2 Kolini 13 - Ata New Testament

Kaluxusou pelototo noxou Polu

¹ Ioxe, eni a so ane'e noxinge la anu alaxu tatalusou 'o. Laso ngalaxa'i laixe xo loxo Mosinge vaikalaou mulemolu lexe, “Vote'i vilesisi so talovonixu susu, a so tamitema tamei o tatalu isaxisou ka ilemolu susu noxou menexi'a.”

² Mala'o exolu noxinge no anu alaxu tameisou, la epeletotosi'a ane'i ane misusu tei oli'a leviani. Mo vaimomo 'o axolu nopaxa 'o mo vaikala anene a alemolu lumamo 'ola. Aloxo 'o. No voxo loxo ane'ela, la alovonixi'a ane'i ta'ei ixoxolu no anu susu, ieli uvaxaou vile noxi'a vitanisi uasi.

³ Xo ngingi ngamasaxau ngalavu lexe Kalaisiti a uvikala no anaxo 'o o uasi. Laso loxo ane'e alovo­nixinge la anu upala'a lexe eni axaxai no anu xaviou Kalaisitisi. Xo vote'i so uxaxai no taingengi la pelesou uasi, anu xavinusi ane.

⁴ Xo tatei loxo mililixu no ovu valautu so usoli la anu pelesousi. Ia vaimomo 'o anu a uxolu umauli xo no anu xavi tatila noxou Mosingesi. Xe nexi pelesixe kalumo a loxo anu tei ne ia xo taxolu noxou vaimomo 'o laso xaviou Mosinge upala'a no anu xaixai noxixe no taingengi.

⁵ Xo ngingi menge ngatilovo­singe, ngingi ngaxolu no anu lopala manina? Ngingi menge ngatongo­ngengi laixe lexe axova. Menge ngatilovosinge lexe Iesua Kalaisiti uxolu noxinge o uasi. Xo loxo uxolu noxinge uasi la ngingi ngepungengi vitanisi ane.

⁶ Ngati­lovosinge axone, la eni alopalanu Mosinge so ngatongonu lexe nexi tepunexi noxinge uasi.

⁷ La nexi talavusou talingau su'ulisinge noxou Mosinge so ngasusu uasi. Ia anu tava'u so ilixomengi uvalaxu xaixai noxixe no ie'i tamotu uasi. Xo loxo opone'i lexe nexi tapunexisi, la anu mi vile uasi. Mi ane oponexi ututuluou ane so ngingi nga'oxonu ilixo mulapusi.

⁸ Xo nexi ta'oxonu mi vile so uxililiou vaikala manina uasi, xaixai na'a nexi so tavalaxusi.

⁹ La nexi ta'osa loxo nexi taxolu pelesixesi ia ngingi ngaxolu pakia'ingesi. Xe nexi tapili­xingengi noxou Mosinge utotomu so xoluxolu noxinge uxali laixe loloni.

¹⁰ Laso axolu va'axu aloxo 'o mo akaukavu u'uli mo so loxo ane'e noxinge la tava'u so a'okingengi uasi. Xo Mosinge mulosilo xavi no anu xaixai noxou aloxo 'o so a'oxonu pakia'u lopala noxingesi, anu so amamulonu uasi.

Kaluxusou vaikala Polu so u'italone'i

¹¹ Ioxe tavivilo, telexu aloxo 'o. Ngingi nga'osa xe xoluxolungenge laixe loloni xe ngaxamulinu mamatola xe opongengi vilesisi mo lexa noxinge ngato'osi. La Mosinge e mosou sexela ilou xoluxolu lalavulusi a uxolu noxinge ne.

¹² Ngamulinu ilixomenge nenge Mosinge ta'olu so ngamaxa'u sexe­lasinge ngato'o.

¹³ Ane'i tamite­maou Mosinge u'isalili lai 'o mukalusi ivikala aso noxinge.

¹⁴ Eni amasaxau lexe ngingi mukalusi ngaxamulinu iaiama noxou Tatananenge Iesua Kalaisiti xe sexela noxou Mosinge. Mo amasaxau lexe Ulenu Laixe u'oxonu opongengi uxolu vilesisi. Anu anesi.