1 Timoti 6 - Ata New Testament

Pelototosi'a tamitema tasilevi

¹ Ioxe, Mosinge ta'olu ane tami­tema tasilevi la itaxane'i tatanane'i laixe. Itaxane'i mo so ane'i tatanane'i ivikala masua no anu ualasou Mosinge xe lopala na'a nenge uasi.

² Xe tamitema tasilevi ane tatanane'i Mosinge ta'olu kalumo la mamu so i'oxo lexe, “Ai, anene vivilo no anu lopalasi, laso eni alomuxu to uasi.” Ivikala axone uasi, ivikala aloxo 'o. “Eni masi xavileliou xaixai noxou vivilo 'o so asu'ulinu. Eni asexelaxu xo anu kalumo ulopala noxou Tatana­nenge ane.” Vaikala ano'o navotone'i Mosinge ta'olu mo napelototosi'a laixe no anu.

Oponenge ututulu no anu mimi so vasimenge uasi

³ Ioxe, Tatananenge Iesua Kalaisiti mupilixinu vaikala so xoluxolu­nenge mu'isalili no anu Mosinge oponu. Ia tamitema se'i ipolo va'axu mo ilanu vaikala so ilapune'i tamitema no anu vote'i ane ulapu uasi.

⁴ Tamitema ane xo ne ane'i itoxa'a mo xavutalai'a ulamana no anu mi vile uasi. Opone'i ututulu no anu talitali'i mo vaikala kitukitu, ia so ino'u lavulavu no anu uasi. Ilemolemolu xo i'osasou tu'umaxu mo oto no anu vaikalasi. I'oxo axone laso anu uxalixu isuisu mo la'ia mo vaikala masumasua mo xavutala masuai'a no opone'i ngato'o.

⁵ Mo voxovoxo utotomu ikusukusu'a no anu vaikalasi xo xavutalai'a vuluvulusi mo mi vile manina no anu uasi. Mo ikalavoi lexe loxo i'una no anu xaixai noxou Mosinge la anene vote'i so ixalisou lamoli xe mimi.

⁶ Ikalavoi axone ia lamoli xe mimi ne anu vote'i so xoluxolu laixe uasi. Loxo nenge taxolu se'isisi mo ta'osa noxou Mosinge la anene vote'i so xoluxolu laixe.

⁷ Xo loxo taneninge mivo'onenge la texaxasi, taxalixu mi vile uasi. La anu axone loxo takalu no lialia 'o la tano'u mi vile talaixu uasi, taxaxasila.

⁸ Laso loxo la'ilali xe mimi so utanunenge la umomomo se, taxolu se'isisi mo ta'osasi.

⁹ Ia ane'i ane opone'i ututulu no anu mimi so vasime'asi la uxovulaulaunixu xavutalai'a mo upalusi'a no anu mamulosi. Xo ixolu la Uluaou utovotovone'i xo xe masaxa masua noxi'a ne u'oki avile laso upalusi'a no anu uoi noxou ka imamulosi.

¹⁰ Masaxa so taxalisou lamoli ne anu tava'u susu tavu'alo to! Xo se'i opone'i ututuluou lamolisi ia no anu vote'i anene la ixiunu tumali'aou lopala na'a nenge. Ixiunu tumali'aou laso xoluxoluxa'a masua xo opone'i uto'oto'ome'asi.

Polu mupelototosou Timoti so xoluxoluxu

¹¹ Ia loxo nini, la namitemaou Mosinge laso na'umolu mo na'umesou mimi so mamulo ne. Na'umesou anene mo namulinu ilixo aloxo 'o. Xoluxoluxene ula­pusi mo ulovo no anu masaxa noxou Mosinge. Xe lopala noxine ututulu noxousi mo nasexelaxa'a tamenexine. Xe loxo tu'umaxu ma'ia uxalisine la natulu pakia'inesi mo oponeni lexasi noxi'a tamitema mukalusi.

¹² No anu sipoti la tamosou isoa so lexe ena'ei uuini. Ioxe no anu lopala noxine la xavineniou axone mo so mi vile uua'ulixene uasi. Xo mala'o nini nevikala laixe so nepala'anixu lopala noxine no ie'i tamitema latala. Laso natulu pumuxene no anu xoluxolu kaluxu uasi e Mosinge mu'avalinexu ne.

¹³ Eni pelototo pakia'u vile so alemolu noxine ia enisisi uasi. Alemolu no iou Mosinge e mosou mauli xe no iou Kalaisiti Iesua e mutulu muvikala lamana no laxunu Ponitiasi Pailati. Pelototo aloxo 'o.

¹⁴ Vaikalaou Mosinge ane mupilixinu noxine ne nalaxa'inu laixe. Nalaxa'inu mo so anu uxolu malemalenga avile. Mamu so napitanu no anu susu xo loxo 'o io uxalixu vote'i so tamitema ivikala masua no anu. Nalaxa'inu axone ulai ulai xo mo Tatananenge Iesua Kalaisiti uxali upala'a.

¹⁵ Anu uxali ulovo no anu voxo Mosinge musosovosou. Nenge ta'itinu uala­sou Mosinge xo anusisi u'uli'uli. Anu Kingi tatila noxi'a takingi mo anu Tatanane'i tatatananu mimi mukalusi.

¹⁶ Anusisi kaluxu uasi mo anu mosou xoluxoluxu iaxusi. Nenge tamitema vote'i so talai alai noxou so tasaxisou no iaxu ne uasisi. Anu anusisi ualasou utitilasi mo anu uxolu u'uli'uli avile, kaluxu uasi. Vaikala ano'o maninasi.

Pelototo noxi'a tamitema so lamoli

¹⁷ Mo napelototosi'a tamitema ane ixolu no anu mimi latanu lexe mamu so i'itine'i no anu mimii'a ne. Mo mamu so ilopalanu mi ane ukalu paleasi ne. Ilopala noxou Mosingesi xo anu mosou so uitimenge mimi ane uxalixu osa maninasou.

¹⁸ Mo napelototosi'a lexe i'oxonu ili'ilixo laixe so isu'uline'i tamenexi'a. Mo voxo­voxo utotomu ipilipilixinu avo'a noxi'a ane'i ane mimi uasi. Mo loxo ivelevelunui'a la itukala uasi, avo'a temanusi so ilosi'a.

¹⁹ I'oxo axone xo lakolisou ilixo ne la ixalisou i'li'i. Lakolisou ne mauli maninasou.

Pelototo kaluxusou

²⁰ Uo, Timotio, mi ane Mosinge mupilixinu noxine la nalaxa'inu laixe. Naxolu va'axu no anu vaikala vuluvulusi so lialia. Mo tamitema ane'i i'oxo lexe ane'i takeleva la ane'i i'oxonu vaikala anu uxililiou Mosinge vaikalaou, ia nalomuxa'a mamu.

²¹ Xo se'i noxinge milomuxu vaikala so xilili ne la vaimomo 'o ixolu va'axu no anu lopala na'a nenge. Iaiama noxou Mosinge a uxolu noxine ne. Anu anesi.