1 Timoti 4 - Ata New Testament

Vaikala kalakalavoi uxovulaulaunixi'a tamitema mose'i

¹ Ioxe, Ulenu Laixe muvikala lamana lexe no anu voxovoxo unene'e la se'i ixiunu tumali'aou vaikala manina e talopalanu. Xo ane'i ilomuxu mo imulinu vaikala so kalavoi noxi'a ta'angelo tama­sua.

² Vaikalai'a ta'angelo tamasua ne upolo uxali no anu anaxa'a tamitema so kalakalavoi. Ane'i ne tane'i papatuou susu noxi'a lexe uto'ome'a uasi a loxo velamolu no vasimenge uxamulinu navunavula uasi.

³ Xo tamitema ane xo ne ivikala lexe tatavunenge no anu taula'i mo no anu la'ilali iouiou. Ia la'ilali anene Mosinge mukoinu mo so nenge ta'ei talavusou mo talopalanu vaikala manina la tavikala laixe noxou ka ta'ousi.

⁴ Xo mimi mukalusi Mosinge mukoinu ne anu la'ilali laixe to. Tatavunu vile no anu uasi, tano'usi mo tavikala laixesou.

⁵ Laso loxo ta'ou la nenge tavikala laixe noxou tei. Xo no anu vaikalaou muvikala lexe mimi mukalusi ne laixe no iousi.

Polu mupelototosou Timoti lexe u'oxonu xaixai noxou Kalaisiti laixe

⁶ Laso naxolu napela'a tavivinge ne so mimi elemolu 'o. Xo axone la nini namitema so xaixai laixe noxou Kalaisiti Iesua ane. La naxolu na'ani'ani no anu vaikala so lopala na'a nenge mo taneniou lavulavu pumuxu ane a namulinu ne so nano'u xavi no anu.

⁷ Naxiunu tumalineou sitoli vita­vitanisi a loxo tatiatila milavu­sou mi'oxonu. Mo na'oxo aloxo 'o. Na'isalilinoxu xoluxoluxene no anu masaxa noxou Mosingesi.

⁸ Xo loxo ta'ekisasaisi so vasi­menge uno'u xavi la anu usu'ulinenge sevile. Ia loxo ta'isalilinoxu xolu­xolunenge no anu masaxa noxou Mosinge la nenge tano'u su'ulisou tatila. Su'uli anene so xoluxolu vaimomo 'o xe no anu ane ili'i kalumo.

⁹ Vaikala ano'o ne manina mo laixe so tamitema latala ilomuxu.

¹⁰ Mosinge anu a uma­mauli xe anu mosou pamauli noxi'a tamitema latala. Ia tamitema ane upamauline'i ne, ane'i ane ilopalanusi. Mo loxo nenge, la tetulusou lopala noxinge noxousi. Tetulusou lopala noxinge noxou laso maixene xavinenge mo sasaie­ngeou xaixai noxou.

¹¹ Ioxe vaikala ano'o napilixinu noxi'a Mosinge ta'olu mo napelo­totosi'a lexe imulinu.

¹² Manina, nini namaulusi ia mamu so tamitema itaxaneni uasi no anu mi anene. Nini naxali loxo pikisa noxi'a talopala no anu vote'i aloxo 'o. Vaikalameni ilou muamua'ixene ulapusi. Xe sexela ilou lopala noxine pakia'usi. Xe xoluxolu noxine malemalengasi.

¹³ No anu pita noxinge ne la nga'itisou vaikala no anu lavukuou Mosinge mo ngavotovoto mo ngapelototo. Eni ane'e noxinge ia ngatalo no anu mimi anene uasi, nga'oxonu xo mo axali noxinge.

¹⁴ Xe loxo nini Timoti, Ulenu molu mulosine lavulavu so xaixai noxine ne laso kalakalaxene uasi. Mulosine mala'o loxo milemolu vaikala so pela'a so xoluxolu noxine mo tamitema so saxila'u mimulaxu avo'a no kisine.

¹⁵ Kalakalaxene uasi, oponeni utuluou mo nasoa no anu xaixai noxine mo so tamitema latala imaisou lexe uiave laixe.

¹⁶ Nini nalaxa'i laixe no anu muamua'ixene mo votovoto noxine. Xo loxo natalo uasi la naxalisou nene'axu laixe no anu xoluxolu noxine xe noxi'a ane'i ane ilomuxu vaikalameni.