1 Pita 2 - Ata New Testament

Ta'ani'ani no anu Mosinge vaikalaou

¹ Ioxe, laso mi ma'ia mukilikalu xe kalakalavoi xe ilixo so ngalemolu mi vile ia ngamulinu uasi xe isuisu xe vote'i so ngato'ome'a tame­nexinge no tumali'a, anene muka­lusi ngaxe­xenu uta'olu va'axusi.

² Xo ngelavu, takeakea ilavusou itata­masou susuxa'a so iiexu. Xe ngingi la ngatatamasou vaikalaou Mosinge malemalenga axonesi xo loxo nga'ani no anu la ngingi ngaleme xo laso xoluxolu noxinge ulomotele no anu pamaulisinge ne.

³ Xo ngingi ngetovonu alauna noxou Tatananenge mukalu mo ngexamulinu lexe tu'uaxu.

Tatananenge anu loxo lavo'o ane umamauli

⁴ Ngingi ngane'ene'e noxou Tata­nanenge xo anu loxo lavo'o ane umamauli. Lavo'o umamauli ne tamitema mimatapianu ia Mosinge muilounu mo musaxisou lexe lailaixe manina.

⁵ La ngingi kalumo aloxo lavolavo'o ane uma­mauli xe no anu xavi noxou Ulenu Laixe la Mosinge a ututulusou tasou noxinge ne. Mo no anu vote'i anene anu mukalipalangengi lexe ngingi laili pilisiti noxou u'isalili. Laso Ulenu upamuxangengi so ngane'enu mo ngapilixinu mimi lexe noxou Mosinge xe anu u'osasou xo noxou Iesua Kalaisitisi.

⁶ Xo no anu lavukuou Mosinge la mulemolu aloxo 'o, “Ngamalei, eni eilounu lavo'o vile lailaixe manina so tani kisou, la atulusou no anu la'olu Saioni. Mo so loxo tamitema ta'ei ilopala noxou la imalei lexe ipune'i uasisi.”

⁷ Laso noxinge ane ngelopalanu ne la ngelavusou lexe anu lavo'o lailaixe misevile. Ia noxi'a ane'i ane ilopala uasi la muxali aloxo Mosinge vaikalaou ulemolu lexe, “Lavo'o ane taka­penita mima­tapianu lexe mi so usu'asi, la vaimomo 'o muxali lavo'o lailaixe so utetelisou tani kisou pakia'u.”

⁸ Xe muvikalasou aloxo 'ola, “Anu loxo lavo'o e mitulatulaki no anu mole opone'i tu'umaxuou manina.” Ani, ane'i itulatulaki noxou xo ilomuxu vaikalaou to uasi. Laso maixene ixalisou mamulo e Mosinge mule­molu si'axu lumamo.

⁹ Ia loxo ngingi ne, Mosinge muilongengi so ngexali laili noxou mu'isalili. Xe ngaxolu tapilisitisou tasou kingi mo lasilili ane malemalengasi mo tamitema ane musosovosinge lexe tanoxou mu'isalili. Laso ngingisi a so ngapala'anixu ilixo lailaixe mu'u­li'uli avile noxou e mu'a­valinge ngela no anu isivoxo so nge'una no anu lamanaxu lailaixe ne.

¹⁰ Xo tatei ngingi tamitema so ngelili vitanisi ia vaimomo 'o ngingi ngaxolu laili e tamitemaou Mosinge. Tatei ngaxalisou alauna vile uasi, ia vaimomo 'o a ngexalisou alauna noxou mukalu.

Pita mupelototo lexe ixolu tauokuvoiou Mosinge

¹¹ O tavivilo ane asexelangenge, xoluxolungenge no lialia 'o aloxo taasila xe tamitema ane nunisi'a uasi. Laso eni apelototosinge lexe ngingi ngaxolu va'axu no anu mimi ane vasimenge ulapunenge no anu xo mimi axone u'otoxu tanenge.

¹² Muamua'ingenge ulapusi no taine'i tamitema so isivoxo. Xo masi ikalavoisinge lexe ngingi tamitema so susu 'o, ia loxo ilixomengi laixe upala'a no ie'isi la no anu voxo loxo Mosinge une'e 'o la i'itinu ualasouxu.

¹³ La ngingi tangengiou masaxa noxou Tatananenge mo ngaxolu no laxa'a taxamani mukalusi. Xe ngalomuxu vaikalaou itema so u'uli laxunu kanitili noxinge.

¹⁴ Mo ngalomuxu vaikalaou tila no anu xamani so polovinisi e ngaxolu no anu. Anu uxolu no anu tanixu ne xo itema so u'uli laxunu kanitili mutulusou so ukolinu ilixo noxi'a ta'ei ixola'u lo xe so uvikala laixesi'a ane'i ane imulinu ulovosi.

¹⁵ Ngaxolu no laxa'a taxamani axone xo anu masaxa noxou Mosinge lexe nga'oxonu ilixo laixesi. Mo so axone la tamitema so lavulavu uasi la vote'i so ito'omenge no anu vaikala vuluvu­lusi uasi.

¹⁶ Xo no anu xoluxo­lungenge la no anu lalavulusi ia mamu so xavutalamengi lexe, “Ai, vaimomo 'o taxolu lalavulusi a, laso susu ma'ia la ta'oxonusi.” Axone uasi, xoluxolungenge no anu lalavulusi ia so ngingi menge ngapilixingengi ngaxali tasileviou Mosinge.

¹⁷ Xe ngataxane'i tamitema mukalusi mo ngasexe­laxa'a tavivinge talopala mo ngamama'u noxou Mosinge mo ngataxanu ualasou itema so u'uli laxunu kanitili.

Kalaisiti muxali pikisa laixe so mutavulenu tu'utu'umaxu

¹⁸ Ioxe, ngingi tasilevi ngalu'e­ngengi noxi'a tatiatilasinge mo ngataxanu vaikalai'a. Ia noxi'a ane'i ane i'oxo laixe mo se'isisi noxingesi uasi, ngalu'engengi noxi'a ane'i ane i'oki'okingengi kalumo.

¹⁹ Loxo nga'oxonu xaixai noxinge laixe io ilosinge tu'umaxu vitanisi la tangengiou masaxa noxou Mosinge mo ngatavulenusi, xo anene u'osa­sousi.

²⁰ Xo loxo ngasusu xe ivengexu ka ngatavu­lenusi, la anu mi laixe so ualasinge utila no anu axovaio? Ia loxo nga'oxonu ilixo ane laixesi xe ilosinge navunavu ka ngatavu­lenusi, la anene Mosinge u'osasou.

²¹ Xo mi ane Mosinge mu'ava­lingexu ane. Anu Kalaisiti muta­vulenu navunavusinge xe mu'uli no anu vote'isinge mo so ngingi ngamulinu ngalanu tava'inge no anu xuaxua'u.

²² Xo anu susu vile noxou uasi xe kalavoi vile ula no anaxu sevile uasisi.

²³ Mo loxo tamitema mipupuiou la anu ukoline'i no anu vaikala axone uasi. Xe anu a utatavulenu navunavui ne la uvavaxa'a no anu mamulo uasi. Anu mupilipilixinu noxou anu ane so Tiasi e latilovo noxou ulapusi.

²⁴ Anu Kalaisiti mutavulenu susu noxinge no anu vasimolu mi ne mulili no ovu valautu. Mu'oxo axone so uxalixu vote'isinge so takalipala no anu susu xe taxolu no anu malema­lengasi. Anu vasimolu mukakaka mo so nenge tapamauli.

²⁵ Tatei xoluxolungenge vuluvu­lusi aloxo tasipisipi ivaxa ine'e 'osi. Ia vaimomo 'o ngingi ngelivu ngene'e mukalu noxou Tatanane'i tasipisipi e ulavusou u'oxo latolosou tangengi.