1 Timoti 5 - Ata New Testament

¹ Mo kalumo, loxo mi vile so nalovonixi'a tatiatila no anu la mamu so anaxene utausi'a. Navi­kala se'isisi noxi'a a loxo tamamine nataxane'i. Mo tamaulu kalumo, navikalane'i se'isisi a loxo tavivine ane nasexelaxa'a.

² Xe noxi'a tasema tatiatila la oponeni mama­laxu noxi'a aloxo ane'i tanenine. Xe noxi'a tavuanga kalumo la ilixo noxine malemalenga noxi'a aloxo tavivine tasema u'isalili.

Pelototo so si'a tasema tamului'a misoisoli

³ Xe loxo tasema ane tamului'a misoisoli mo evile so ino'u su'uli noxou uasi la nasaxila'a laixe.

⁴ Ia loxo sema vile tailie o taxaixasie ixoxolu la nape­lototosi'a aloxo 'o. Ane'i me'a isaxila'e laixe xo anene masaxa noxou Mosinge. Loxo nenge tasu'uline'i tamaminge o tane­nengi o taxaixasinge la anu u'osasou xo axone la loxo takolinu su'uli tatila mi'oxo noxinge.

⁵ Loxo sema vile mulue musoli xe ta'ilie so isu'uline uasi la ane ixoxolu ilopala noxou Mosingesi. Ilopala, la ivikala mo ilingau su'ulisie noxou Mosinge kakau olovoxo.

⁶ Ia tasema se'i tamului'a misoisoli axone la ixavutala noxou Mosinge axone uasi. Ane'i imulinu masaxa no anu vasime'asi laso no anu xoluxoluxa'a la loxo misoli mukalu.

⁷ Mimi ano'o napeloto­tosi'a laixe no anu mo so mi vile so tamitema ito'ome'a no anu uasi.

⁸ Mo loxo itema vile usaxila'a ta'olu xe tatulanu uasi la anu loxo muxiu tumalou no anu lopala na'a nenge. Mo susu noxou ne uua'ulixu susu noxi'a tamitema so isivoxo to!

⁹ Loxo ngakaukavunu ualaua­lasi'a tasema so ngasaxila'a ne, la ngailoune'i tasema ane tamului'a misoisoli kaini aloxo 'o. Sema ane tau ie xe uua'ulixu 60 mo ane mitaula'ixu itema vilesisi.

¹⁰ Xe ilixo noxie aloxo 'o. Sema ane tamitema ivikalasie lexe ane sema so xaixai laixe mo ane misaxila'a tailie laixe. Xe ane milavusou misexelaxa'a mo mitavalixa'a taasila xe loxo talopala me'a no tuala vile mixali la mi'uinu tava'a. Xe loxo tamitema ane mitata­vulenu tu'umaxu la misu'uline'i mo opone mututuluou xaixai aneva lailaixe manina.

¹¹ Ia tasema tavuanga ane tamului'a misoisoli mukalu ngaso­sovosi'a mo ngakaukavune'i uasi. Xo ane'i a ixolu i'oxonu xaixai noxou Kalaisiti ia loxo opone'i u'avuti so itaula'ila la ixiunu tumali'aou ane.

¹² Xo loxo 'o io isusu xo vavalima lexe ixolu no anu xaixai anenesi la ixola'u ane.

¹³ Mo mi vile aloxo 'o. Loxo pita ne usaxila'a tavuanga axone la ixali loxo tapauxe xo ixixaoxao no tatani vitanisi. Ipauxe axone mo kalumo isukusukunu vaikala xo ilomusou sivo no tani vile la ilaixu no tani vile. Mo imunumunuxa'a tamitema no tatani.

¹⁴ Laso telexu aloxo 'o. Loxo sema vile mulue usoli ia ane vasimele lexale­xasousio la laixe so itaula'ila. Itaula'i so ivo'one'i ta'ilie xe isaxila'u tani laixe mo so tamitema so xilili la vote'i so isu'anu anaxa'ainge uasi.

¹⁵ Xo se'i noxi'a tasema ne mixiunu tumali'aou lopala na'a nenge mo mimulinu Uluaou mukalu.

¹⁶ Ioxe, loxo sema vile mulue usoli la tatulane Mosinge ta'olu me'a isaxila'e. Ilopala no anu pita noxou Tatananenge uasi xo axone la ialuxu xo tasema tavu'alo ane. Ia loxo ane'i vilevilesi isaxila'a tatulane'i, laso pita usaxi u'isalili noxi'a tasema ane tatulane'i uasi.

Tatemanu pita i'oxo axova noxi'a tamitema so saxila'u

¹⁷ Mo pelototo vile aloxo 'o. Laixe so tatemanu pita itaxane'i tamitema so saxila'u. Mo ane'i ane ixolu u'isalili no anu xaixai so votovoto mo pelototosi, la isu'uline'i no anu mimi so vasime'a.

¹⁸ Xo loxo ulemolu no anu lavukuou Mosinge lexe, “Loxo ngingi ngaxixaunixi'a takau so imalomaloxo'u uiti mo so sosou uxexe, la ngasakinu anaxa'a uasi. Loxo i'ani sevile la i'anisi.” Xe vile aloxo 'o, “Loxo itema vile uxaxai noxinge la ngalotonusi.”

¹⁹ Loxo itema vilesisi uto'omolu itema so saxila'u no anu vaikala vile la ngalomuxu uasi. Ia loxo tamitema tatamei o tatalu ine'e so ipala'anixu susu vile laso ane, ngalomuxu vaikalai'a ne.

²⁰ Ngalo­muxu xe loxo manina la ngalemolu susu noxou mo ngavikalanu pakia'u no ie'i tamitema. Mo so axone la ane'i Mosinge ta'olu latala imama'u no anu susu kalumo.

²¹ Ioxe Timoti, no iou Mosinge xe Kalaisiti Iesua xe ta'angelou talaixe eni apelototosine pakia'u aloxo 'o. Nini nalaxa'i laixe no anu vaikala manina epilixinu noxine mukalu mo loxo na'isalilinoxu noxi'a Mosinge ta'olu la no anu vote'i vilesisi noxi'a mukalusi. Mamu so na'oxone'i se'i laixe no anu masaxa noxinesi xe se'i la ieni uvaxai'asi.

²² Mo mamu so napalea so namulaxu avone noxou itema vile so natulusou no anu xaixai noxou Mosinge. Loxo itema vile so nasosovosou la naxolu nautitiou xoluxolu noxou laixe mo so susu utelosou ualasine uasi. Xo loxo 'o io natulusou palea xe ulapau no anu susu la anu loxo usu'asine kalumo.

²³ Ioxe, elomu lexe nini utotomu siki no oponeni. Laso naiexu lexasi uasi, nailanu ilou uaini sevile so usu'ulineni no anu siki anene.

²⁴ Alemolu mi vile aloxo 'o. Susu noxi'a tamitema se'i mulamanasi mo ta'oxo lexe ili'i itavulenu tu'umuxusou. Ia noxi'a se'i la susu noxi'a mutalume. Laso ili'i la takuluke xo susu upala'a no anu lakoti noxou Mosinge mo ane'i kalumo itavulenu tu'umaxusou.

²⁵ La anu axone kalumo no anu ilixo laixe. Se'i ne upala'a avile xe se'i utalume. Ia umomomo so utalume avile uasi ane, ulai la upala'a kalumo.