou Mosingesi.

⁶ Anu muxalinexe tamomomo so taxaxaisou konitalaki alavua. Anu konitalaki ne anu mi so vaikala kitukitu se so lo uasi, anu mi so Ulenu. Xo loxo tamitema opone'i no anu vaikala kitukitu se so lo la uxalixu mamulosoi'a. Ia loxo Ulenu la ulosi'a mauli.

⁷ Ioxe, no voxo loxo Mosisi muno'u lo ane mukaukavu no anu lavo'o alelaxu ne la musaxisou iaxu Mosinge. Musaxisou sila alaiou lamanaxu mu'oki xo ili'i loxo tasiauxu sevile la Ta'isilaeli imomomo uasi so isaxisou xo iaxu mutalosou ie'isio. Laso loxo mi e uxalixu soli noxi'a tamitemasi muxali no anu iaxu Mosinge axone laso masi axova?

⁸ Nga'oxo lexe xaixai lailaixe noxou Ulenu ne uxali no anu iaxu Mosinge kalumo uasi? Ai, anu uua'ulixu ane!

⁹ Xo loxo vote'i so mamulo ne anu iaxu kalumo la vote'i so tamitema ixali tamalemalenga no iou Mosinge ne iaxu masi uua'ulixu avile ane.

¹⁰ Manina, anu ane tei iaxu ia no anu ane alavua 'o la iaxu uua'ulixu avile mole ane tei ne tasiauxusi.

¹¹ Xo loxo anu ane so tasiauxu ne iaxu, la anu upalasi lexe anu ano'o so uxolu avile la iaxu u'uli'uli avile.

¹² La mi e talopalanu taxomaiou a iaxu anenesi, laso maixene tamama'u uasi, talanu vaikala no anu xavisi.

¹³ La nexi loxo Mosisi uasi. Xo anu muno'u lavalava se ka musu'asou mi e so tasiauxu no alaiou so Ta'isilaeli isaxisou uasi.

¹⁴ La Ta'isilaeli opone'i pakia'u xo utotomu i'itisou vaikala so konitalaki teinu ne ia anu loxo lavalava se ne a ulili mo utanuxu ie'i vaimomo 'osio. Xo vote'i vilesisi so uxexe a noxou Kalaisitisi.

¹⁵ Ani, utotomu loxo i'itisou lo noxou Mosisi la lavalava se ne loxo utanuxu opone'i so laxu upalasi noxi'a uasi.

¹⁶ Ia loxo itema uxiu so ulopala noxou Tatananenge, la lavalava se ne uxexesi.

¹⁷ Ioxe, anu Tatananenge xe Ulenu ane'i vilesisi ane. Xo loxo Ulenu Tatananenge uxolu noxou itema vile la xoluxoluxu lalavulusi.

¹⁸ Xe loxo nenge la mi vile so utanuxu alaienge uasi laso loxo tamitema isaxisinge la iaxu Tatananengesi upalasi noxi'a. Mo Tatananenge anu Ulenu ne mupilixinu iaxu noxinge so uxiuxiunenge taxali aloxo anu u'isalilisi.