1 Tesalonaika 3 - Ata New Testament

Mipalusou Timoti so u'oxo pakia'a Tatesolanaika

¹ Nexi texolu ne Atenisi 'o la tanexilili no anu xoluxolungenge lexe axova. Tanexilili la ialuxu manina noxixe laso te'oxo lexe, “Uasi, nengesi taxolu 'o.”

² Laso tepalusou Timoti mune'e noxinge so u'oxonu pakia'inge mo umama­tolangengi no anu lopala noxinge. Timoti ne anu vivinge ane, anu uva'isu no anu xaixai noxou Mosinge so talanu vaikala laixe so Kalaisiti.

³ Xo loxo 'o io tu'utumaxu ane ngatavulenu ne masi u'oxonu opongengi usasalo. Ia mamu, xo ngingi menge ngelavu mukalu lexe mi axone uxalisinge nenge'a la anu ulovo no anu masaxa noxou Mosingesi ane.

⁴ A telemolu to! Texolu noxinge mala'o la telemolemolu lumamo lexe nenge tatavulenu tu'umaxu aloxo 'o. Laso maixene muxali, a loxo ngelavu.

⁵ Laso epalusou Timoti mune'e noxinge xo exolu exolu xo mole talelilili noxinge. Epalusou so ukiloloinge no anu lopala noxinge lexe axova. Xo e'oxe axova, masi tovotovoto noxou Uluaou mu'oki la xaixai noxixe no taingengi mulapau vitanisi.

Timoti mulivunoxu latailivuxu la Poluena mi'osa

⁶ Ioxe, tanexilili axone ia Timoti mulivu muxali 'o. La latailivuxu laixe xo mua'aloxu lopala mo sexela noxinge. Mo mua'alo lexe ngingi ngaxolu tangenginexe. Mo opongengi utatama so ngamaisixe a loxo oponexi utatamasinge ne.

⁷ La tavivixe, nexi tatavulenu navunavusou tu'utu'umaxu 'o ia telomu lexe pumungenge no anu lopala noxinge laso mumamato­lanexi.

⁸ Nexi telavu lexe pakia'inge noxou Tatananenge laso nexi taxolu tamaulisi.

⁹ Mo aloxo 'o la ta'osa misevile mo tavivikala noxou Mosinge. Tavikala laixe noxou ia vaikalamexi loxo umomomo uasi, ululusou osa noxixe uasi.

¹⁰ La kakau olovoxo tama no oponexi noxou Mosinge lexe tamaisou iengela. Mo so nenge'a taxolu xe loxo lopala noxinge no anu ngiou vile mamalaxu sevile la ta'oxonu pakia'inge no anu.

¹¹ Nexi oponexi lexe Mosinge anu Maminge ilou Iesua anu Tatananenge i'oxonu vote'isixe so tane'e noxinge.

¹² Mo tamasaxau lexe Tatananenge u'oxonu sexela noxinge ngato'o loxo uleme mo utila. Mo axone noxi'a tamitema mukalusi a iou vilesisi loxo nexi tasexelangenge 'o.

¹³ Mo axone la u'oxonu xoluxolu noxinge pumuxu mo malemalengasi. Laso voxosou lailivuxu Tatananenge Iesua oli'a tamitemaou mu'isalili la Mosinge anu Maminge utongongengi lexe mi vile masua noxinge uasi.