1 Timoti 2 - Ata New Testament

Laixe so Mosinge ta'olu ivikala noxou utotomu

¹ Ioxe, pelototo noxilo tei aloxo 'o. Laixe so Mosinge ta'olu ilinga mo ivikala noxou mo ilemolu laixe mo ipilixine'i tamitema mukalusi noxou Mosinge.

² Mo ilingau su'ulisi'a takingi oli'a taxamani. Mo so axone la xoluxolunenge se'isisi mo lalavulusi ulovo no anu masaxa noxou Mosinge.

³ Mosinge e mosou pamauli ta'olu ivikala noxou axone xo anu laixe no iou mo u'osasou.

⁴ Xo anu umasaxau lexe tamitema mukalusi ixalisou lavu­lavu no anu vaikala maninasou mo ixalisou pamauli.

⁵ Xo manina, Mosinge vilesisi. Mo itema vilesisi so utulu mo ukalusou la'ia no tainenge nenge tamitema xe Mosinge. Itema vilesisi ne a Kalaisiti Iesuasi.

⁶ Xo anu mupi­lixinu lape umomomo noxi'a tamitema mukalusi. Lape ne, mauli noxousi. Mu'oxo axone xe no voxo loxo Mosinge musosovosou, la a'alosou mupala'a.

⁷ Laso anene tava'u so musosovosilo so axali itema so alanu vaikalaou mo a aposeliou. Vaikala ano'o maninasi, akalavoi uasi. Anu mulosilo xaixai so avotone'i tamitema noale'ale no anu vaikala manina mo so ilopa­lanu.

⁸ Laso ane. Masaxa noxilo lexe Mosinge ta'olu no tuatuala ixolu tane'i malemalenga so ivikala noxou Mosinge. Xo loxo vile uxolu uvikala noxou Mosinge la oponu la'iaxui'a o uxililiie'i tamenexu mamu.

Pelototosi'a tasema lexe xoluxoluxa'a se'isisi

⁹ Xe vile aloxo 'ola. Eni amasaxau lexe tasema opone'i ututuluou lavuluti lailaixe so itokolomonu vasime'a no anu malaxo uasi. Xe mamu so ixolaxola mo itokolo­monu laxusi'a xe ivaxanu mimi so vasime'a koli o xapoxapo xe lavuluti ane lamolisou tatila musuku. Laixe so imulaxu mimi ane utanuxu vasime'a laixe mo ane so ulapunu ie'i tamitema uasi.

¹⁰ Xo loxo sema vile ivikala lexe ane imulinu masaxa noxou Mosinge la opone ututuluou mimi so vasimele uasi, ututuluou xaixai noxou Mosingesi.

¹¹ Mo axone la ane ixolu se'isisi mo ilu'ene so ilomuxu pelototo no anu Mosinge vaikalaou.

¹² Mo avikala aloxo 'o. Tasema i'uli laxune'i tamulu mo ivotone'i uasi, ixolu se'isisi.

¹³ Xo Mosinge mukoinu Atamu tei kaio muxalixe Ivi.

¹⁴ Mo Uluaou u'oxo loloxu Atamu uasi, mu'oxo loloxe sema xe milomuxu, la misusu.

¹⁵ Laso anu tava'u so tasema itavulenu navunavu no anu lavulo'o. Ia ane'i ixalisou pamauli loxo ilopala. Mo axone la ixoxolu no anu sexela mo ilixo malemalenga mo ixolu no anu xolaxola uasi, ixolu se'isisi.