1 Kolini 7 - Ata New Testament

Polu mukolinu tali'i noxi'a so taula'i

¹ Ioxe, eni akolinu mimi e ngeta­li'isiloxu no anu lapasi mala'o. Loxo itema utaula'i uasi la anu mi vile uasi anu laixe.

² Ia ilixo nuni'u u'oki ne, laso laixe loxo tamitema itautaula'i. Laso axone la tamulu i'a tasema vilevilesi xe tasema i'a tamulu vilevilesi.

³ Itaula'i ukalu la anu mulu ne u'apisou mi laixe so taula'i noxie semau uasi. Xe sema la i'apisou mi laixe ne noxou mulue uasi kalumo.

⁴ Xo sema ne mele isaxila'u vasimelemo uasi, mulue usaxila'u kalumo. Xe anu, la molu usaxila'u vasimolumo uasi, mi noxie semau kalumo.

⁵ Laso ngingi sema xe mulu ta'ei ngataula'i mukalu la mamu so nga'apisou vasimenge noxinge ngolou. Ia loxo oponengi vilesisi lexe ngaxolu sevile mo so ngavivikala noxou Mosingesi la anu laixe. Ngaxolu xo xe voxo se'i ukalui laso ane, ngapitala. Ngaxolu maxuveni avile uasi xo loxo 'o io Uluaou utovo­ngengi no anu susu.

⁶ Ia no anu vaikalaxeli lexe anu laixe so ngataula'i la apalusinge no anu avile uasi. Anu mi na'a ngingisi.

⁷ Xo loxo no anu masaxa noxilo la ngingi mukalusi ngaxolu vitanisi a loxo eni 'osi. La uasi, xo Mosinge molu mu'oxonenge no anu masaxa noxoumo. Laso noxinge se'i la mulosinge xoluxolu kaini vile xe noxinge se'i la kaini vile.

⁸ Ioxe, noxi'a tasema xe tamulu ane itaula'i uasi xe noxi'a tasema ane tamului'a misoisoli la avikala aloxo 'o. Loxo ane'i ixoxolu tasixeli loxo eni 'o la laixe manina.

⁹ Ia loxo masaxa no anu vasime'a upalupalusi'asi la laixe so itaula'isi. Xo loxo 'o io tane'i u'elasi la itaula'isi.

¹⁰ Ia noxi'a ane'i ane mitaula'i mukalui la avikala pakia'u aloxo 'o. Ia enisi uasi xo vaikalaou Tata­nanenge u'isalili. Mamu so sema ikalipala noxou mulue mo ilai avile.

¹¹ Ia loxo i'umesou mulue la ixolu vitanisi, itaula'ila uasi. O loxo uasi la ilivu noxou mulue mo opone'i vilesisila. Xe noxou mulu la mamu so ukusaie semau.

¹² Ioxe, vaikala noxilo ulai noxinge ngingi se'i aloxo 'o. Vaikala ano'o Tatananenge molu ulemolu tei uasi, ia alemolu aloxo 'o. Loxo vivinge Mosinge olu vile semau ilopala noxou Tatananenge uasi, ia loxo i'osa so ixolu noxou muluesi, la mamu so ukusaie.

¹³ Xe loxo sema vile noxinge ane mulue ulopala uasi, ia loxo oponu lexe uxolu noxiesi, la ikalipala noxou mamu.

¹⁴ Xo manina, sema ane Mosinge olu ne mulue ulopala uasi, ia Mosinge u'osasou taula'i noxi'a xo noxie sema nesi. Xe itema ane ulopala ia semau uasi, la axone kalumo. Mosinge u'osasou taula'i noxi'a xo no anu lopala noxou muluesi. Laso noxi'a ta'ili'a kalumo la ane'i loxo ovu voloxu uasi, xo no anu lopala noxie neni'a o mami'a olele la usakine'i no anu taula'i noxi'a taneni'a tamami'a.

¹⁵ Ia loxo itema ane ulopala uasi oponu lexe ukalu no anu taula'i noxie semau e Mosinge olu, la opone uai se'isisi. O loxo sema vile Mosinge olu uasi i'oxo lexe ikalipala noxou mulue ane mulopala, la mi vile uasi, ilaisi. Axone la opone'i uai se'isisi no anu taula'i mukalipala ne. Xo Mosinge molu mu'avalinge so taxoxolu no anu xoluxolu lalavulusi.

¹⁶ Laso mamu so opongengi utoto'omenge no anu mi anene. Xo axova? Loxo ngaxolu ngataula'isio la nini nasema namomomo so nalapunu mulumeni so uxalisou pamauli? O nini namulu, loxo semameni ixoxolusio la nini namomomo so nalapune so i'una no anu pamauli noxou Tatananenge? Nenge talavu­sou uasi ane.

Mosinge ta'olu ixolu se'isisi no anu xoluxolu anu muvelunui'a

¹⁷ Ioxe, eni apelototosinge no anu vaikala iou vilesisi loxo alemolu no anu pitapita mukalusi. Aloxo 'o. Mosinge uvelununenge tamitema xoluxolu iouiou no anu masaxa noxou. Laso ngexolu no anu xoluxolu aneva no voxo Tatana­nenge mu'avalinge, la ngaxolu se'isisi no anu.

¹⁸ Loxo itema ane mu'oxonu sosovo so muxotonu vasimolu ulomuxu ava noxou Tatananenge, la anu uxolusi. Utovonu so ulivunoxu vasimolu so uxali loxo teila uasi. O loxo itema ane sosovo ne uxolu no vasimolu uasi xe ulomuxu ava noxou Tatana­nenge la anu kalumo uxolusi. Uxotonu vasimolu uasi.

¹⁹ Xo loxo sosovo uxolu no anu vasimenge o loxo uxolu uasi la anu mi vitanisi. Ia ilixo so tamulinu masaxa noxou Mosinge anene mi mutitatila ane.

²⁰ Loxo elemolu. Ngingi ngexolu no anu xaixai o taningenge aneva no voxo loxo Mosinge mu'avalinge, la ngaxolu se'isisi no anu.

²¹ Xo loxo nini naxolu silevisi la naxolu se'isisi no anu, oponeni uauavuti uasi. Ia loxo tatananeni molu upilixineni so nalai napili, la nalaisi.

²² Ia itema ane uxolu silevi no anu vasimolu xe Tatananenge u'avalou la anu loxo uxolu upili ane. Xo no anu xoluxolu so vasimolu la xaixai noxou usaki­nusi. Ia xo anu muxali itemaou Tatananenge laso anu loxo upili no anu. Mo aloxo 'o kalumo. Itema ane mi vile usakinu no anu xoluxoluxu so vasimolu uasi xe ulomuxu ava noxou Kalaisiti la anu uxali loxo itema so xaixai vitanisi noxou.

²³ Xo ngingi mukalusi ne Kalaisiti muloto­ngengi. Laso ngingi tami­tema so xaixai noxou evile vitanisi uasi, ngingi tamite­maou mu'isa­lilisi.

²⁴ Laso manina tavivilo, alemolula lexe ngexolu axova no voxo loxo ngelomuxu ava noxou Mosinge, la ngaxolu se'isisi noxou no anu.

Polu mupelototosi'a tasixeli

²⁵ Ioxe, eni pelototo noxilo sevile so si'a tasixeli. Tatananenge molu uvikala u'isalili so mi ne uasi. Ia eni etilovosou mi ne laso laixe so ngalomuxo. Xo Tatananenge molu ulavusou uiaiama noxilo mo ulosilo vaikala ane maninasi so alanu.

²⁶ Eni axavutalanu tu'utu­maxu ane a uxuxali noxinge. Laso opoleli lexe ngingi tamulu ngaxolu axova la ngaxolu axonesi.

²⁷ Loxo nini netaula'i mukalui la naka­mulinu vote'i so naxotonu taula'i noxine uasi. Xe ngingi ane ngataula'i uasi la ngaxolusi, ngakakamuline sema vile uasi.

²⁸ Laso loxo ngataula'i la mi vile uasi, anu susu uasi. Xe loxo tavuanga itaula'i ne la itaula'isi, isusu uasi ane. Ia eni talelilingenge ngingi loxo ngataula'i axone xo anu masi ialuxu no anu xoluxolu so vasimenge.

²⁹ Laso tavivilo, vaikalaxeli ne laxu aloxo 'o. Voxosinge no lialia 'o ataxusi. Laso voxo ataxu se a uao 'o la xoluxolu noxinge aloxo 'o. Loxo ngataula'i la mi ne ulapunu xavutalamengi mo u'uli laxungengi uasi. Opongengi ututulu no anu xaixai noxou Mosinge aloxo ngasixelisio.

³⁰ Mo ngingi ane opongengi utatamasou mimi so lialia 'o la opongengi ulu'esi. Mo ngingi ane opongengi uleilaxu mimi so vasimenge la opongengi ulelei axone uasi. Mo ngingi ane opongengi ututulu so ngalotoloto la ngaxolu se'isisi loxo mengi mimi uasi.

³¹ Mo ngingi ane opongengi uxoxolu no anu lailoto so mimi so lialia la mamu so opongengi uauauvutiou. Laso ane. Mamu so mimi mukalusi ne u'uli laxungengi, xo anene so lialiasi mo anu tasiauxu ane.

³² Ai, eni amasaxau lexe mimi so lialia ulapunu xavutalamengi uasi. Itema sixeli ne anu oponu ututuluou mimi noxou Mosingesi. Anu uxolu umolo vote'i so u'oxonu mimi ane Tatananenge u'osasousi.

³³ Ia itema ane utaula'i, la mimi so lialia ulapulapunu xavutalaou kalumo. Xo anu uxolu umolo vote'i so u'oxonu mimi ane semau i'osasou. Anu nene'axu taula'i ane.

³⁴ Tamitema opone'i ukalipala axone. Xo tasema kalumo. Sema vile loxo ixolu itaula'i uasi la opone ututuluou mimi noxou Mosingesi. Ane ikalipalanu vasi­mele ilou ulene u'isalili no anu xaixai noxou. Ia loxo itaula'ii la xavutalaie ukalipala. Xo xavutala so mimi so lialia ulapunu xavu­talaie kalumo xo imasaxau i'oxonu mi ane mulue u'osasou.

³⁵ Vaikala ano'o so su'ulisi, anu so a'api­ngenge uasi. Xo amasaxau lexe xoluxolungenge laixe mo u'isalili no anu masaxa noxou Tatananengesi. Mo so mimi ula­pulapunu xavutalamengi uasi.

³⁶ Ia telexu vile aloxo 'o. Loxo itema vile uxolu mo ane'i isoso­vosie sema vile so itaula'ixu. Ioxe, anu uxoxolu xo mole ane vasimele ukea mo loxo uxamulinu lexe oponu ulai noxie mo masi ulai no anu susu, laso ane. Anu laixe so utaula'ixesi, mi vile masua no anu uasi.

³⁷ Ia loxo itema uxolu paki'au mo oponu ulapunu no anu susu uasi. Mo loxo uxolu uxamulinu lexe masaxa noxou upalupalusou so upalea no anu taula'i uasi la anu laixesi. Loxo oponu ututulu axonesi la anu olie sema misoso­vosie lexe noxou ne, la ixolu va'axusio.

³⁸ Laso ane. Loxo itema utaula'ixe vuanga e misoso­vosie noxou la anu laixe. Ia loxo itema u'apixu noxie sema e miso­sovosie lexe noxou la anu laixe manina.

³⁹ Ia aloxo 'o kalumo. Loxo sema vile itaula'i la ilou mulue ixoxolusi, xo taula'i ne usakine'i ilou. Ia loxo mulue usolii laso ane. Loxo imasaxau itaula'ila la anu mi vile uasi, ia itaula'ixu itema ane Tatananenge olusi.

⁴⁰ Ia loxo mulue usoli axone xe i'osa so ixolu vitanisi, la eni atilovosou lexe anu laixe manina. La no anu vaikalaxeli elanu 'o la Mosinge Ulenu a uxoxolu so musu'ulileli no anu.