2 Kolini 12 - Ata New Testament

Mosinge mupela'u Polu no anu mi loxo ai saxi

¹ Ioxe, loxo eni a'itileli aloxo 'o la anu mi so uxalixu su'ulisinge uasi. Ia eni vote'i vilela uasi, laso asolonu so aa'aloxu mi loxo ai saxisaxi xe vaikala mupala'a e Tatananenge mulosilo.

² Eni alavusou itemaou Kalaisiti vile ane Mosinge muno'u mutelaixu no anu tualasou lailaixe e teitexi avile. Mutelai axone la no anu vasimolu o mula no anu vasimolu, eni alavu­sou uasi, Mosingesi mulavusou. Mi ne muxali tau ie 14 mulai mukalu.

^3-4 Elavu lexe itema ne Mosinge mutelaixu no tualasou lailaixe. Ia loxo no anu vasimolu o uasi, eni alavu uasi, Mosinge ulavusou. Xe no tualasou Mosinge la itema ne mulomusou vaivaikala ane vote'i so tamitema ilulusou uasi mo tavu no anu so ilemolu.

⁵ Noxou itema ne la eni masi a'itinu ia loxo noxilo la a'itileli mamu. Mimi ane noxilo so a'itinu a mimi e pelesilo no anusi.

⁶ Loxo a'itinu mimi lailaixe e'oxonu la vaikalaxeli ne vuluvulusi no anu uasi, xo mi ma'ia so alemolu ne la maninasi. Ia amasaxau lexe tamitema i'osasilo no anu vaika­laxeli so alemolu ilixoleli laixe ne uasi. Eni amasaxau lexe i'osasiloxu ilixoleli ane me'a imaisou no ie'i xe vaikalaxeli ane ilomusou no sangali'asi.

Latilovo so mi anaxu uxolu no vasimenge

⁷ Ioxe, mimi ane Mosinge muma­xa'uieli ne lailaixe manina misevile xe mane la a'itileli no anui. Laso Mosinge mu'italonu tu'umaxu vile so uxalisilo la loxo mi anaxu uxolu no vasimelo mo uto'otomolu. Mi ne molu noxou Uluaou ka mu'otu'otuleli mole vote'i so a'itileli uasi.

⁸ La alaxu tatalu ekatu noxou Tatananenge lexe mi ne uxexesilo.

⁹ Ia anu mukolileli lexe, “Iaiama noxilo umomomo noxine. Xo xavi noxilo uxali loloni avile noxou itema aneva upilixinu noxilo lexe pelesousi.” Muvika­laleli axone laso maixene eni a'osa so a'itinu mimi noxilo ane pelesilo no anu xo anene vote'i so xavi noxou Kalaisiti uxolu noxilo.

¹⁰ Laso loxo no anu xaixai noxou Kalaisiti la eni xavi so a'oxonu uasi o loxo tamitema ipupuieli o loxo tu'umaxu ilou navunavu uxalisilo o loxo taxilili itovonu so imamuloleli la eni opoleli uai se'isisi. Xo eni alavu aloxo 'o. No voxo loxo eni pelesilosi, la eni axalisou xavi ane.

Polu tanuxa'a Takolini

¹¹ Auo, ngamalei, ngingi menge ngesouleli so evikala vuluvulusi 'o. Loxo nge'oxo laixe la ngingi menge ngavalaxo so ngaa'aloxu ilixo noxilo lexe mulapusi. Xo manina, eni amitema vitanisi ia noxi'a ta'aposelimengi i'uli'uli ne ane'i iua'ulixo sevile no anu mi vile uasi.

¹² Eni exolu no taingengi la e'oxonu mimi tavu'alo so umaxa'u lexe eni aposeli manina. Exolu se'isisi ne so e'oxonu sosovo so xavi mo xaixai iouiou ane so tangengilili no anu.

¹³ Xe no anu mimi ma'ia laixe e'oxonu no anu pitapita mukalusi la anu iou vilesisi axone noxingesi. E uasi, no anu mi vile alosinge uasi. Ane so alosinge tu'umaxu so ngasaxila'ilo no anu mimi so vasimelo uasi. O sole manina, masi ngalu'enu opo­ngengi no anu susu noxilo ne.

¹⁴ Ioxe, eni elalaxi so ane'e noxinge alaxu tatalusou 'o mo eni alosinge tu'umaxu so ngasaxila'ilo uasila. Xo mi ane opoleli u'oxoxu a mimimengi ne uasi. Mi ane opoleli u'oxoxu a ngingi to ne. Axova, anu mi noxi'a tamolomolo so imulaxu iauvaxe ka i'a'ane'i tamami'a taneni'a? Uasi to! Anu mi noxi'a tamami'a taneni'a so i'a'ane'i ta'ili'amo.

¹⁵ Laso loxo eni, la a'osa so apilixinu mimixeli muka­lusi xe mauli noxilo kalumo so usu'ulinu xoluxoluxu ulengengi. Ia axova, loxo asexelangenge mise­vile axone la ngingi ngatukalaleli no anu sexela noxinge?

¹⁶ Ia masi se'i no taingengi ivika­lasilo lexe, “Ani, anu ulingau mimimenge no tani keakea uasi. Ia anu ukalavoi so uxilisinenge mo uto'omolu kusinengesi ane.”

¹⁷ Se'i masi i'oxo axone ia axova? Epalusi'a tamitema mine'e noxinge la enava? No anu vote'i anene e'oxo lolongenge so epulumao mimimengi no avo'a? Uasi to!

¹⁸ Xo eni e'avutinoxu oponu Taitusi mo epalusou vivinge vilela ne so ilou mine'e noxinge. La ngemaisou ilixou Taitusi no taingengi axova? Mu'oxo lolo­ngenge so upulumao mimimengi, ne? E uasi! Mo loxo ngelavu, nexi noxou oponexi vilesisi mo tamulinu vote'i vilesisi.

¹⁹ Ioxe, masi nge'itisou vaikala ano'o mukalusi la nge'oxo lexe nexi telemolu so ta'oxo latolosixe no iengi no anu vaikala ma'ia muto'omexe. Ia uasi, nexi a taxolu noxou Kalaisiti mo telemolu vaikala ano'o no iou Mosingesi. O tamaula, tava'u vaikalamexi 'o so u'oxonu pakia'u lopala noxingesi.

²⁰ Xo opoleli uuali lexe no voxo loxo ane'e noxingela, la masi amaisou ilixomengi ulovou masaxa noxilo uasi. Xe ngingi kalumo masi ngamaisou ilixoleli ulovou masaxa noxinge uasi. La loxo 'o io ane'e amaisou ili'ilixo aloxo 'o uxolu no taingengi. Ilixo so tamitema ipelesou anaxa'a xe iisuisu xe xalo u'ela no anu la'ia xe opone'i sixulai'a xe ipupui xe itunana xe itoxa'a xe ixalixu tu'umaxu vitavitanisi.

²¹ Mo opoleli kalaua lexe ane'e noxinge la masi Mosinge upamailaleli no iengila. Xo tei la ane'i se'i ne mi'oxonu ilixo nuni'u xe mixola­xola'u taula'i xe mimomoxu masamasaxa no anu vasime'a. Laso loxo axali amaisi'a lexe ixiunu tumali'aou susu ne uasi la atavu­lenu maila mo atatamasi'a.