2 Kolini 2 - Ata New Testament

¹ Laso opoleli lexe no anu ano'o, la ane'e noxinge uasi xo loxo 'o io lailai noxilo masi uxalixu navunavu a loxo ane mala'o.

² Xo ane'i ane so i'avutinoxu osa noxilo, a ngingi nesi. Laso loxo lailai noxilo u'oxonu opongengi tu'umaxu, la ena'ei so u'oxonu opoleli u'osala?

³ Laso maixene ekaukavunu lapasisi mune'e noxinge mala'o. Xo e'oxo lexe mamu so ane'e mo axalisou tu'umaxu noxinge ngingi tamosou e ngalavusou ngaxalixu osa noxilosi. Eni elavu manina lexe mi ma'ia uxalixu osa noxilo la anu uxalixu osa noxinge kalumo ane.

⁴ Ia mala'o ekaukavunu lapasi ne la no anu navunavu mo tamasi, mole ieli lexaxu munixi. Alemolu aloxo 'o so u'oxonu opongengi tu'umaxu uasi, alemolu so ngalavu manina no anu sexelasinge u'isalili e uxolu no opoleli 'o.

Pelototo lexe opone'i Takolini ulu'e so susu noxou menexi'a

⁵ Ioxe, anu ane loxo muxalixu tu'umaxu no taingengi la navuna­vusou uxalisilo uasi. Io', eni amasaxau alemolu vaikala pakia'u no anu mi ne malaxo uasi, ia avikala se lexe navunavusou mi ne a muxalisingesi ne.

⁶ Ia mi e ngingi tavu'alo opongengi vilesisi no anu so ngelovonixu itema ne la umomomo se.

⁷ Xo nge'oxonu mukalui laso anu laixe so ngasu­kunula uasi. Ngingi masi opo­ngengi ulu'e so susu noxou mo ngamamatolanu xo loxo 'o io oponu tu'umaxu mo umaloxo'u itema ne avile.

⁸ Laso eni akatu noxinge lexe ngingi ngalai ngapala'anixu opongengi noxou lexe ngingi a ngasexelaxusio.

⁹ No anu lapasi e ekaukavunu mune'e noxinge mala'o ne so etovonu opongengisi, lexe ngalomu laixe no anu mimi mukalusi o uasi.

¹⁰ Ia loxo opongengi ulu'e so susu noxou menexinge aneva, la anu axone kalumo noxilo. Xo susu ma'ia loxo mututulusio la elu'enu opeleli no anusi. Ia mi olele 'oxo taleli uasi, eni exavutalangengisi laso elu'enu opoleli so susu ne no iou Tatananenge.

¹¹ E'oxo axone mo so vote'i noxou Uluaou so uua'ulinenge uasisi. Xo nenge ienge selevenuou lolo noxou uasi, anu upalasi noxinge ane.

Polu mukakamulinu Taitusi

¹² Ioxe, no voxo loxo ene'e ne Toloasi so alanu vaikala laixesou Kalaisiti la Tatananenge mukisinu aitengasilo so exaxai ne.

¹³ Ia opoleli uai se'isisi uasi xo axalisou vivilo Taitusi ne uasi. Laso epilixine'i Tatoloasi xe elutu la ene'e exali ne Masetonia polovinisi 'o.

Ta'aposeli mixalisou su'uli noxou Mosinge

¹⁴ Ia alemolu laixe noxou Mosinge xo anu upamuxanexi aloxo 'o. Kalaisiti muua'uli no anu oto ka anu u'uli laxunexi 'o. Xe nexi taxixao taa'aloxu laso lavu­lavusou anu loxo mi tuma'u lailaixe ane sivo utavulenu uxalixu no tuatuala mukalusi.

¹⁵ Xo nexi 'o, aloxo mi tuma'u lailaixe ane Kalaisiti u'elaxu so lexe noxou Mosinge. U'elaxu la tuma'u upolo ulai no taine'i tamitema ane'i ane so ipamauli xe ane'i ane so imamulo.

¹⁶ Ia noxi'a ane'i ane so imamulo la anu loxo tuma'u masua manina xo uxalixu mamulosi'a. Xe noxi'a ane'i ane so ipamauli la tuma'u lailaixe xo anu uxalixu pamaulisi'a. Iauo, itema ena'ei umomomo no anu xaixai mutiatila aloxo 'o?

¹⁷ La nexi loxo tamitema leviani uasi xo ane'i la ilailai so imaketi no anu Mosinge vaika­laousi. Ia nexi 'o takalavoisou uasi xo texalisou xaixai ano'o noxou Mosinge mu'isalili. Laso taxolu noxou Kalaisiti so talanu vaikalaou no iou Mosingesi.