1 Pita 5 - Ata New Testament

Tamitema so saxila'u ilaxa'ine'i tasipisipi laixe

¹ Ioxe, eni pelototo so alemolu noxi'a tamitema so saxila'u no taingengi ne. A eni kalumo amitema so saxila'u mo aa'aloxu navunavu noxou Kalaisiti e emaisou no ieli 'o. Mo nenge nenge'a taxalisou mimi lailaixe Mosinge uvelununenge no voxo loxo Kalaisiti upala'a no iaxu avile. Laso eni apelototosinge ngingi tamitema so saxila'u aloxo 'o.

² Ngingi ngalaxa'ine'i tamite­maou Mosinge laixe xo ane'i loxo tasipisipiou ane mupilixine'i no avonge ne. Laso loxo ngaxaxai so ngasaxila'a la nga'oxonu loxo evile usoungengi no anu uasi. Nga'oxonu xo ngingi menge ngamasaxau xaixai anene mo ngalavu lexe anene masaxa noxou Mosinge. Mo tava'u nga'oxonu so ngano'u lapesou uasi, nga'oxonu no anu osa maninasou no opongengisi.

³ Xe nga'itingengi noxi'a tamitemaou Mosinge ane mupilixunu no avonge ka ngapa­muxane'i so nga'uli laxune'i vitanisi mamu. Nga'uli noxi'a tasipisipi aloxo pikisa laixe so ane'i imaisinge kaio imulingengi no anu.

⁴ Loxo ngaxaxai axone la no voxo so Kisi'a tamitema so isaxila'a tasipisipi upala'a, la ngingi ngano'u palaisi ane lailaixe u'uli'uli mo umomomo so tasiauxu uasi.

Tamitemaou Mosinge ipilixine'i no avolusi

⁵ La ngingi tamaulu kalumo, ngalu'engengi noxi'a tamitema so isaxila'inge ne. Mo ngingi muka­lusi ngalu'engengi so nga'oxonu xaixai noxinge ngato'o. Aloxo Mosinge vaikalaou ulemolu lexe, “Noxi'a tamitema ane me'a i'itine'i la Mosinge uxililiie'i ia noxi'a ane'i ane ilu'ene'i la uiaiama noxi'asi.”

⁶ Laso ngalu'engengi ngaxolu no laxu Mosinge avolu so u'oxo latolosinge no anu xaviou xo mo uxali no anu voxo e muso­sovosou so molu u'itingengi.

⁷ Loxo mi ma'ia u'avutinoxu opongengi la ngapilixinu noxou Mosingesi xo anu tanungenge misevile.

⁸ Ngingi ngaxolu xavutalamengi lamanasi mo ngalo laixe. Xo Uluaou Mosinge anu uluamengi kalumo, la anu loxo misoposi vova e laioni. Talaioni ixixao i'unga'unga so ikakamuline'i tami ma'ia so ii'a, la Uluaou anu axonesi xo uxixao ukakamuline'i tamitema so uma­mulone'i.

⁹ Ia ngaxolu pumu­ngenge no anu lopala noxinge ka nga'apixusi. Mo ngalavu no opongengi lexe tavivinge talopala no xale lia mukalusi a itavulenu tu'umaxu iou vilesisi aloxo ngingi nesi.

¹⁰ Mo ngalavu aloxo 'o kalumo. Mosinge e mosou iaiama mu'avalinge mupitangengi noxou Kalaisiti mo so ngingi kalumo nga'una no anu xoluxoluxu iaxu e kaluxusou uasisi. Laso ngingi ngatavulenu navunavu voxo ataxu se 'osi ka so ili'i la anu uxalixinge ulomotele mo pumungenge mo pakia'inge mo so ngasasalo uasi.

¹¹ Anu anusisi ne u'uli laxunu mimi mukalusi ulai ulai kaluxu uasi. Vaikala ano'o maninasi.

Vaikalaou kaluxusou so upilixine'i

¹² Sailasi musu'ulileli no anu lapasi 'o xo eni elemolu vaikala kaio anu mukaukavunu. Eni emaisou vivinge 'o lexe usaxila'u laixe xaixai ma'ia tapilixinu noxou. No anu lapasi ataxu se 'o la emasaxau apelototosinge mo avikala lamana no anu iaiama maninasou noxou Mosinge. La emasaxau a'avutinixinge lexe ngatulu pumungenge no anusi.

¹³ Ane'i tatemanu pita so taoni Vaviloni 'o ivikala aso noxinge. Ane'i ne Mosinge muilongengi ngoli'a lexe tamitemaou. Xe alixeli Maki anu kalumo uvikala aso noxinge.

¹⁴ Ngingi ngamaxa'u sexela noxinge ngato'o no anu vote'isinge tamitemaou Mosinge. Eni amasaxau lexe ngingi muka­lusi ane ngaxolu noxou Kalaisiti ne la ngaxolu lalavulusi. Anu anesi.