1 Kolini 8 - Ata New Testament

Axova no anu misoposi ane milosou lexe noxou momosi'a kalavoi?

¹ Eni vaikala sevile no anu mi e so misoposi ane tamitema milosou lexe noxou momosi'a kalavoi. Ioxe, loxo ngingi ngalemolu, nenge mukalusi lavulavu. Ia loxo lavulavu vitanisi, la tamitema me'a i'itine'i no anu. Ia loxo lavulavu noxinge uila ilou sexela la nenge tane­ngexa'a tamenexinge so tavalaxa'a.

² Mo loxo itema u'oxo lexe, “Ai mi 'o alavusou loloni,” la uasi ane. Loxo uvikala axone la anu ulavu to uasi!

³ Ia loxo itema ane usexelaxu Mosinge, la Mosinge ulavusou ane.

⁴ Ioxe, no anu ane so tamitema i'ou misoposi ane milosou tei lexe noxou momosi'a kalavoi, la avikalasou aloxo 'o. Nenge talavu lexe momosi'a kalavoi ne temanu uasi, manina to uasi. Mosinge vilesisi, vilela uasi.

⁵ Manina, ane'i imoxo'u mimi se'i lexe momosi'a mo i'oxo lexe teitexi mo no lialia 'o momosi'a mo tatanane'i mulolutu e mulolutu.

⁶ Ia nenge talavu lexe Mosinge vilesisi. Anu Maminge xo anu tava'u mimi mukalusi mo xoluxolu noxinge 'o a noxousi. Xe Tatananenge vilesisi e Iesua Kalaisitisi. Mo anu kalumo tava'u mimi mukalusi mo tava'u xoluxolu noxinge.

⁷ Ioxe, nenge telavu axone ia Mosinge ta'olu se'i ilavu laixe no anu uasi. Xo ane'i tei mi'itinu momosi'a kalavoi ne laso mune'e vaimomo 'o la ane'i tane'i so itilovo laixe uao. Ane'i mamalaxa'a axo­nesio, laso loxo i'ou mi ane tamitema milosou momosi'a kala­voi tei la tane'i uto'ome'a lexe, “Iu, masi asusu 'o”.

⁸ Ia Mosinge utongonenge no anu mi loxo ani'ani uasi. Xo loxo ta'ou la anu u'oxo­nenge laixe uasi. Xe loxo ta'ou uasi la anu u'oxonenge masua uasi.

⁹ Anene manina, ngingi ngalavu lexe mi vile loxo ani'ani usaki­ngengi uasi. Ia ngalaxa'i laixe xo masi nga'oxonu tavivinge e mamalaxa'asio itulaki i'una no anu susu.

¹⁰ Xo aloxo 'o. Nini ane lavulavumeni no anu mimi tele­molu 'o loxo nalai no tasou mosi'a kalavoi vile. Nalai naxolu na'ani xe vivine ane mamaluxusio usaxi­sine la masi axova? Anu tanu so utilovo laixe uao ia anu umaisine axone laso anu ukalavoi lexe tanu pakia'u so u'ani no anu mi ne kalumo.

¹¹ Laso loxo nini, la nelavu lexe mi anene mi vitanisi. Ia axone la loxo lavulavu noxine mulapunu vivine mamalaxu ne no anu mamulo. Vivine ne Kalaisiti muso­lisou kalumo.

¹² Laso loxo nasu­sunoxu vivine axone mo nalapunu no anu tu'umaxu so tanu mamalaxu ne, la anu loxo nasusu­noxu Kalaisiti molu.

¹³ Mi ne telexu aloxo 'o. Loxo la'ilalixo ma'ia ulapunu vivilo vile no anu susu la umomomo uasi manina. Axone la eni a'apixo no anu misoposi avile umomomo no anu kaluxusou lialia 'o.