1 Pita 4 - Ata New Testament

Talopala i'italonu vasime'a so tava'u susu upamuxane'i mamu

¹ Ioxe, Kalaisiti mutavulenu navu­navu no anu vasimolu laso ngingi ngano'u xavutalaou so u'oxonu pakia'inge. Xo itema ane utavulenu navunavu no anu vasimolu axone la upilipilixinu no anu susula uasi.

² Laso no anu mauli noxinge no anu vasimenge ane a uxolusio la ngalomulomuxu masaxa no anu vasimenge mamu, ngamulinu masaxa noxou Mosingesi.

³ Xo tei la muamua'ingenge aloxo tami­tema so isivoxo i'oxonu mo i'osasou manina. Mi loxo ilixo nuni'u xe navu u'ani no tane'i xe xoluxolu vuluvulusi no anu sipa­kisi. Xo ilavusou i'oxonu pati so iie mole isipaki avile sika anaxa'a utautau no anu vaikala masuasi. Xe i'oxonu ili'ilixo ane mukilikalu manina so i'itinu momosi'a kalavoi. Ia loxo ngingi la voxo so nga'una no anu mi axone a mumomomo mo mukalu ane.

⁴ Laso loxo ngakei noxi'a so ngavaxa no anu susu u'oki'oki axone la uasi, la ane'i ikulukemengi ka ipupuienge.

⁵ Ia mi vile uasi xo ili'i ane'i itulu no iou Tiasi ane ulalaxi so utilovosi'a tamitema ane imamaulisio xe ane'i ane misoli mukalu. Itulu no iou so utatali'isi'axu ili'ilixo masua noxi'a ne.

⁶ La anu tava'u so tamitema ane misoisoli mukalu milomusou votovotosou vaikala laixe mi ne mimaulisio. Xo loxo mixolu no anu vasime'a la tamitema mitilo­vosi'a no anu tilovo noxi'a tamitemasi. Ia vaimomo 'o no anu xoluxoluxu ulene'i 'o la ane'i mi'una no anu xoluxolu noxou Mosinge u'isalilisi.

Xaixai ane Mosinge mulosinge lavulavusou la tapamuxanu laixe

⁷ Ioxe, kaluxusou mimi mukalusi a so uxali 'oe. Laso ngatilovo laixe mo ngapamuxanu ilixomengi laixe mo so axone la ngaxolu se'isisi so ngavivikala noxou Mosinge.

⁸ Xe mi ane mutiatila, a so xavingengi no anu sexelasinge ngato'o. Xo loxo tamitema isusunixinge ulolutu ia ngasexelaxa'asi, la anu umomomo so usu'asou mi ma'ia mi'oxonu mole usolixu avile.

⁹ Mo aitengasinge ukisi noxi'a tami­temasi xe ngakalapu lexe kalaka­langenge uasi.

¹⁰ Mosinge mu'o­xonu laixe so mu'itimengi ngingi vilevilesi lavulavu no anu xaixai iouiou. Ngingi ngexalisou nene'axu iaiama noxou e ngiou­ngiou no anu misevile axone laso ngalaxa'inu laixe mo ngaxaxaisou so ngasu'ulingengi ngato'o.

¹¹ Laso loxo vile noxinge muno'u lavulavu laixe so ulanu vaikala la ulanu u'isalili no anu Mosinge vaikalaousi. Xe loxo vile xaixai noxou so usu'uli la u'oxonu no anu xavi e Mosinge upilixinu noxou. Mo so axone la tamitema imaisou xaixai noxinge ne la i'itinu Mosinge no anu ualasou Iesua Kalaisiti. Xo Iesua Kalaisitisi laixe so ualasou utila mo u'uli laxunu mimi mukalusi ulai ulai kaluxu uasisi. Vaikala ano'o maninasi.

Loxo tatavulenu navunavu aloxo Kalaisiti la mi so ta'osasousi

¹² Ioxe tavivilo ane asexela­ngenge, tu'utu'umaxu e uxali so utovonu lopala noxinge la u'oki loxo navu u'elasi. Ia ngakulu­kemolu loxo mi iou vilemo manina to uasi.

¹³ Ngingi a nge'una no anu navunavu e Kalaisiti mutavulenu laso loxo navunavu ne utila la osa noxinge kalumo utilasi. Mo so no voxosou Kalaisiti upala'a no iaxu avile la osa'ila noxinge ulolutusi.

¹⁴ Loxo tamitema ipupuiengixu ualasou Kalaisiti la anu mi so nga'osasousi, xo Ulenu Mosinge lailaixe misevile mo xavinu a uxolu noxinge ne.

¹⁵ Mamu so vile noxinge utavulenu tu'uma­xusou susu vile u'oxonu loxo uvau menexu usoli o upakali o u'oxonu ilixo ukilikalu o u'una no anu mi noxi'a levianimo ka u'avutinoxu tu'umaxu no anu.

¹⁶ Ia loxo itema utavulenu tu'umaxu xo anu itemaou Kalaisiti la anu mi so umailamulinu uasi ane. Anu laixe so u'osasou ualasou Kalaisiti e utavulenu ne mo u'itinu Mosinge no anusi.

¹⁷ Voxosou Mosinge utilovosi'a tamitema a mune'e alai mukalu. Ioxe, tilovo noxou la uxali tei noxi'a tamitemaou. Laso loxo usoko'u noxinge tamitemaou u'isalili la masi ukalusou axova noxi'a ane'i ane tamitemaou uasi mo mixililiou vaikalaou laixe? Noxi'a ne ialuxu e lapilai uasisi.

¹⁸ Xo loxo Mosinge vaikalaou ulemolu lexe, “Mosinge upamau­line'i tamitema ane talapu no iou, ia vote'isou la tu'utu'umaxu no anu. Laso loxo tamitema talapu kalumo ixalisou la masi noxi'a ane'i ane ixiunu tumali'aou Mosinge mo ixolu no anu sususi la itavulenu tu'umaxu kaini axovao?”

¹⁹ Laso ane, loxo tu'umaxu ane ulovou masaxa noxou Mosinge uxalisi'a se'i, la ipilixinu mauli noxi'a no avolusi. Xo anu molu mukoine'i mo anu laixe so ilopalanu xo anu u'oxone'i laixesi.