1 Tesalonaika 4 - Ata New Testament

Mamu so ta'oxonu ili'iloxo nuni'u

¹ Ioxe tavivixe, mo aloxo 'ola. Nexi tepela'ingexu vote'i so mua­mua'ingenge ane ulovou masaxa noxou Mosinge. Mo a ngamulinu ne. Ia nexi tatama so tapelototo­singe no anu ualasou Tatana­nenge Iesua lexe xavingengiou avile.

² Xo ngingi menge ngelavusou pelepeletoto ane tepilixinu noxinge no anu ualasou Tatana­nenge Iesua.

³ Aloxo 'o. Masaxa noxou Mosinge lexe xoluxo­lungenge malemalengasi laso ngingi nga'apingenge no anu ilixo nuni'u olele.

⁴ Ngingi vilevilesi ngalaxa'inu vasimenge laixe so ngapilixinu no anu ilixo malema­lenga ane laixe no iou Mosinge mo no ie'i tamitema.

⁵ Mamu so masamasaxa masua upalusinge no anu ili'ilixo nuni'u. Xo anene ilixo noxi'a tamitema so isivoxo e ilavusou Mosinge uasi.

⁶ Mo loxo itema ususu axone la anu upakali noxou vimou no anu lopala ane. Xe loxo tepelototo pakia'u noxinge mala'o, lexe ngalaxa'i laixe xo Tatananenge molu ukoline'i tami­tema so ilixo axone.

⁷ Mosinge mu'avalinge so tamulinu ili'ilixo nuni'u axone uasi. Mu'avalingexu xoluxolu malemalengasi.

⁸ Laso loxo itema uxililiou vaikala ano'o la uxililiou vaikalamexi tamitema uasi, uxililiou Mosinge. E mulo­singe Ulenu Laixe a uxolu noxinge ne.

Pelototo lexe sexela noxi'a ngato'o uleme

⁹ Ioxe, no anu ngiou so sexela no taingengi ngingi Mosinge ta'olu la eni vaikala so apela'ingexu uasi. Xo Mosinge molu mulosoingexu vote'i so ngasexelangenge ngato'o mukalu.

¹⁰ Xo telavu lexe ngingi a nga'oxonu noxi'a tavivinge no anu lopala no xalexale tuatuala ne Masetonia polovinisi. Ngingi a nga'oxonu ia tavivixe, nexi tapelototosinge mo ta'avutinixinge lexe mi ne utetelai.

¹¹ Mo loxo tepelototosinge mala'o lexe opo­ngengi ututulu so ngaxolu se'isisi mo ngingi menge nga'oxonu xaixai noxinge no avongesi.

¹² Mo so ngingi ngakamulinu mi vile so vasimenge uasi la tamitema no pa'upa'umenge imaisou xoluxolu noxinge lexe mulovosi.

Tatananenge ulivu une'e so uno'a tamitemaou

¹³ Ioxe tavivixe, loxo noxi'a tanoxinge ane misoisoli la ngaxovulaulau noxi'a uasi. Xo ane'i tamitema loxo ixomaiou voxo olele uasi la tama noxi'a uxoxolu uxoxolu u'okisi. Ia ngingi la nga'oxo axone uasi.

¹⁴ Xo nenge telopala mo telavu lexe Mosinge mutulusou Iesua no anu soli. Laso talopala lexe no anu xavi noxou anenesi la no voxosou lailivuxu Iesua la oli'a tanoxou e misoisoli.

¹⁵ Nexi tapela'inge no anu vaika­laou Tatananenge aloxo 'o. No anu lailivuxu Tatananenge la nenge tamitemaou ta'ei taxolu tamamau­lisio la ta'uli noxi'a ane'i ane misoisoli uasi.

¹⁶ Xo aloxo 'o. No voxo anene la xoli toxoxu xe tila noxi'a ta'angelo talaixe uvikala xe piuka noxou Mosinge utama la Tatananenge molu no tualasou ulu'e. Ulu'e laso tanoxou Kalaisiti ane misoisoli la itulutulu tei.

¹⁷ Ukalu laso ta'ei noxinge ane tamamaulisio la nenge'a takei tatelai so ta'alaxu no loxotolo. Laso ane, nenge nenge'a taxolu noxou Tatananenge kaluxusou uasi.

¹⁸ Laso ngalemolu vaikala ano'o so ngamamatolangengi no anu ngato'o.