2 Kolini 10 - Ata New Testament

Polu mukolinu vaikalai'a ane'i ane mixililiou xaixai noxou

¹ Ioxe, tamitema se'i ne ito'omelo lexe, “Loxo Polu uxolu no tainenge la pelototo noxou no anu mama'usi. Ia loxo uxolu va'axu la ukalanu vaikala tu'utu'umaxu une'e noxinge to.” Ia eni Polu 'o, akatu noxinge lexe tangengi umulinu Kalaisiti xo anu mulavusou ulu'enu mo oponu lexa noxi'a tamitemasi.

² Laso avikalangengi aloxo 'o. Ngalaxa'i laixe xo loxo 'o io ngasouleli xo xe ane'e noxinge la alosinge vaikala tu'umaxu ane. Xo eni alavu lexe eni amomomo so apilixinu vaikala pakia'u noxi'a ane'i ane ito'omexe lexe nexi tamuamua'i no anu vote'i so lialia 'osi.

³ Xo manina, nexi taxolu no anu lialia 'o, ia oto noxixe 'o anu mi so lialia uasi.

⁴ Xe mimi so oto ane talalaxi no anu 'o ne, anu mi so lialia uasi kalumo. Anu mi so xavi noxou Mosingemo. Laso maixene anu umomomo so upaxelenu tualasi'a taulua ane mivimelusou pakia'u.

⁵ Mo nexi tamamulonu xavutala kalakalavoi xe mi ma'ia tamitema i'itinu so itanuxu lavula­vusou Mosinge no anu. Xo xavu­tala vuluvulusi noxi'a ne anu loxo ta'amiou Uluaou. Laso no anu mimi so oto noxou Mosinge la takakapisou xavutalai'a ne mo so uxiu uxali u'isalili no anu masaxa noxou Kalaisitisi.

⁶ Ia loxo ngingi, la nexi a tautitiinge so ngalomuxu vaikalamexi. Taxolu xo xe tamaisi'a ane'i ane ixililiou laso ane, nexi talovonixi'a.

⁷ Ngingi menge ngatilovo laixe no anu mimi e uxolu no iengi. Xo loxo itema ulavu manina no oponu lexe anu itemaou Kalaisiti la anu masi laixe so ulavu aloxo 'ola. Nexi kalumo tamitemaou Kalaisiti a loxo anu nesi.

⁸ Tava'u so Tatananenge mulosixe xavi a so ta'oxo pakia'u lopala noxinge, anu so tamamulonu uasi. Laso loxo a'itinu ualasixe sevile no anu xaixai mulosixe 'o, la eni atavulenu maila no anu uasisi.

⁹ Ia mamu so anu usaxi lexe eni amitema so amolo umengenge no anu lapalapasixeli.

¹⁰ Xo se'i i'oxo lexe, “O, lapala­pasiou Polu to ne mutu'umaxu mo xavinu. Ia loxo molu uxali la tamaisou lexe anu pelesousi mo vaikalaou papaxe vitanisi.”

¹¹ Laso tamitema ane ivikala axone la laixe so ilavu aloxo 'o. Loxo nexi taxolu va'axu mo ngaxamulinu vaikalamexi utama axova no anu lapasi, la ngingi masi ngamaisou ilixomexi uxali iou vilesisi axone kalumo loxo taxolu no taingengi.

¹² O nexi tamama'u so tatilo­vosixe noxi'a ane'i ane me'a i'itine'i ne. Xo loxo isaxisi'a tamenexi'a so itilo­vosi'a noxi'a ngato'o o imalei lexe ena'ei noxi'a laixe la ixo­vulaulau kenasi.

¹³ Xe mamu so ta'itinexi mo taua'ulixu lamaki noxixe ane Mosinge molu muso­sovosou. Ia lamaki na'a nexi e musosovosou ne anu uxali avile noxinge ne.

¹⁴ Anu xaixai noxixe usu'asinge axone kalumo, laso loxo nexi tapilixinu vaikala axova noxinge la nexi ta'alasou lamaki noxixe uasi ane. Xo ane'i ane mi'ulinoxu vaikala laixe so Kalaisiti mo mixalixu avile noxinge ne, a nexi tosi.

¹⁵ Laso nexi ta'alasou lamaki noxixe so ta'itinexi no anu xaixai noxi'a leviani uasi. No anu masaxa noxixe la taxolu u'isalili no anu xaixai e Mosinge mulosixe mo so lopala noxinge uleme. Xe loxo uleme la anu mi nesi upala'anixu temanu xaixai noxixe lexe anu utitilasi.

¹⁶ Utitila, laso nexi talaixu vaikala laixe no tuatuala e uxolu xalevile noxinge olele kalumo. Xo mamu so nexi talai no anu tanixu xaixai ane Mosinge mupilixinu noxou itema vilela ka ta'itinexi no anu.

¹⁷ Xo loxo Mosinge vaikalaou ulemolu lexe, “Uala vilesisi so tamitema i'itinu. Uala ane noxou Mosingesi.”

¹⁸ Laso itema ane molu u'itinu, la loxo manina anu ualasou uasisi. Ia loxo Tata­nanenge u'itinu itema, la anu ualasou ane.