2 Kolini 1 - Ata New Testament

¹ Eni Polu a. Eni aposeliou Kalaisiti Iesua xo no anu masaxa noxou Mosingesi. Nexi noxou vivinge Timoti a takaukavunu lapasi 'o so ulai noxinge tatemanu pita noxou Mosinge ne Kolini ne. Xe ulai noxi'a tamitemaou Mosinge u'isalili ta'ei ixoxolu no xale tuatuala no Akaia polovonisi.

² Mosinge anu Maminge ilou Tatananenge Iesua Kalaisiti iiaiama noxinge so ilosinge xoluxolu lalavulusi.

Polu muvikala laixesou su'uli noxou Mosinge

³ Ta'itinu ualasou Mosinge anu Mosou xe Momu Tatananenge Iesua Kalaisiti. Mo anu Maminge e tava'u alauna xe anu Mosinge e tava'u mamatola mukalusi.

⁴ Xo loxo tu'utu'umaxu uxalisixe la anu ulavusou umamatolanexi. Laso tamitema ta'ei kalumo itavulenu tu'umaxu la mamatola ane teno'u noxou Mosinge ne la tavulunu noxi'a.

⁵ Xo no anu navunavu mulolutu e Kalaisiti mutavulenu la nexi kalumo texalisou 'o. Laso maixene mamatola ane taxalisou noxou Kalaisiti la mulolutu kalumo.

⁶ Xe loxo nexi taxalisou tu'utu'umaxu la anu so usu'uli­ngengi no anu mamatola mo pamauli noxinge. Mo loxo nexi taxalisou mamatola la anu anene so mamatolasinge kalumo xo loxo ngaxalisou tu'utu'umaxu a loxo nexi tatavulenu 'o, la ngatulu pakia'inge no anusi.

⁷ La nexi telopala avile lexe ngingi ngatulu pakia'inge ane. Xo telavu lexe loxo ngingi ngapita no anu tu'utu'umaxu noxixe 'o la no anu vote'i anenesi ngapita no anu mamatola noxixe kalumo.

⁸ Xo tavivixe, nexi tamasaxau lexe ngalavu no anu tu'umaxu ane muxalisixe no anu Esia polovonisi. Tetavulenu tu'umaxu ne la loxo tavala muvexe mole te'oxo lexe nexi tamomomo no anu uasisi la masi tasoli ane.

⁹ Manina misevile, no oponexi la texamulinu loxo itema ane ulomusou tiasi uvikala lexe usoli. Ia mi ne muxalisixe axone mo so talopalanu xavi na'a neximo uasi. Talopalanu xaviou Mosinge xo anu mosou e utulusi'a tamitema no anu soli.

¹⁰ Mole mane la tasolisou ia Mosinge molu mupamaulinexi mo upamaulinexi axonela. Xe nexi lopala na'a nexi utulu noxousi laso talavu lexe mi ma'ia uxalisixe ili'i la anu upamaulinexi no anu axonela kalumo.

¹¹ Mo ngingi ngasu'u­linexi no anu vote'i e so ngapilixinexi noxou Mosinge. Xe loxo Mosinge ulomuxu vaikalai'a tamitema tavu'alo so ipilixinexi axone mo usu'ulinexi, la upala'a no ie'i tamitema tavu'alo, laso ane'i i'itinu ualasouxu.

Polu muvikala lexe mukalavoine'i Takolini uasi

¹² Ioxe, ilixoleli laixe vile a'osa so alemolu noxinge aloxo 'o. Eni taleli uai se'isisi xo mi ma'ia e'oxonu no taine'i tamitema la mulapusi mo mulamana. Ia eni melo eno'u lavulavusou mi ne no anu lialia 'o uasi, Mosinge molu muiaiamaxeli so muxalixu noxilo. La mua­mua'ixo no anu anenesi no taine'i tamitema xe no taingengi la anu axone u'isalili.

^13-14 Laso loxo akaukavunu lapasi une'e noxinge la akaukavunu so tangengililou uasi. Xo mimi mose'i ekaukavunu anu mupalasi noxinge mukalu. La amasaxau lexe ngingi ngalamana no anu axone avile. Mo so axone no anu Voxosou Tatananenge Iesua la mi ane ngingi nga'osasouxu no iou a enisi. Xe mi ane eni a'osasouxu no iou a ngingisi.

^15-16 Xe eni opoleli ututulu lexe ngingi nga'osasou ilixoleli axone laso maixene e'oxo lexe ane'e noxinge tei xe ukalu laso alai no Masetonia polovinisi. Mo e'oxo lexe axolu xo xe alivui, la apolo noxingela mo so no anu vote'i anene la Mosinge usu'ulinu xoluxolungenge alaxu tamei. Xe axone la ngingi masi ngasu'ulileli no anu muamua'ixo so alai ne Iutea.

¹⁷ Xo axova, elemolu vaikala anene la nge'oxo lexe opoleli muvaxa mune'e no anu? Eni a'oxo loxo tamitema so lialia? Eni amitema so asakinu vaikala lexe, “Ani, a'oxo mi ne,” ia uasi uxolu no opoleli? Ne? Uasi to!

¹⁸ Noxou Mosinge la uxalixu nene'axu vaikalaou mukalusi. La anu axonesi noxilo, xo mi ma'ia alemolu la vaikala lexe ani xe uasi ukei no anu uasisi.

¹⁹ Xe nexi noxi'a Sailasi mo Timoti texolu no taingengi la tevotongengixu Mosinge Olu e Iesua Kalaisiti. Mo mulamana noxinge lexe ani xe uasi upita noxou kalumo uasi. Noxou, la mi ma'ia ulemolu ne ani no anusi, uxiunu oponu uasi.

²⁰ Xo vavalima noxou Mosinge tavu'alo a uxolu laso noxou Kalaisiti la uvikala lexe, “Ani, eni axalixu nene'axu.” Laso maixene loxo talomusou vaikalaou Mosinge la ta'oxo lexe, “Ani, manina”, mo ta'itinu Mosinge ualasouxu.

²¹ Xe anu ane so u'oxonu pakia'inge nenge'a noxou Kalaisiti mo usosovosinge lexe nenge tanoxou, a Mosingesi.

²² Xo musosovosinge aloxo 'o. Mupilixinu Ulenu Laixe uxolu noxinge so lamakisou xoluxolu lailaixe ane so taxalisou ili'i.

Polu upalea so ulai ne Kolini uasi

²³ Ioxe, Mosinge molu so uvalaxu vaikalaxeli 'o lexe maninasi. Xo opoleli lexe ane'e palea noxinge ne Kolini a loxo elemolu ne, ia ane'e uasi xo amasaxau lexe alosinge tu'umaxu uasi.

²⁴ Nexi tamasaxau lexe ta'uli laxungengi no anu lopala noxinge mamu. Anu masaxa noxixe lexe taxaxaisinge so ta'avutinoxu osa noxingesi. Xo nexi telavu lexe no anu lopala noxinge, la a ngatulu pumungenge no anu mukalu.