2 Kolini 11 - Ata New Testament

Ilixou Polu iou vilemo noxi'a ta'aposeli kalavoi

¹ Ioxe, eni amasaxau lexe nga'ita­loleli mo avikala vuluvulusi sevileo. Ne, umomomo axone?

² Mosinge u'oxo latolosi'a tamite­maou mo so mi vile ulapune'i ixexesou uasi. La anu axonesi noxilo xo eni esosovosinge lexe ngingi tanoxou Kalaisitisi. Eni loxo itema usaxane vuanga male­malenga ilai so itaula'ixu mulue.

³ Ia eni auali xo axavutalanu vote'i so sineke mu'oxo loloxe Ivi no anu kalakalavoi noxou. Xo mamu so mi vile ulapunu xavutalamengi axone kaio ngaxe­xesou xoluxolu malema­lenga so opongengi u'oxo­xu Kalaisitisi.

⁴ Xo nexi tene'e noxinge tei mo telosinge vaikala laixe so Iesua la ngelomuxu mo ngexalisou Ulenu Laixe. Ia loxo itema vilela une'e noxinge mo u'oxo lexe, “Eni alosinge vaikala laixe alavua so Iesua mo apilixinu ulenu alavua noxinge,” la ngingi masi nga'osa mo ngalomuxusi ane.

⁵ Ai ngalomu, noxi'a ta'aposeli­mengi i'uli'uli ne, eni atilovosilo noxi'a lexe iua'ulixo sevile uasi.

⁶ Xo eni la asikulu so vaikalaxeli ula loxo lexa no ie'i tamitema uasi. Ia mi vile uasi, xo no anu lavulavu la akamulinu uasi. Ngingi menge ngalavusou lavulavu noxixe ne xo temaxa'u no anu ilixomexi muka­lusi.

⁷ Ioxe, loxo ngelavu, eni elanu vaikala laixe noxou Mosinge noxinge la ano'u lapesou noxinge uasi. Ia axova, masi esusu no anu ngiou anene? Ne, ngaxavutala axone? Uasi e, xo eni elu'eleli axone mo so ataxangengi no anu.

⁸ Anu loxo epakali noxi'a tate­manu pita se'i xo ane'i misu'ulileli no anu lamoli so axaxai no taingengi.

⁹ Mo exolu no taingengi xe loxo esoti no anu mi vile la alosou vile noxinge tu'umaxu no anu uasi. Ane'i tavivinge me'a ne Masetonia mixali ne Kolini la misaxila'ilo no anu mi ma'ia eni no anu uasi. Eni opoleli lexe ngata­vulenu tu'umaxu so ngasu'uli­leli uasi mo ili'i la anu uxolu axonesi.

¹⁰ Vaikala manina noxou Kalaisiti ula no anaxo so avikala aloxo 'o. No anu xale tuatuala ne Akaia polovonisi la vile noxi'a umomomo uasi so utanuxu vaika­laxeli so aa'aloxu ilixoleli ne.

¹¹ Ia axova, a'oxo axone xo asexela­ngenge uasi? Uasi manina, Mosinge mula­vusilo lexe asexe­langenge mise­vile.

¹² Ia tamitema se'i ikakamulinu vote'i so i'itinu ualasi'amo xo ane'i imasaxau lexe ixali a loxo nexi 'o no ie'i tamitema. Laso eni axaxai aloxo 'osi so atanutanuxu vote'i­si'a, mo atalo no anu uasi.

¹³ Tamitema axone ixaxai so i'oxo loloxa'a tamenexi'asi. Ane'i ta'apo­seli kala­voisi ia itovonu so ixiune'i so isaxi loxo ta'aposeliou Kalaisiti.

¹⁴ Ia anu mi so takuluke no anu uasi xo Uluaou kalumo uxiunu so usaxi loxo angelo so lamana.

¹⁵ Laso loxo tamitema so xaixai noxou Uluaou ixiune'i so isaxi loxo tamitema so ixaxaisou ilixo mula­pusi la takisikula uasi. Ia ili'i la ixalisou lakolisou umomomo no anu ilixo noxi'a u'isalilisi.

Polu mutavulenu tu'umaxu piena so mu'oxonu xaixai aposeli

¹⁶ Loxo elemolu, vaikalaxeli 'o masi tamaxu vuluvulusi laso mamu so nga'oxo lexe eni alongu­longu. Ia loxo opongengi axone la mi vile uasi, nga'italoleli mo ngalomusilo a'itileli sevileo.

¹⁷ La vaikala e alelemolu 'o, anu loxo vaikalaou Tatananenge uasi. Anu vaikala vuluvulusimo, xo eni a'itinu ualasilo no anu to!

¹⁸ Ane'i leviani imulinu ilixo so lialia mo i'itinu ualasi'a kena, laso eni kalumo amuli axone.

¹⁹ Ai ngingi ne tamitema so lavulavu loloni, ne? Ia loxo anu manina, laso axova so nga'osa so ngalolomuxa'a ane'i ta'ei ipilixinu vaikala vuluvulusi noxinge to ne?

²⁰ Xo loxo itema vile ulapungengi so ngaxali tasileviou o u'inge no anu mimi o uua'ulingenge no anu kalakalavoi o molu u'itinu o usava­savalinge no anu vaikalaou la ngingi ngalavusou nga'italongengi so u'oxongengi no anu masaxa noxousi.

²¹ Ia nexi xavinexi so ta'oxongengi kaini axone uasi, laso anu masi mi so amailamulinu, ne? Ia loxo evile xavinu so uvikala lamana no anu ilixou la eni kalumo xavileli so apala'anixu noxilo ane. O vaikalaxeli muxali vuluvulusi moe.

²² Xo axova, ane'i i'oxo lexe ane'i vaikalai'a Ipilu, ne? Ua, eni kalumo Ipilu a. Xe i'oxo lexe ane'i so laili Isilaeli, ne? Ua, eni kalumo Isilaeli a. Xe i'oxo lexe ane'i ta'ilusunu Apala'amu, ne? Ua, eni kalumo ilusunu Apala'amu a.

²³ Xe i'oxo lexe ane'i tamitema so xaixai noxou Kalaisiti, ne? O eni so avikala loxo alongulongu avile toe. No anu xaixai noxou Kalaisiti la aua'ulixa'a avile. Xo no anu sasaieli xe no anu lalaxu so ekalavusu la aua'ulixa'a ane'i ne avile. Ane'i taxilili mi'otu'otuleli alaxu mulolutusi mo voxo tavu'alo elai alai no anu soli.

²⁴ Ane'i Taiuta mimulinu ilixo noxi'a so ino'u laleti tavalanu ka mipua­puasilo mo mi'itisou umomomo no anu 39. Mi ne muxalisilo alaxu ta'uve avile.

²⁵ Xe alaxu tatalu Talomu mipuapuasilo no anu maxei mo alaxu vile milealeaxo no anu lavo'o. Xe alaxu tatalu etetelo no anu lasilasipi la mumamulo. Xe no anu vile la exolu epuati no luaki loxo'u aso xe olovoxo vile.

²⁶ No anu muamua'ixo piena so alai nopaxapaxa la manela amamulo lalaxu. Xo no anu lexalexa xe no avo'a talasikeli xe no avo'a laili noxilo xe no avo'a tamitema noale'ale xe no anu taotaoni xe no anu xale lia esi'esi xe no luaki xe no avo'a ane'i ane ikalavoi lexe tavivilo no anu lopala.

²⁷ Mo etavulenu navunavusou xaixai ialuxu iouiou. Xo alaxu tavu'alo ano'u ai no olovoxo uasi. Xe exolu esoliou la'ilali ilou lexa xo vote'i so axalisou ani'ani uasi. Xe alaxu tavu'alo exolu sivevelo xo silo ala'ala uasi.

²⁸ Mimi tavu'alo axone a uxolu so alemolu. Xe kalumo la voxovoxo utotomu taleli uai se'isisi uasi xo u'oxoxu pitapita mukalusi so autitiou.

²⁹ Xo loxo Mosinge olu vile pelesou la eni kalumo axamulinu mo xavi noxilo ukalu no anu. Xe loxo evile ulapunu Mosinge olu vile no anu susu la eni opoleli tu'umaxuou mi ne avile.

³⁰ Loxo eni so a'itinu mimi se'i alavusou a'oxonu, la a'itinu mimi ane umaxa'ilo lexe pelesilo no anu.

³¹ Mosinge anu Momu Tatana­nenge Iesua, ne ta'itinu ualasou kaluxu uasi. Anu molu mulavusou opoleli lexe akalavoi uasi.

³² No anu Tamasikusi, la tila no anu xamani e muxolu no laxu kingi Aletasi mutulusi'a ta'amiou so miloxo no aitengaxu taoni so ikalavusuleli.

³³ Ia tavivinge se'i mitaleli no ti'a mo mililixo ela no uinitoa so vimelusou taoni ka elu'elai exali no lia. Laso no anu vote'i anene e'ume no avolu tilasou xamani ne.